Məhəmməd Əsədullazadə: “Görünən odur ki, növbəti görüşə Ermənistan hazır deyil”
Ermənistanda parlamentin xüsusi iclasında, 2015-ci ildə qəbul olunmuş ölkə konstitusiyasına əsasən, parlament tərəfindən Ermənistan prezidenti seçilmiş Armen Sarkisyanın andiçmə mərasimi keçirilib. Prezident vəzifəsini qəbul edən Armen Sarkisyan Ermənistan Konstitusiyası və VII əsrə aid İncil üzərində and içib.
Yeni konstitusiya ölkənin parlament idarəçilik üsuluna keçməsini nəzərdə tutur. Bunun ilk mərhələsi aprelin 9-da Armen Sarkisyanın vəzifəyə gəlməsindən başlayır. Konstitusiya üzrə daha geniş səlahiyyətlərə malik olan baş nazir isə aprelin 17-də parlament tərəfindən seçilməlidir. Ermənistandakı xarici diplomatlar da inauqurasiya mərasiminə qatılıblar.
Andiçmə mərasimində çıxışı zamanı A.Sarkisyan Qarabağla da bağlı açıqlama verib. Onun sözlərinə görə, heç kəsin şübhəsi olmasın ki, Qarabağın arxasında Ermənistan dayanır və bu məsələnin ədalətli həlli üçün bu gün də, sabah da mübarizə aparacaq.
Yeni prezident Qarabağ münaqişəsinin həllinin İrəvanın əsas prioriteti olduğunu da diqqətə çatdırıb. Bununla yanaşı, A.Sarkisyan münaqişənin tənzimlənməsində Rusiyanın roluna xüsusi yer verib və bu məsələyə xeyli vaxt ayırıb. Onun fikrincə, ATƏT-in Minsk Qrupunun həmsədrlərindən biri kimi Rusiya Dağlıq Qarabağ münaqişəsinin tənzimlənməsi prosesində əsas rollardan birini oynayır. O qeyd edib ki, 23 il əvvəl Qarabağda atəşkəsə Rusiyanın vasitəçiliyi sayəsində nail olunub. A.Sarkisyan onu da bildirib ki, yaxın günlərdə Moskvaya səfər edəcək. Sarkisyanın prezident olaraq Rusiyaya xüsusi önəm verməsi həm də ona görə diqqəti çəkir ki, sanki bu dövlət müstəqil deyil. Reallıqda bu belə olsa da, bütün hallarda, Ermənistan prezidentinin məsələyə bu cür yanaşması nə deməkdir?
Məsələyə münasibət bildirən politoloq Məhəmməd Əsədullazadə buna bir neçə kontekstdən yanaşdı: “Ermənistanın yeni prezidenti A.Sarkisyanın inauqurasiya mərasimində Dağlıq Qarabağ münaqişəsinin həlli ilə bağlı dediklərində elə bir xüsusi əhəmiyyət kəsb edən nüans yoxdur. Çünki A.Sarkisyan Serj Sarkisyanın yaxın adamıdır və Kremlin razılığı ilə prezident olub. Onun çıxışında Rusiyanın rolunu qabartması göstərir ki, bundan sonra eyni xətti davam etdirəcək və Kremlin göstərişlərinə əməl edəcək. Məlumdur ki, S.Sarkisyanın komandası məhz Ermənistanın dövlət müstəqilliyini Rusiyaya güzəştə gedib. Kreml də Dağlıq Qarabağ məsələsində rəsmi İrəvanı müdafiə edir. Apreldən sonra prezidentlərin növbəti görüşü gözlənir. Görünən odur ki, növbəti görüşə Ermənistan hazır deyil. Əsas məsələ burada Ermənistandan fərqli olaraq ölkəmizin prinsipial olaraq danışıqlara gedəcəyidir. Çünki aparılan danışıqlar səmərəsizdir və irəliləyişə gətirib çıxarmayıb. A.Sarkisyanın burada Rusiyanın rolunu qabartması yenə də İrəvanın Kremlin dəstəyinə sığınmasından ibarətdir. Azərbaycan birmənalı şəkildə işğalçı ilə bu il ərzində diplomatik müstəvidə danışıqları aparacaq. Ancaq nəticə olmasa, yeni hərbi güc istisna deyil. Bunu rəsmi İrəvan artıq bilməlidir. Regionda situasiya Rusiyanın və Ermənistanın əleyhinə işləyir. Rəsmi İrəvan kompromisə gedib işğal etdiyi əraziləri boşaltmalıdır. Yoxsa, hərbi gücün tətbiq edilməsi Ermənistanda siyasi-iqtisadi böhrana səbəb olacaq”.
Vidadi ORDAHALLI
