ABŞ-ın Suriyada Bəşər Əsəd rejiminin dinc insanlara qarşı zəhərli qazdan istifadə etməsi ilə bağlı qərarını yaxın vaxtlarda açıqlayacaq. Tramp administrasiyasının Bəşər Əsəd rejiminə qarşı hərbi əməliyyatlar başlamaq qərarı verəcəyinə artıq qəti gözlə baxılır.
Baki-xeber.com xəbər verir ki, ABŞ artıq hərbi hazırlıqlara da başlayıb. Belə ki, 60 “Tomahawk” raketi daşıyan bir ABŞ destroyeri, Kiprin Larnaka limanından ayrılaraq Suriya sahillərinə yaxınlaşmağa başlayıb. Raket gəmisinin Tartus hərbi hava bazasının 100 kilometrliyində olduğu bildirilir. Bundan başqa, ABŞ “Harry Truman” təyyarə gəmisi qrupunu da Aralıq dənizinə göndərir.
ABŞ-ın, Əsəd rejimini Aralıq dənizindəki gəmilərdən vura biləcəyi təxmin edilir. ABŞ Əsəd rejiminə qarşı əməliyyatlar təkbaşına başlamayacaq. Fransa və İngiltərə də hərbi əməliyyatlarda ABŞ-la birgə hərəkət edəcək. Artıq bununla bağlı tərəflər arasında danışıqlarda da gedir.
“Daily Mail” qəzeti yazır ki, İngiltərə də hərbi əməliyyat hazırlıqlarına başlayıb. İngiltərə Baş naziri Tereza May bununla bağlı parlamentin razılığı olmadan qərar qəbul edə bilər.
“Daily Mail”, İngiltərənin Suriyada rejimə qarşı gözlənilən hərbi əməliyyatlarda “GR4 Tornado” qırıcı təyyarələrindən istifadə edəcəyini yazır. Bu qırıcılar “Storm Shadow” adlı raketlərlə təchiz edilir ki, bu raketlərin də mənzili 240 km-dən çoxdur. Raketlərin uzaqmənzilli olması isə GR4 Tornado döyüş təyyarələrinin Suriyanın havadan müdafiə sisteminə yaxalanmadan əməliyyat keçirməsinə tam imkan verir. Məlumata görə, İngiltərə, döyüş təyyarələrinin vurulması ehtimalına qarşı Suriyanı Cənubi Kiprdəki ingilis bazasından vuracaq, bu bazada 6 GR4 Tornado döyüş təyyarəsi var. Bir başqa hücum variantı isə Suriyanın Aralıq dənizindəki ingilis sualtı gəmilərindən “Tomahawk” raketləri ilə vurulmasıdır.
ABŞ kəşfiyyatı (CIA) və Pentaqon rejimə aid 22 kritik bölgənin xəritəsini hazırlayıb. Vurulacaq hədəflər arasında İran dəstəkli şiə milislərin olduğu strateji nöqtələrdə də var. Bundan başqa Humus və Tartus bölgələrində ABŞ-ın hədəfləri arasında olan iki hərbi bazada rus əsgərlərinin də olduğu bildirilir.
Fransa, İngiltərə, ABŞ və İsrail Suriyada birgə hərəkət edəcəklər. Suriyada rejimə aid hərbi bazalar raketlərlə həhv ediləcək. Ilk öncə başda hərbi aerodromlar olmaqla bütün strateji hədəflər vurulacaq.
Məlumatlara görə, Suriya rejimi hədəf ola biləcək bəzi hərbi bazaları boşaltmağa başlayıb.
Rusiya da Suriyadakı hərbi qüvvələrini raket hücumuna və ya ABŞ-ın digər müdaxilələrinə qarşı hazır vəziyyətə gətirib. Bölgədəki S-400 raketdən müdafiə sistemləri də işə salınıb. Digər tərəfdən ABŞ-ın mümkün müdaxiləsinə qarşı, bölgədəki ABŞ donanmasına məxsus gəmilər və təyyarələrin Rusiya tərəfindən hədəf alınacağı iddia edilir.
