Vüqar Qədirov: “Tehran Azərbaycanın Cənubi Qafqazdakı strateji yerini və rolunu düzgün qiymətləndirir”
İran prezidenti Həsən Ruhaninin Azərbaycana səfəri ekspertlərin ciddi marağına səbəb olub. Hazırda regional və qlobal səviyyədə müşahidə edilən mürəkkəb proseslərin fonunda bu, çox normal qarşılanmalıdır. İki qonşu ölkənin hansı sahələr üzrə ortaq mövqeyə gələcəklərinin əhəmiyyəti böyük idi.
Xüsusilə Ermənistanın qeyri-müəyyən xarici siyasətinin davam etdiyi bir vaxtda İranla Azərbaycan arasında münasibətlərin inkişaf dinamikası aktuallıq kəsb edir. Səfər göstərdi ki, bu istiqamətdə tərəflərin geniş potensialı mövcuddur. Bütün sahələr üzrə əlaqələri inkişaf etdirmək mümkündür. Bununla bağlı konkret sazişlər də imzalandı. Mütəxəssislərin fikrincə, bu proses daha sürətlə gedə bilər.
Qərbin İrana qarşı sanksiyalar tətbiq etdiyi çətin vaxtlarda belə Azərbaycan ona obyektiv və mehriban qonşuluq münasibətini saxladı. Bakı geosiyasi vəziyyətin dəyişməsindən asılı olmayaraq, müstəqil mövqeyini qorudu. Bunun davamı olaraq, ölkələrimiz arasındakı münasibətlər daha dinamik tərzdə inkişaf edir.
Azərbaycanla İranın bugünkü münasibətləri dünya ölkələrinə regional qonşuluğun pozitiv modeli kimi görünə bilərmi?
Politoloq Vüqar Qədirovun sözlərinə görə, iki ölkə arasında ikitərəfli və digər formatlarda davam edən uğurlu regional əməkdaşlıq iqtisadi-siyasi münasibətləri daha da möhkəmləndirir: “Bu münasibətlərin təməlində yüksək səviyyəli qarşılıqlı səfərlər dayanır. Azərbaycan Respublikasının Prezidenti cənab İlham Əliyevin xarici siyasət kursunun əsas prioritet istiqaməti bu cür ikitərəfi münasibətlər formatıdır.Və bu formatın reallaşması nəticəsində bizim qonşu dövlətlərlə, təbii ki, işğalçı Ermənistan istisna olmaqla, münasibətlərimiz ən yüksək səviyyədədir. Rəsmi Tehran da Azərbaycanın Cənubi Qafqazdakı strateji yerini və rolunu düzgün qiymətləndirir, əməkdaşlığın gücləndirilməsinə mühüm diqqət yetirir. Son 4 ildə Azərbaycan-İran əlaqələri xüsusilə inkişaf edib. Bu müddətdə 11 yüksək səviyyəli görüş, 100-dən çox qarşılıqlı səfər həyata keçirilib. İndiyədək 150-dən artıq sənəd imzalanıb.
Azərbaycanın təmkinli, tarixi ənənələri nəzərə almaqla yeritdiyi İran siyasəti olmasaydı, indi bu cür ümidverici vəziyyət yaranmazdı. Tehran beynəlxalq təşkilatlarda Azərbaycanın mövqeyini dəstəkləyir. Eyni zamanda, Bakı da həmişə İranın maraqlarını diqqətə alır. BMT-də İrana qarşı sənəd qəbul edilərkən Azərbaycan əleyhinə səs verdi. Bu addım bir daha qonşu ölkəyə münasibətin səmimi olduğunu göstərdi. Bizim dövlət quruluşlarımız arasında kəskin fərq var. Azərbaycan dünyəvi, İran isə teokratik modelə mənsub olan ölkədir. Buna baxmayaraq, biz yaxın qonşuluq münasibətlərinə, xalqlarımız arasındakı dini, milli yaxınlığa böyük önəm verərək bu münasibətləri normal vəziyyətdə saxlayırıq. Düşünürəm ki, bütün bu amillər regional qonşuluğun pozitiv modeli kimi görünə bilər”.
Məhəmmədəli QƏRİBLİ
