Azər Həsrət: “Sözügedən şəxslər öz hədəflərinə çata bilmədilər”
Son günlər xaricdə yaşayan bəzi mühacirlərin apardığı söyüş kampaniyası ciddi reaksiya və cavablara səbəb olub. Məsələ ondadır ki, son zamanlar xarici ölkələrdə gizlənmiş bir qrup şəxs Azərbaycan əleyhinə çirkin qaralama kampaniyası aparır. Ancaq artıq onlara media və sosial şəbəkələrdə cavablar da verilir.
Avropada oturub dövlət əleyhinə kampaniya aparan şəxslər bir zamanlar zənn edirdilər ki, sosial şəbəkələr yalnız bunların nəzarətində olan sahədir və ora heç kim daxil ola bilməz. Lakin sözügedən bədxahlara qarşı cəmiyyətin müxtəlif formalarda, həmçinin, sosial şəbəkələr üzərindən müqavimət göstərməsi onların tərbiyəsiz qaralama kampaniyasını sarsıdıb. Bunun nəticəsidir ki, əvvəlki günlərə nisbətən söyüş söyənlər azalıb. Düzdür, hələlik sözügedən problem tam aradan qalxmayıb. Yəni hələ də xaricdə oturub bu çirkin kampaniya ilə məşğul olanlar var, amma əvvəlki dinamika yoxdur. Başqa sözlə desək, xaricdən ölkənin milli-mənəvi simvol və dəyərlərini hədəfə alan qüvvələr arasında parçalanma başlayıb. Ən azı bəziləri doğru yolda olmadıqlarını anlayıblar.
Reallıq ondan ibarətdir ki, xaricdə oturan bu oyunbazlar Azərbaycan ziyalılarının mövqeyindən narahat olmağa başlayıblar. Müşahidələr göstərir ki, ziyalılar, ictimaiyyət nümayəndələri, cəmiyyətin bütün təbəqələri öz mədəni səviyyəsinə uyğun olaraq bu hadisələrə mənfi münasibət bildirir və etiraz edirlər. Onların bütün səylərinə rəğmən, cəmiyyət belələrini dəstəkləmir. Hər fürsətdə buna öz etirazını açıq formada bəyan edir. Ona görə də çox keçmədi ki, sözügedən bədxahların çirkab dolu qaralama kampaniyası fiaskoya uğrayır. Məhz onlara göstərilən müqavimət söyüş söyənlərin acınacaqlı duruma düşmələrini sürətləndirir. Bu bir daha onu göstərir ki, onları dəstəkləyən yoxdur. Belə olmasaydı, o zaman onlar bu kampaniyanı daha da genişləndirərdilər. Ancaq baş verənlər göstərir ki, onların çirkin kampaniyası fiaskoya məhkumdur.
Məsələyə münasibət bildirən media eksperti Azər Həsrət onların uğursuzluğa düçar olmalarını bir sıra amillərlə əlaqələndirdi: “Onlar artıq görürlər ki, apardıqları çirkin kampaniya özlərinə qarşı çevrilir. Çünki Azərbaycanda müxalifətçilik etmək normaldır. Bunu cəmiyyət anlayır. Ona görə ki, heç bir fərd ciddi əngəllə qarşılaşmır. Ona görə ki, insanlar öz fikirlərini, mövqelərini azad ifadə etməkdə sərbəstdirlər. İstər hakimiyyətdə, istər müxalifətdə olan və istərsə də bitərəf insanlar müxalifətçilik edənlərə mane olmurlar. Ancaq söyüş kampaniyası aparan, ümumi əxlaqi dəyərlərimizə zidd davranan, Azərbaycanın milli-mənəvi dəyərlərini ayaqlar altına atan, eyni zamanda, dövlətin atributlarına belə sayqısızlıq edən istənilən şəxsə qarşı cəmiyyətdə bir dirəniş var. Belələrinin apardıqları söyüş kampaniyası ona gətirib çıxarıb ki, Azərbaycan cəmiyyəti bu adamların əsl simasını anladı və buna öz etirazını bildirdi. Çünki, ümumilikdə, cəmiyyətin çox öndə gedən kəsimləri, ziyalılar, ayrı-ayrı sənət, peşə sahibləri bu adamlara kəskin reaksiyalar verirlər. Ona görə ki, o söyüşləri eşitmək istəmirlər. Həmin söyüşlərlə efirimizin zibillənməsini istəmirlər. İnsanlarımız özünü ifadənin söyüş formasında təzahürünə qarşıdır və bunu qəbul etmirlər. O üzdən, sözügedən şəxslər bu baxımdan öz hədəflərinə çata bilmədilər. Heç onların buna nail olması da mümkün deyildi. Görünür, anlayırlar ki, belə davam etsələr, ümumiyyətlə gözdən düşəcəklər. Artıq Azərbaycan cəmiyyəti, sadəcə olaraq, onları özündən təcrid etməyə məcbur olacaq. Yəni onların sosial hesablarına blok qoyulacaq, onlarla dostluq edənlər də onlardan imtina edəcəklər. Belə olan halda, həmin adamlar öz fikirlərini cəmiyyətə çatdıra bilməyəcəklər. Bu baxımdan onların bir çoxu artıq anlamağa başlayıb ki, çox yaramaz bir xətt tutublar. Bu xətt artıq onların özlərinə qarşı işləyir”.
Vidadi ORDAHALLI
