Diqqətimi çox cəlb edən daha bir qanadlı fikir tutdum. Prezident Əliyevin daxili və beynəlxalq kürsülərdəki çıxışlarında sətiraltı mahiyyəti, əhatə dairəsi, yönəldiyi hədəfi, kütləyə toparlayıcı təsiri ilə özünü aydın göstərən cəlbedici mülahizələri çox eşidirik. Bir neçə nümunəyə baxmaq olar.
Suriyanın bərpası üzrə London toplantısında Avropaya Yaxın Şərqdən gələn fəlakətlərin qarşısını kəsmək üsullarına işarə edərək, Suriya probleminin daxili həlli tapılmalıdır” deyərkən İlham Əliyev bu ölkəyə kənar hərbi müdaxilələr davam etdikcə bölgədə sülh və rifahın olmayacağını çox dəqiq ifadə etmişdi. Sonuncu Münhen Təhlükəsizlik Konfransında “beynəlxalq təşkilatların öz potensialını gücləndirmək mexanizmi yoxdur” deməsinə BMT Təhlükəsizlik Şurasının qətnamələrinin birmənalı icrasına təminat verən mexanizmlərin yaradılmasına bu gün dünyanın çox böyük ehtiyac hiss etdiyi çağırış kimi baxmaq lazımdır. “Neft və qaz qarşıdurma mövzusundan əməkdaşlıq və təhlükəsizlik mövzusuna çevrlməlidir” deyən Azərbaycan Prezidentinin məhz bu sözlərinin qlobal dünya siyasətinin böyük bir mərhələsi ilə bundan sonra hələ uzun müddət səsləşəcəyinə heç bir şübhə ola bilməz.
Başqa nümunələr də var. Ən yeni “qanadlı fikri” – politoloji mülahizəni isə bu günlərdə cənab Ölkə Prezidentinin şimal-qərb bölgələrimizə səfəri zamanı eşitdik. Rayon sakinlərinin qarşısında sadə el dilində, yaddaşlara yapışan və unudulmaz tərzdə belə dedi: “Ölkəmizin bu günü, gələcəyi üçün heç bir problem görmürəm, heç bir risq, təhlükə yoxdur”. Əslində 10 milyonlu Azərbaycan xalqı bu gün üçün heç bir problemin, qorxunun olmadığını gecənin-gündüzün istənilən saatında qorxusuz-ürküsüz evindən çıxanda, qayıdanda görür, övladının bağça və məktəbdən sağ-salamat qayıtdığına məmnunluqla baxanda görür, kütləvi toplantı yerlərinə hər cür terroru-təxribatı əminliklə istisna edərək daxil olanda görür, dükan-bazarda, metroda, avtobusda, yaşadığı binada, supermarketlərdə - hər yerdə görür. Cənab Ölkə Prezidentinin məlum mülahizəsi cəmiyyətimizin gündəlik həyatda gördüyü, bildiyi gerçəyi ona təkrar xatırlatmaq kimi bəsit kriteriya ilə dəyərləndirilə bilməz. Əvvəla, cəmiyyətimiz cənab Ölkə Prezidentinin dilindən bu gün heç bir problem və təhlükənin olmadığını eşidəndə mütləq şəkildə fərqinə varmağa başlayır ki, ölkədə onun hüzur içində yaşadığı təhlükəsiz mühit Prezidentin məqsədyönlü hədəflərindən biridir, bu elə-belə, öz-özünə yaranmayıb, onun əldə olunması misilsiz əqli-fiziki əziyyətlər, maddi-intellektual resursların sərfi hesabına yaranıb və bunun arxasında bəlli peşəkar personalar dayanır. Cənab Ölkə Prezidenti gələcəkdə də heç bir problem, risq və təhlükənin görünmədiyini deyərkən həm cəmiyyətimizə, həm də dünyaya çox maraqlı mesajlar göndərdi. Sabah dövlətimiz üçün heç bir problemin olmayacağına cənab Ölkə Prezidentinin bu qədər əmin olması isə ilk növbədə cəmiyyətimiz üçün çox vacib və önəmlidir.
Əslində cəmiyyət dövlətimizin sabahkı daxili mənzərəsini tam şəkildə görə bilmir və bilməz də. O ancaq bu gün yaşadığı reallıqları görür. Sabah hansı reallıqlarla üzləşə biləcəyini tam şəkildə görən tək bir persona cənab Ölkə Prezidentidir. Bunu görmək onun üçün bir uzaqgörənlik nümayişi olmaqla yanaşı, həm də vəzifə borcudur. Halbuki, bu borcu heç də bütün ölkələrin prezidentləri ləyaqətlə yerinə yetirə bilmir. Sadə misal: əgər Sarkisyan 2008-ci ildə indiki şikəst siyasətilə Ermənistan dövlətinin başına keçəndə cəmi 9 il sonra ölkə əhalisinin üç yüz min nəfər (!) azalacağını görə bilsəydi, ölkəsinin sonu görünməyən fəlakətə yuvarlandığını əvvəlcədən proqnoz etsəydi, bəlkə də başqa yol tutardı... Başqa ölkələrin də timsalında çoxlu belə nümunələr gətirmək olar.
Göründüyü kimi, Azərbaycan Prezidenti ölkəsinin sabahı ilə bağlı öz xalqına dəqiq və inamlı mənzərə təqdim etməkdə yalnız tək-tək ölkələrin başçılarına xas nümunə göstərir və bu yöndə onun dedikləri xalq üçün də, dünya müşahidəçiləri üçün də çox vacibdir. Cənab Ölkə Prezidenti sabah da Azərbaycanda heç bir problemin, risq və təhlükənin olmayacağını əminliklə deyərkən bir sıra ciddi əsaslara söykənir. Ona söykənir ki, Azərbaycanın xarici siyasəti balanslı və stabil müstəvidə qurulduğu üçün ölkənin müttəfiqləri və dostları daha çox və güclüdür, nəinki düşmənləri... Ona söykənir ki, ölkənin güc strukturları qarşıya qoyulmuş hədəfləri və vəzifələri aydın dərk edir... Ona söykənir ki, xalqın mütləq əksəriyyəti Prezidentin siyasətini başa düşür, müdafiə edir. O, ölkədəki indiki sabitliyə əvəzsiz bir dəyər kimi baxır və onu heç bir maddiyyatla dəyişmək fikrində deyil. Deməli, cənab Prezident Azərbaycanın sabahkı mənzərəsinə yönəlik bir mülahizəsi ilə hamıya müsajladı ki, ölkənin xarici siyasət ideologiyası dəqiqdir, sərhədlərinin təhlükəsizlik təminatı yetərlidir, xalqla hakimiyyət arasında anlaşıqlı mühit var. İstisnasız olaraq bütün politoloqlar və geostrateqlər qəbul edir li, bu üç şərtin bir arada olduğu ölkənin sabahı üçün həqiqətən heç bir problem və ya risq ola bilməz. Qürurvericidir ki, Azərbaycan Prezidenti ölkənin sabahını müəyyənləşdirən bu üç şərti aydın görür və tənzimləyir. Azərbaycanın nə qədər mürəkkəb və ziddiyyətli regionda yerləşdiyini hamı bilir. Heç kəs də şübhə etmir ki, belə mürəkkəb regionda yerləşən ölkənin sabitliyini və təhlükəsizliyini müəyyən edən həmin üç şərti bir arada tutmağı hər prezident bacarmaz. Dünyanın superdövlətlərinin – ABŞ-ın, Rusiyanın, İngiltərənin, Almaniyanın, Fransanın, Çinin, Yaponiyanın, başqalarının dövlət başçılarının öz ölkələrinin sabahı üçün indiyədək belə qətiyyətli təhlükəsizlik qarantiyası verdiyinin şahidi olmamışıq. Təsəvvür edirsinizmi ki, istəsə (?), öz nüvə, raket arsenalı ilə bütün dünyanı məhv etmək gücündə olan ABŞ, Rusiya, İngiltərə və s. rəhbərləri ölkəsinin sabahkı təhlükəsizliyinə bu qədər əminliklə təminat verə bilmir?! Yox ki, onlar öz xalqlarına belə qarantiyalar vermək istəmirlər. İstəyirlər, bunu hər bir prezident istəyər. Ancaq verə bilmirlər, çünki Azərbaycanın bu gün “politoloji triada” kimi parlaq şəkildə nümayiş etdirdiyi üç təhlükəsizlik şərtini eyni vaxtda bir arada sona qədər tuta biləcəklərinə əmin deyillər... Azərbaycan Prezidentindən fərqli olaraq...
Aydın QULİYEV
