Elşən Mustafayev: "Orada dövlət dilinin rus dili olmasına ciddi zərurət yoxdur"
Rusiya Dövlət Dumasının spikeri Vyaçeslav Volodin Ermənistan hakimiyyətinə respublika qanunvericiliyində rus dili üçün rəsmi statusun təsbit olunmasını təklif edib. Onun sözlərinə görə, bu, milli sürücülük vəsiqələrinin Rusiya ərazisində tanınmasına yardım edəcək. 2017-ci il iyunun 1-dən Rusiyada xarici sürücülük vəsiqələri ilə sürücülərə ölkə ərazisində fəaliyyət göstərməyi qadağan edən qanun qüvvəyə minib.
"Yalnız onu deyə bilərəm ki, rus dilini rəsmi dil olaraq qanunvericilikdə təsbit edin, yalnız o zaman qanun norması Ermənistan Respublikasını da əhatə edəcək", - V.Volodin Ermənistan parlamentinin sədri Ara Babloyanla görüşdə bildirib.
Çox maraqlıdır ki, bu təklifə Ermənistan prezidenti tərəfindən reaksiya verilməyib. Normal ölkənin başçısı bu məsələyə necə reaksiya verməlidir?
Ekspert Elşən Mustafayev qəzetimizə bildirdi ki, Rusiya Dövlət Dumasının spikeri V.Volodin Ermənistan hakimiyyətinə respublika qanunvericiliyində rus dili üçün rəsmi statusun təsbit olunmasını təklif edib: "Spiker bu təklifi Ermənistan qarşısında şərt kimi qoyub və Ermənistan Rusiyanın bir əyalətinə çevrilməyincə məsələdən yan keçməyəcəklərinə işarə edib. O deyib ki, Ermənistanda rus dilinin rəsmi status qazanması milli sürücülük vəsiqələrinin Rusiya ərazisində tanınmasına yardım edəcək. Bu məsələ Rusiyanın imperiya siyasətinin tərkib hissəsi olaraq qəbul edilməlidir. Artıq bu günə qədər Ermənistan özünün iqtisadi, siyasi, hərbi yöndə bütün müstəqilliyini, demək olar ki, Rusiyaya təhvil verib. Ona görə də Ermənistanın bütün siyasi çevrələri də etiraf edir ki, müasir Ermənistan, demək olar ki, Rusiyanın vassalına çevrilib, bir rus əyalətindən seçilmir. Yeganə qalan məsələ bu gün Ermənistanda rus dilinin dövlət dili olmamasıdır ki, bu da Azərbaycanın hərbi təzyiqləri fonunda Ermənistan geri çəkildiyi təqdirdə məcburi vəziyyətdə bunu da qəbul edəcək. Yəni Volodinin dedikləri qətiyyən təsadüfi deyil. Təbii ki, bununla Rusiya Ermənistanı tam şəkildə ekspansiya etmək istəyir. Sarkisyanın buna cavab verməyə isə cürəti çatmır. Çünki Rusiyadan tam asılıdır. Normal ölkənin başçısı bu cür aşağılayıcı təklifə etiraz edərdi. Çünki hazırda Ermənistan monoetnik bir ölkəyə çevrilib. Orada dövlət dilinin rus dili olmasına ciddi zərurət yoxdur. Rusiya bunu öz işğalını dolayısı ilə sübut etmək üçün təklif edir".
Məhəmmədəli QƏRİBLİ
