Aqşin Əliyev: "Praktika göstərir ki, Rusiya belə fəallıqları digər həmsədrlər və ya beynəlxalq qurumlar aktivləşəndə edir"
Azərbaycan və Ermənistan xarici işlər nazirlərinin son görüşündən sonra prezidentlərin görüşü barədə razılıq əldə edilib. Rusiyanın bu məsələdə xüsusi aktivliyi nəzərə çarpır. Hətta Kremlə yaxın olan media orqanları və politoloqlar mövzunu gündəmdə saxlamaqla yanaşı, həm də Moskvanın əsas vasitəçi olmaq cəhdlərini geniş müzakirə edir.
Rusiyanın bu təşəbbüsü hansısa nəticə verə bilərmi?
Ekspert Aqşin Əliyev qəzetimizə bildirdi ki, Qarabağ problemini yaradan və onu istədiyi kimi idarə edən Rusiya və Ermənistandır: "Bu iki dövlətin strateji ortaqlığı var və Rusiyanın imperiya ambisiyaları davam etdikcə, Ermənistan öz iddialarından imtina etməyəcək. Rusiyanın ortaya qoyduğu nizamlama təşəbbüsləri heç vaxt Azərbaycan xalqının maraqlarına uyğun olmayıb və olmayacaq. Problemin həllinə indiki yanaşma dəyişməsə, hələ uzun illər Qarabağ probleminə görə əhalisi əziyyət çəkən, itkilər verən ölkə Azərbaycan olacaq. Reallıq budur ki, erməni-rus hərbi birləşmələri ərazilərimizi birlikdə işğal edib və öz şərtlərini diktə edir. Status-kvonun bu şəkildə davam etməsindən nə beynəlxalq sülhyaratma missiyası, nə də Ermənistan narahatdır. Ermənilər işğal etdikləri ərazilərimizdə məskunlaşma həyata keçirir və bir gün də bu faktı Azərbaycana qəbul etdirəcəklərinə ümid edir. Təəssüf ki dünyada onları şirnikləndirən belə nümunələr az deyil.
Rusiya bu təşəbbüsü ilə hər iki tərəfin xalqları ilə yanaşı, həm də beynəlxalq ictimaiyyətə də mesaj verir. Problemin açarının onda olduğuna işarə vurmaqla bu ölkələrin daxili siyasətinə də yön verə bilir. Rusiya heç vaxt Qarabağla bağlı Ermənistana gerçəkdən təzyiq etməz və bu onun hazırkı maraqlarına qətiyyən uyğun deyil. Ermənistanla razılaşmaqla sadəcə olaraq belə görüntü yarada bilərlər ki, guya erməni tərəfinə hansısa təzyiq göstərilir. Bu baxımdan da Rusiyanın vasitəçilik missiyasında son aktivliyi öz maraqlarının təmin olunmasına hesablanıb. Problemin həll edilməsi formulu isə Rusiya üçün olduqca sadədir. Təəssüf ki, biz Rusiyanın Ermənistana və konfliktə münasibətində belə işartıları görmürük. Praktika göstərir ki, Rusiya belə fəallıqları digər həmsədrlər və ya beynəlxalq qurumlar aktivləşəndə edir. Bir sözlə, prosesi öz monopoliyasından çıxarmaq istəmir".
Məhəmmədəli QƏRİBLİ
