Ramiz Tağıyev: "Ona sübut ediblər ki, siyasətçi fikirlərini şantaj formasında ifadə etməz"
Ermənistan prezidenti Serj Sarkisyan özünü çox pis duruma salıb. O, "R-Təkamül" proqramına müsahibəsində bildirib ki, ölkəsinin daxili rəyində "Rusiya ilə əməkdaşlığı kəsək" kimi ifadələr Ermənistan üçün ağır nəticələrə səbəb ola bilər: "Onda biz gedib NATO və ya Türkiyə ilə əlaqə saxlayaq?".
Ermənistanın ictimai rəyində prezidentin bu açıqlaması bomba effekti verib. Tanınmış şərhçilər bildirir ki, heç kim Sarkisyana Rusiya ilə əlaqəni kəsməklə bağlı təklif verməyib: "O bu cür açıqlaması ilə siyasi diletant olduğunu sübut edir. Biz sadəcə deyirik ki, Rusiya ilə münasibətlər bərabərhüquqluluq zəminində olmalıdır".
Sarkisyanın özünü pis vəziyyətə salması nədən irəli gəlib?
Siyasətçi Ramiz Tağıyev qəzetimizə açıqlamasında bildirdi ki, Sarkisyanın özünü bu şəkildə itirməsi Rusiyadan bərk qorxması ilə bağlıdır: "Ermənistan adlı dövlət faktiki olaraq yoxdur. Həmin ölkə Rusiyanın vassalı rolunu oynayır. Bunu hamıdan gözəl elə Sarkisyanın özü bilir. Bununla o, ölkəsini Rusiyanın əlaltısına çevirdiyinə haqq qazandırmaq istəyir. Ancaq bunu çox primitiv formada, yəni Ermənistan cəmiyyətini şantaj etməklə həyata keçirir. Demək istəyir ki, yəni biz siyasi oriyentasiyamızı dəyişib NATO və ya Qərbə doğru kurs götürsək Rusiya bizi əzər. Onun bu fikirləri təbii ki, birmənalı qarşılanmayacaqdı. Çünki bəllidir ki, Ermənistanın daxilində Qərbi istəyən qüvvələr çox fəaldır. Onlar məhz məsələyə diplomatik tərzdə yanaşaraq Sarkisyanı, necə deyərlər, dilindən tutublar. Ona sübut ediblər ki, siyasətçi fikirlərini şantaj formasında ifadə etməz. Rusiyanın regiona təsirini hamı anlayır. Həmin ölkə ilə Azərbaycan da yaxın qonşuluq münasibəti saxlayır. Amma bu bərabər əsaslarla, yaxın qonşuluğa söykənən əməkdaşlıqdır. Ermənistanın Rusiya ilə hansı formada əməkdaşlıq etməsi isə elə Sarkisyanın ritorikasından bəllidir".
Məhəmmədəli QƏRİBLİ
