Məhəmməd Əsədullazadə: "Türkiyə S-400 raketlərini əldə edib istehsal edərsə, təbii ki, Azərbaycana belə bir kompleksin verilməsi reallaşar"
Azərbaycanın müdafiə naziri Zakir Həsənovun Ermənistanın qürrələndiyi "İsgəndər" raket kompleksini məhv etmək gücünə malik silahlarımızın olması haqda dedikləri İrəvanda təşvişlə müzakirə edilir. Belə ki, Azərbaycanın silah arsenalında olan "Favorit" S-300PMU-2 və "Barak 8" raket sistemləri "İsgəndər"in qarşısını almaq gücündədir.
Ermənistanda prezident Serj Sarkisyan da daxil olmaqla, müxtəlif dairələrin verdiyi reaksiyalar bu baxımdan təsadüfi deyil.
Digər tərəfdən, Ermənistandakı "İsgəndər"lərin erməni hərbi birləşmələrinin arsenalına daxil olmadığı, Rusiyanın Gümrüdəki 102-ci hərbi bazasının tərkibində olduğu, həmçinin, Moskvanın bu raket komplekslərini İrəvana verməsinin arxasında siyasi məqsədlərin mövcudluğu şübhəsizdir. Bunu ermənilərin özləri də etiraf edir.
Erməni siyasi şərhçi Sarkis Artsruni yazır ki, "İsgəndər"lər, faktiki olaraq, Ermənistan silahlı qüvvələrinin tərkibinə daxil deyil: "Yalnız formal olaraq bizim balansımızdadır. Sabah bu raket kompleksinin tətbiqi gündəmə gələrsə, mümkün olmayacaq. Kalininqradda olduğu kimi, Ermənistanda da "İsgəndər"lərin istifadəsi ilə bağlı əmri yalnız Putin verə bilər".
S.Artsruni qeyd edir ki, "İsgəndər"lər yalnız mifdir.
Ermənistanı qorxuya salan digər məqam isə Rusiyanın Azərbaycana S-400 raket müdafiə sistemlərini verəcəyidir. Bu qorxunun mənbəyi Türkiyə və Rusiya arasında S-400-lərin alınması ilə bağlı sazişin imzalanmasıdır.
Siyasi şərhçi Akop Badalyan yazır ki, Türkiyə Rusiyadan aldığı iki divizion S-400-ün birini Azərbaycana verə bilər: "Türkiyə bu raket kompleksini Azərbaycana məhz "İsgəndər"lərdən müdafiə üçün verə bilər. Əslində, bu, Moskvanın razılığı ilə baş tutacaq məsələdir. Ermənistana "İsgəndər" verən Rusiya Azərbaycana da S-400 verərək, münasibətləri qoruyur və bunu Türkiyə vasitəsilə edir", - deyə o qeyd edib.
Maraqlıdır, Türkiyə S-400 raketlərini Azərbaycana sata bilərmi? Sözügedən məsələni "Bakı-Xəbər"ə şərh edən politoloq Məhəmməd Əsədullazadə bunu istisna etmədi: "Rusiya ilə Türkiyə arasında S-400 zenit raket komplekslərinin satılması haqqında müqavilə, demək olar ki, hazırdır. Dörd partiya və qiyməti 2.6 milyard dollar olan zenik raket komplekslərinin iki batareyası veriləcək. Digər iki partiyanın isə Türkiyədə yığımı nəzərdə tutulur. Türkiyə və Rusiya arasında analoqu olmayan belə bir raketlərin alqı-satqısı və birgə istehsalı barədə müqavilə iki ölkə arasında münasibətlərin yüksək səviyyədə olduğunun göstəricisidir. Görünür, iki ölkə lideri bundan sonra dərin əməkdaşlıq barədə qərar verib. Türkiyə bu sistemləri əldə etməklə özünün havadan müdafiə sistemini təkmilləşdirəcək və milli istehsalını artıracaq. Həmçinin, Türkiyənin ABŞ-dan ala bilmədiyi "Patriot" raketlərinə alternativ raketlər əldə etmiş olması, NATO çərçivəsində Türkiyəni nə qədər yalnız buraxıldığı ortadadır. Türkiyə-Rusiya yaxınlaşması ilk növbədə Qərbin Türkiyəyə qarşı kirli siyasətinin nəticəsidir. Türkiyə S-400 raketlərini əldə edib istehsal edərsə, təbii ki, Azərbaycana bu komplekslərin verilməsi reallaşar. Hazırda isə bu mümkün deyil. Azərbaycan yalnız Rusiyadan ala bilər. Türkiyənin milli raket proqramının inkişafı Azərbaycanın milli maraqlarına cavab verir. Türkiyə hər zaman Azərbaycanı S-400-lə təchiz etməyə hazır olar".
Vidadi ORDAHALLI
