Qabil Hüseynli: "Məhz bu cür ərköyünlük Sarkisyanı hətta həmsədrləri şərləməyə vadar edir"
Serj Sarkisyan "Ermənistan" telekanalının "R-Təkamül" proqramına müsahibəsində prezidentlərin gözlənilən görüşü haqda danışarkən müharibəyə səbəb olacaq ritorikadan da istifadə edib.
Sarkisyan heç bir variantda geri çəkilməyəcəklərini bildirib: "Biz davamlı olaraq güzəştlər haqda danışırıq, lakin münaqişə daha 20 il də həll olunmasa, yenə də geri çəkilməyəcəyik". O, Ermənistanın hədəflərini açıqlayıb və qeyd edib ki, "öz müqəddəratını təyin etmə" prinsipini əsas götürürlər:"İkinci şərt kimi Dağlıq Qarabağla Ermənistanın quru sərhədlərinin olması məsələsi qoyulmalıdır. Bu iki mövqe bizim üçün əsasdır. Üçüncü şərt isə Dağlıq Qarabağda təhlükəsizliyin etibarlı təminatı məsələsi olmalıdır. Bu prinsiplər haqda sənədin tərtib edilməsində Dağlıq Qarabağın (qondarma "DQR" rejimi) iştirak etməsi məcburidir".
Sarkisyan həmin müsahibəsində bir az da irəli gedərək, dünyanın adından yalan danışıb. Qeyd edib ki, guya ATƏT-in Minsk Qrupu da bilir və etiraf edir ki, atəşkəs rejimini hər zaman Azərbaycan pozur. Sarkisyanın bütün dünyanı belə primitiv yalanla aldadmaq cəhdinin arxasında nə dura bilər?
Politoloq Qabil Hüseynli qəzetimizə bildirdi ki, Sarkisyanın bu tip məsuliyyətsiz bəyanatlarının konkret hədəfi var:
"O istəyir ki, indidən prezidentlərin nəzərdə tutulan görüşündə əldə ediləcək hər hansı razılaşma ilə bağlı inamsızlıq toxumu səpsin. Hərçənd, Ermənistan tərəfinin məhz belə qeyri-konstruktiv mövqeyi nəticəsində uzunillik danışıqlarda heç bir nəticə əldə olunmayıb. Bu cür ritorika ilə Sarkisyan müharibə variantını yenidən gündəmə gətirir. Çünki faktiki olaraq o, həmsədrləri də zərbə altında qoyur və bundan çəkinmir. Mən həmsədrlərin elə bir bəyanatına rast gəlməmişəm ki, onlar atəşkəsin pozulmasında konkret olaraq Azərbaycanı günahlandırsın. Əksinə, biz dəfələrlə həmsədrləri daha korrekt olmağa çağırmışıq ki, bəyanatlarda bizimlə Ermənistanın adını birgə çəkməsinlər. Çünki cəbhə xəttində baş verən hadisələrdə bizim məsuliyyətimiz eyni ola bilməz. Təəssüf ki, onlar bunu etmir. Ancaq Azərbaycanın adının atəşkəsi pozan tərəf kimi tək çəkilməsilə bağlı fikirlər ağ yalandır. Bəlkə həmsədrlər bunu Sarkisyana bağlı qapılar arxasında deyib. Belə deyilsə, həmsədrlər bu məsələyə mütləq mənada cavab verməlidir. Çünki Sarkisyanın məlum açıqlaması ilk növbədə həmsədrlərin tərəfsizliyini şübhə altına salmış olur. Təəssüf ki, bəyanat veriləndən sonra biz onlardan hansısa reaksiya görmürük. Məhz bu cür ərköyünlük Sarkisyanı hətta həmsədrləri şərləməyə vadar edir. Biz ATƏT-dən bu məsələyə mütləq mənada münasibət bildirməsini tələb etməliyik. Çünki bu bəayanatı küçədən keçən biri verməyib, Ermənistan adlı ölkənin prezidenti səsləndirib".
Məhəmmədəli QƏRİBLİ
