Elşən Mustafayev: "Rəsmi Moskva Sarkisyanı bu sərsəm açıqlamaya görə..."
Ermənistan prezidenti Serj Sarkisyan "Ermənistan" televiziyasının "R-Təkamül" proqramına müsahibəsində Rusiya silahının Azərbaycana satılmasını şərh edərək bildirib ki, Rusiya buna görə cavab verməlidir:
"Bu, Ermənistan-Rusiya dostluğu, Ermənistan-Rusiya hərbi əməkdaşlığı, ümumilikdə bizim əlaqələrimizdə ən ağrılı problemdir. Bu məsələ çox şeyə kölgə salır. Lakin digər tərəfdən mövcud şərait anlayışı var. Ola bilsin ki, bu vəziyyət bizim üçün yolverilməzdir, amma onlar üçün yolveriləndir. Hələlik ciddi nəsə baş verməyib. Nə vaxtsa bunun ciddi nəticələri olsa, onda ittiham etmək olar. Bunun ciddi nəticələri olmasa, onda biz bunu Rusiyanın regionda vəziyyəti sabitləşdirmək üçün apardığı uzunmüddətli siyasət kimi dəyərləndirməliyik".
Sarkisyan eyni zamanda qeyd edib ki, heç vaxt Moskvanın rəsmi cavabını eşitməyib və hesab edir ki, Rusiya Ermənistana cavab verməlidir: "Rusiya siyasətçisi və ya analitik və ya hər hansı bir vəzifəli şəxs nəsə deyirsə, bu, Rusiya tərəfinin cavabı olması anlamına gəlmir. Rusiya tərəfindən prezident, XİN rəhbəri bunu cavablandırmalıdır. Rəsmi cavab olmalıdır".
Sarkisyanın bu məsələdə Rusiyadan izahat tələb etməsi nədən xəbər verə bilər?
Ekspert Elşən Mustafayevin sözlərinə görə, Sarkisyanın məlum açıqlaması çox ziddiyyətlidir: "Əvvəl etiraz edir, sonra Rusiyanın hərəkətini malalamağa çalışır, ardınca isə Moskvadakı rəsmilərdən izahat tələb edir. Sarkisyan bu məsələdə də dövlət adamı kimi danışmayıb. Çünki mühüm dövlət adamları verdikləri bəyanatların fərqində olmalıdır. O qeyd edir ki, Rusiya indiyə kimi Azərbaycana silah satışı ilə bağlı hansısa rəsmi izahat verməyib. Ağ yalandır. Çünki bir müddət əvvəl Putin Moskvada keçirilən mətbuat konfransında erməni jurnalistin məhz bu mövzu ilə bağlı ünvanladığı suala çox sərt formada cavab verdi və bildirdi ki, bu, kommersiya maraqlarından irəli gəlir, ölkəsi kimə silah satıb-satmamaqla bağlı hesabat verməyə borclu deyil. Rusiya onsuz da Ermənistanı ciddi şəkildə dəstəkləyir. Bunu Sarkisyan hamıdan yaxşı bilir. Görünür, arxayınçılıq keçirən Sarkisyan indi də Rusiyanın daxili işlərinə qarışır. Sarkisyanın Putindən izahat tələb etmək cürəti ola bilməz. Yəqin ki, həmin fikri işlədəndə anlaqlı vəziyyətdə olmayıb. Çünki özü forpost olan ölkə yiyəsinin üzünə ağ ola bilməz. Rusiyanın Azərbaycana silah satması heç də Ermənistanı ayaq altına atması anlamına gələ bilməz. Moskva buna qazanc mənbəyi kimi baxır. Bir faktı da qeyd edək ki, Azərbaycan silah-sursatı yalnız Rusiyadan almır. Bizim kifayət qədər alternativ variantlarımız var. Yəqin ki, rəsmi Moskva Sarkisyanı bu sərsəm açıqlamaya görə yerində oturdacaq".
Məhəmmədəli QƏRİBLİ
