Məhəmməd Əsədullazadə: "Erməni ictimaiyyətində bir daha özünün güzəştsiz obrazını yaratmaqla növbəti ildə baş nazirliyə getmək istəyini formalaşdırır"
"Ermənistan tərəfi hər zaman Qarabağ probleminin həllində güzəştlər deyil, kompromislərin zəruriliyini bəyan edib". Yayılan məlumata görə, bunu yerli telekanallara müsahibəsində Ermənistan prezidenti Serj Sarkisyan deyib.
Onun sözlərindən belə məlum olub ki, Dağlaq Qarabağ münaqişəsinin tənzimlənməsi ilə bağlı danışıqlarda hər hansı güzəştdən söhbət gedə bilməz: "Son 20 il ərzində heç bir yerdə və heç zaman güzəştlər barədə danışmamışıq. Hər zaman problemin kompromisli həlli variantını bəyan etmişik və bəyan etməkdə də davam edirik".
Onun fikrincə, bundan sonra da Ermənistan danışıqlarda güzəştə getməyəcək: "Əminəm ki, məsələ daha 20 il müddətində həllini tapmasa belə, o zaman da Ermənistan tərəfində vəziyyətin yumşaldılması üçün güzəştə getmək istəyi yaranmayacaq, belə ki, bu, həllə gətirib çıxara bilməz". Bunu Sarkisyan "Ermənistan" telekanalının "R-Təkamül" verilişinə müsahibəsində bildirib.
Ermənistan prezidentinin bu cür fitnəkar açıqlaması bəri başdan aparılan danışıqlara kölgə salmaq anlamına gəlir. Eyni zamanda, qarşı tərəfin status-kvonu dəyişməkdə maraqlı olmamasından xəbər verir. Sözügedən məsələni "Bakı-Xəbər"ə şərh edən politoloq Məhəmməd Əsədullazadənin sözlərinə görə, Ermənistan prezidenti S.Sarkisyanın verdiyi müsahibədə Qarabağ münaqişəsinin nizamlanması prosesi üzrə qeyri-konstruktiv mövqeyini ifadə etməsi ilk növbədə payızda gözlənilən danışıqlara gölgə salır: "Ermənistan prezidenti S.Sarkisyan verdiyi müsahibədə payızda Prezident İlham Əliyevlə görüşünün ola biləcəyini qeyd etsə də, indidən öz qeyri-konstruktiv mövqeyini nümayiş etdirir. Sarkisyanın belə açıqlamaları ilk növbədə daxili auditoriyaya hesablansa da, barışcıl mövqe deyil və cəbhədə istənilən toqquşmalara yol aça bilər. Bu kimi manipulyasiya Kremlin marioneti Sarkisyanın əleyhinə işləyir. Erməni ictimaiyyətində bir daha özünün güzəştsiz obrazını yaratmaqla növbəti ildə baş nazirliyə getmək istəyini formalaşdırır. ATƏT-in Minsk Qrupu həmsədrlərinin iştirakı ilə XİN rəhbərlərinin görüşündə danışıqların aparılması üçün razılıq əldə olunmasına baxmayaraq, Ermənistanın bu kimi bəyanatları proseslərə mənfi təsir edir. Ermənistanda hakimiyyətdə olan müharibə partiyası məhz Qarabağ münaqişəsindən istifadə edərək hakimiyyəti mənimsəyib. Ona görə də Sarkisyan klanından danışıqlar yolu ilə güzəşt qoparmaq mümkün olmayacaq. Yalnız Rusiya ciddi təsir edib Ermənistanı güzəştli sülhə məcbur edə bilər. Həmçinin, ölkəmizin sərt hərbi təzyiqi sayəsində bu mümkün ola bilər. Hesab edirəm ki, payızda aparılması nəzərdə tutulan danışıqlarda ciddi irəliləyiş gözlənilmir. Azərbaycan Ermənistana təzyiq etməklə müəyyən qədər irəliləyişə nail ola bilər".
Vidadi ORDAHALLI
