Elşən Həsənov: "Ancaq son nəticədə onun qoyduğu bu şərt alınmadı və Ermənistan yenidən danışıqlara qayıtdı"
2016-cı ilin iyun ayından Ermənistan bütün görüşlərdən qaçırdı. Ermənistan xarici işlər naziri açıq şəkildə Hamburq və Münhendə öz iştirakını yalnız ATƏT-in Minsk Qrupunun həmsədrlərinin iki ölkənin xarici işlər naziri üçün təşkil etdiyi şam yeməyi ilə məhdudlaşdırırdı.
Prezidentlərin Vyana və Sankt-Peterburq görüşlərində müzakirə olunan məsələlərin mahiyyəti ondan ibarət oldu ki, insidentlərin araşdırılması mexanizmi, humanitar məsələlər və münaqişənin həlli üzrə substantiv danışıqlar paralel və sinxron şəkildə aparılmalıdır. Substantiv danışıqların əsas elementi olaraq mövcud status-kvo dəyişdirilməli və Ermənistan qoşunlarının Azərbaycanın işğal olunmuş ərazilərindən mərhələli şəkildə çıxarılması təmin edilməlidir. Lakin Ermənistan prezidenti Serj Sarkisyan İspaniyanın EFE agentliyinə müsahibəsində substantiv danışıqlara başlamaq üçün şərt qoyduğunu bildirib.
Ancaq xarici işlər nazirlərinin Brüsseldə keçirilən son görüşündən sonra bəlli oldu ki, Ermənistan sülh danışıqlarına qayıtmağa məcbur qalıb.
Ermənistan sülh danışıqlarına qayıtmaq üçün hansı şərtləri qoyurdu və Azərbaycan onları hansı şərtlərdən imtina etməyə məcbur etdi?
Ekspert Elşən Həsənovun sözlərinə görə, Ermənistanın şərtləri keçərsiz oldu: "Ermənistan-Azərbaycan, Dağlıq Qarabağ münaqişəsinin həlli üzrə substantiv danışıqlara başlamağa Ermənistan tərəfindən dövlət başçısı səviyyəsində qeyd-şərtin qoyulması qəsdən danışıqların pozulması, boykot və şantaj demək idi. Danışıqlara başlamaq üçün hər hansı şərtin irəli sürülməsi qəbuledilməzdir və ümumiyyətlə, münaqişənin həlli üzrə bütün baza sənədlərinin mahiyyətinə və ruhuna ziddir.
Ermənistan substantiv danışıqlara getməkdən yayınmaq üçün davamlı şəkildə siyasi-hərbi təxribatlara əl atırdı. Bütün bunlar açıq şəkildə onu göstərirdi ki, Ermənistan Azərbaycan ərazilərinin ilhaqı siyasətini yürüdür və hər bir vəchlə işğalı saxlamağa və möhkəmləndirməyə çalışır. Bunun müqabilində insidentlərin araşdırılması kimi texniki məsələni gündəmə gətirmək və substantiv danışıqları texniki məsələnin girovuna çevirməklə, Ermənistanın güddüyü təhlükəli məqsəd işğala əsaslanan mövcud status-kvonu saxlamağı hədəfləyirdi. Ancaq son nəticədə onun qoyduğu bu şərt alınmadı və Ermənistan yenidən danışıqlara qayıtdı. Ancaq bu da məsələni tam həll etmir. Danışıqlar prosesində konstruktivlik olmasa, biz müharibə variantı ilə üzləşməli olacağıq".
Məhəmmədəli QƏRİBLİ
