Üzeyir Cəfərov: "Bunları geniş işıqlandırmalıyıq ki, həm düşmən başa düşsün, həm də onun havadarları vəziyyətin hansı səviyyədə olmasını anlasın"
Azərbaycan Silahlı Qüvvələri Ermənistanda yerləşdirilən "İsgəndər" komplekslərinin raketlərini vura biləcək silahlara malikdir.
Məlum olduğu kimi, bunu RİA "Novosti" agentliyinə müsahibəsində Azərbaycanın müdafiə naziri Zakir Həsənov deyib: "Mən müdafiə naziri olaraq bəyan edirəm ki, biz bu raketləri vura bilərik. Bizdə həmin raketlərin sayı 50 dəfə çoxdur. Sözlərimə görə tam məsuliyyət daşıyıram. Əgər onlar həmin silahı tətbiq etsələr, təsəvvür edin, infrastruktur və hərbi obyektlərə cavab atəşi necə olacaq?!".
Nazirin sözlərinə görə, dünyada qoşunların yeridilməsinin bir neçə taktikası mövcuddur: "İsgəndər" yaxşı raketdir. Lakin bir neçə məsələ var. Birincisi, "İsgəndər"in bir çox növü var. İkincisi, həmin "İsgəndər" hansı vəziyyətdədir? Üçüncüsü, bu "İsgəndər"i kim idarə edir? Dördüncüsü, onu tətbiq etməyi bacaracaqlarmı? Biz hərbçi kimi, hər zaman ən pis varianta baxırıq, buna hazırıq. Sizə yuxarıda bəhs etdiyim raketlər Rusiyadan alınmayıb, amma keyfiyyətcə geri qalmır. Sizə deyə bilərəm ki, vəziyyəti modelləşdirib döyüş atışları həyata keçirmişik. Nəticə əladır! Bu gün biz əminik ki, yaşayış məntəqələrimizi və Silahlı Qüvvələrimizi müdafiə edə biləcəyik".
Ermənistan ötən ilin ortalarında "İsgəndər" raketlərini nümayiş etdirərək danışıqlarda daha aqressiv mövqe tutdu. Onlar belə hesab edirdilər ki, həmin raketlərə görə guya Azərbaycan qorxacaq. Ancaq bunun tam əksinə olaraq Azərbaycan danışıqlarda prinsipial mövqeyindən bir addım da olsa geri çəkilmədi. Bütün bunlarla yanaşı, Zakir Həsənovun məlum bəyanatının nə kimi əhəmiyyəti var? Məsələyə münasibət bildirən hərbi ekspert Üzeyir Cəfərovun sözlərinə görə, bu açıqlamanın əhəmiyyəti böyükdür: "Əvvəla Z.Həsənovun müsahibəsi çox uğurlu müsahibədir. Çünki həmin müsahibədə həm düşmənə, həm də beynəlxalq qurumlara, o cümlədən ATƏT-in Minsk Qrupunun həmsədri olan Rusiyaya mesajlar ünvanlanıb. Mesaj ondan ibarətdir ki, Rusiyanın xahişi ilə Azərbaycan hücumu dayandırdı. Ancaq Rusiya Ermənistanı danışıqlarda kompromislərə məcbur etmədi. Hesab edirəm ki, bunun özü çox önəmli məqamdır. Digər tərəfdən, ötən ildən başlayaraq Ermənistan tərəfi hər addımbaşı Azərbaycanı "İsgəndər" raketləri ilə hədələyirdi. Z.Həsənov da çox düzgün olaraq bəyan etdi ki, həmin raketlərə qarşı çox ciddi silahımız var. Bunun özü düşmənə çox vacib mesaj idi ki, nazir tərəfindən səsləndirildi. Yəni bizdə olan müasir silahlarla həmin raketlər zərərsizləşdiriləcək. Ona görə də mən belə bir açıqlamanın verilməsinə çox müsbət yanaşıram. Hesab edirəm ki, müdafiə naziri çox düzgün olaraq bəzi məsələləri vurğulayıb. Bunları geniş işıqlandırmalıyıq ki, həm düşmən başa düşsün, həm də onun havadarları vəziyyətin hansı səviyyədə olmasını anlasın".
Vidadi ORDAHALLI
