Aqşin Əliyev: "Azərbaycan Ordusunun prosesə verdiyi töhfəni də unutmaq olmaz"
Azərbaycan Respublikasının Prezidenti İlham Əliyev Nazirlər Kabinetinin 2017-ci ilin birinci yarısının sosial-iqtisadi inkişafının yekunlarına və qarşıda duran vəzifələrə həsr olunan iclasında çıxışı zamanı deyib ki, Ermənistan-Azərbaycan, Dağlıq Qarabağ münaqişəsi ilə bağlı bu ilin birinci yarısında Azərbaycanın haqlı mövqeyində bir çox irəliləyişlər olub:
"Bu ilin əvvəlində Dağlıq Qarabağdakı separatçı rejimin keçirdiyi qondarma referendum dünya birliyi və beynəlxalq birliklər tərəfindən tanınmayıb. Bununla da beynəlxalq aləm Dağlıq Qarabağı Azərbaycanın tərkib hissəsi kimi tanıdığını bir daha bəyan edib.
Bundan əlavə, ötən ilin aprel ayında Ermənistanın danışıqların bərpası ilə bağlı irəli sürdüyü şərtlər heç bir nəticə verməyib. Azərbaycan və Ermənistanın xarici işlər nazirləri görüşüb. Azərbaycan tərəfindən heç bir şərt qəbul olunmadan danışıqlar bərpa edilib. Beləliklə, işğalçı ölkə məcbur olaraq danışıqlar masasına qayıdıb".
Münaqişənin həlli ilə bağlı təzyiqlər artanda Ermənistan hər zaman təxribata əl atır deyən Prezident İlham Əliyev bildirib ki, bunu illər öncə Ermənistan parlamentində baş verən terror aktı, 2014-cü ildə Paris danışıqlarından sonra cəbhədə vəziyyətin gərginləşməsi, həmçinin, 2016-cı ilin aprelində təmas xəttində törədilən təxribatın qarşısının ordumuz tərəfindən layiqincə alınması da təsdiqləyir.
Prezidentin dediyi kimi, Ermənistanın Azərbaycana heç bir şərt qəbul etdirə bilmədən danışıqları bərpa etməsi Azərbaycan diplomatiyasının uğuru sayıla bilərmi?
Ekspert Aqşin Əliyev qəzetimizə açıqlamasında bildirdi ki, Ermənistan başqa çıxış yolunun olmadığını görür: "Məlumdur ki, Ermənistan aparılan sülh danışıqları prosesində daim qeyri-konstruktiv mövqe tutub. Ən başlıcası isə, status-kvonun qorunub saxlanmasında maraqlı olub. Təəssüflər olsun ki, uzun müddət buna nail ola bilib. Azərbaycan tərəfi isə dəfələrlə bəyan edir ki, belə halla razılaşan deyil. Çünki bu vəziyyət müharibənin də olacağını labüd edir. İstənilən yolla torpaqları işğaldan azad etmək ölkəmizin haqqıdır. Aprel döyüşləri bir daha sübut etdi ki, Azərbaycan Ordusu hər an torpaqlarımızı işğaldan azad etməyə qadirdir. Ermənistan həmin döyüşlərdən sonra danışıqlar prosesini tərk etdiyini dedi. Yalnız hansısa şərtlərə əməl olunacağı təqdirdə prosesə qayıda biləcəyini bəyan edirdi. Xarici işlər nazirlərinin görüşü ərəfəsində yeni təxribata əl ataraq, mülki sakinlərin, azyaşlı uşağın öldürüləməsini reallaşdırdı. Azərbaycanın həm cəbhə xəttində, həm də diplomatik müstəvidə cavabı sərt oldu. Bütün bu hallar Ermənistanı lərzəyə saldı və onlar şərt irəli sürmədən danışıqlar prosesinə qayıtdı. Təbii ki, biz bunu Azərbaycan diplomatiyasının böyük uğuru saya bilərik. Ancaq hər diplomatiyanın arxasında güclü ordunun durduğunun da fərqində olmalıyıq. Azərbaycan Ordusunun prosesə verdiyi töhfəni də unutmaq olmaz".
Məhəmmədəli QƏRİBLİ
