Qabil Hüseynli: "ABŞ region ölkələrini buna etiraz etməyə sövq etsə də, heç bir nəticə əldə olunmayıb"
Çin ölkə hüdudlarından kənarda fəaliyyət göstərəcək ilk hərbi bazasına gəmiləri yola salıb. Cibutidə fəaliyyət göstərəcək baza əsasən Yəmən və Somalidə sülhməramlı və humanitar missiyalar yerinə yetirən gəmilərin yanacaqla təmin olunmasını həyata keçirəcək. Bazada nə qədər hərbçinin yerləşdiriləcəyi barədə məlumat verilməyib.
Qeyd olunur ki, Çin ilk xarici hərbi bazanın tikintisinə keçən il başlayıb.
Çinin bu addımı həmin ölkənin dünya siyasətindəki gələcək mövqeyinə necə təsir edəcək?
Politoloq Qabil hüseynli qəzetimizə bildirdi ki, dünyanın hərbi və iqtisadi baxımdan nəhəng ölkələrinin hamısı xaricdə hərbi bazalar qurmaqda maraqlıdır: "Çin iqtisadi cəhətdən çox dinamik inkişaf edir. Həmin ölkənin dünyanı fəth etmək strategiyası iqtisadi qüdrətlənməyə əsaslanırdı. Pekinin hədəfi bundan ibarət idi ki, bütün dünyanı iqtisadi cəhətdən asılı vəziyyətə salsın. Ancaq buna ciddi maneələrin yaradıldığını görəndə, hərbi sahədə də irəliləməyi lazım bilib. Çin son addımları ilə imperialist maraqlarının olduğunu büruzə verir.
Çinin ölkə sərhədləri xaricində ilk hərbi bazasını Cibutidə qurmaq istəməsi barədə informasiyanın yayılması ABŞ tərəfindən sərt qarşılanıb. Hələ bir neçə il əvvəl Çin mətbuatı yazırdı ki, Cibuti hakimiyyəti Obok hərbi bazasının boşaldılması barədə ABŞ-a təlimat verib. İddialara görə, ABŞ əsgərləri bazanı boşaldacağı halda bazaya Çin ordusu yerləşdiriləcək. Çinin Afrikanın şərqində - Qırmızı dənizin sahilindəki Cibutidə 10 min hərbçini yerləşdirəcəyi bildirilir.
Efiopiyanın paytaxtı Əddis-Əbəbədən Cibutiyə qədər uzanan 3 milyard dollarlıq dəmir yolu xəttini inşa edən Çin, həmçinin, 400 milyon dollarlıq sərmayə ilə Obok limanını yeniləyib. Çin burada hərbi qüvvə yerləşdirməklə Şərqi Afrikada strateji mövqe qazanmaq niyyətindədir.
Verilən məlumatlara görə, ABŞ Çinin Cibuti ilə yaxınlaşmasını diqqətlə izləyir. ABŞ-ın Cibutidəki 2 hərbi bazasında 4 min əsgəri var və bu bazalardan antiterror əməliyyatlarında istifadə edilir.
Çin, həmçinin, Sakit okean hövzəsində süni adalar yaratmaqla həmin akvatoriyanı öz nəzarətinə keçirir. ABŞ region ölkələrini buna etiraz etməyə sövq etsə də, heç bir nəticə əldə olunmayıb. Hazırda Çin həmin ərazidə 3 ada yaradıb".
Məhəmmədəli QƏRİBLİ
