Arzu Nağıyev: "Artıq biz dünyanın ictimai rəyinə Ermənistanın mülki əhalini hədəfə aldığını, xüsusilə də uşaq qatili olduğunu yeridə bilmişik"
Ermənistan ordusunun 4 iyul gecəsi işğal altındakı ərazilərdən açdığı atəş nəticəsində Alxanlı kəndində Azərbaycanın biri uşaq, digəri qadın olmaqla, iki dinc vətəndaşının qətlə yetirilməsi dünya miqyasında da böyük rezonans doğurdu.
Rəsmi Bakı təkcə təmas xətti boyunca düşməni susdurmaqla kifayətlənmir, bütün istiqamətlərdə təbliğat müharibəsi aparır.
Alxanlı qətliamından sonra Minskdə keçirilən ATƏT PA-nın sessiyasında Azərbaycana qarşı qətnamənin qəbulu üçün Ermənistan tərəfi çox çalışsa da, son nəticədə buna nail olmadı, sənəd rədd edildi. Həmçinin NATO, AŞPA kimi qurumlarda da Ermənistanın son hərəkəti kəskin qınanıldı.
Bu mənada hesab olunur ki, Ermənistanın bu şəkildə qınağa tuş gəlməsi Azərbaycan diplomatiyasının uğurlu fəaliyyətinin nəticəsidir.
Gələcəkdə bunun hansı faydasını görə biləcəyik?
Siyasi şərhçi Arzu Nağıyev hesab edir ki, Alxanlı kəndində dinc əhalinin vəhşiliklə qətlə yetirilməsindən sonra Azərbaycan tərəfindən ermənilər əleyhinə aparılan təbliğat öz bəhrəsini verib: "Burada Azərbaycan diplomatiyasının, medianın, sosial şəbəkədə yaradılan qrupların və qeyri-hökumət təşkilatlarının, təbii ki, sadə azərbaycanlıların rolunu məxsusi qeyd etmək lazımdır. Demək olar ki, Azərbaycanda olan xarici dövlətlərin səfirliklərinin hərbi attaşelərinin hadisə yerindən birbaşa ermənilərə xitabən verdiyi bəyanatlar çox mühüm əhəmiyyət kəsb edirdi. Yəni ermənilərin saxta arqument kimi ortaya qoymağa çalışdığı mülki obyektlərə yaxın yerlərdə hərbi texnikanın yerləşdirilməsi mifi dağıldı. Məhz bundan sonra monitorinq aparan ATƏT və həmsədrlər erməniləri qınayan bəyanatla çıxış etdilər".
A.Nağıyev hesab edir ki, belə bir situasiyada Azərbaycan tərəfinin ərazilərimizdə antiterror əməliyyatları keçirməsi mümkündür və heç bir beynəlxalq təşkilat bunun qarşısını ala və bəyanatla çıxış edə bilməz: "Acınacaqlı hal odur ki, dəfələrlə guya Azərbaycan tərəfindən ermənilərin hüququnun pozulması haqqında bəyanat verən, anti-Azərbaycan mövqeyi tutan beynəlxalq təşkilatların bəyanatı səslənmədi. Bəzi özlərini bizə dost saymağa çalışan və hətta münaqişənin həllində öz vasitəçilik missiyasını təklif edən dövlətlərin attaşeləri ya Alxanlıya səfərdən imtina etdi, ya da bəyanat verməkdən boyun qaçırdı. Deməli, haqq-ədalət biz tərəfdədir. Zənnimcə, mülki əhaliyə qarşı vəhşilik törətmək üçün istifadə olunan bütün hərbi obyektlər vurulmalı və işğalçı erməni əsgərləri ya güllələnməli, ya da ən yaxşı halda ərazilərimizdən qovulmalıdır. Əlbəttə, son ümid olaraq danışıqlara da getmək olar, lakin bunun heç bir nəticə verməyəcəyi məlumdur. Hesab edirəm ki, Alxanlıda xüsusilə də 2 yaşlı Zəhranın faciəsi ilə bağlı çatdırdığımız faktlar dünyanı lap sarsıtdı. Bu ciddi fakt bütün nüfuzlu beynəlxalq qurumlarda bizim xeyrimizə qətnamələrin qəbul olunması ilə nəticələndi. Şübhəsiz ki, bu təbliğatın Azərbaycan üçün böyük faydası olacaq. Çünki artıq biz dünyanın ictimai rəyinə Ermənistanın mülki əhalini hədəfə aldığını, xüsusilə də uşaq qatili olduğunu yeridə bilmişik".
Məhəmmədəli QƏRİBLİ