Qabil Hüseynli: "Ancaq ciddi nəticənin əldə olunması üçün, mütləq mənada, Ermənistan konstruktiv mövqeyə gətirilməlidir"
ATƏT-in Minsk Qrupunun həmsədrləri Azərbaycan və Ermənistan xarici işlər nazirlərinin Brüssel görüşü ilə bağlı bəyanat yayıb. Bəyanatda Minsk Qrupunun həmsədrləri İqor Popov (Rusiya), Stefan Viskonti (Fransa) və Riçard Hoqlandın (ABŞ) iyulun 11-də Azərbaycan və Ermənistan XİN rəhbərləri ilə görüşdüyü və Dağlıq Qarabağ münaqişəsinin həlli ilə bağlı gələcək addımları müzakirə etdiyi qeyd olunur.
Görüşdə, həmçinin, ATƏT sədrinin şəxsi nümayəndəsi Kaspşik iştirak edib.
Bəyanatda bildirilir ki, nazirlər öz prezidentlərinə həmsədrlərin bu ilin sonunadək yüksək səviyyəli görüşün keçirilməsi ilə bağlı təklifini çatdırmağa razılıq verib. Həmsədrlər prezidentlərin görüşünün təşkil edilməsində yardım təklif edib. Görüş zamanı təmas xəttindəki son durum da müzakirə edilib.
"Nazirlər və həmsədrlər sentyabr ayında Nyu-Yorkda baş tutacaq BMT Baş Assambleyasının 72-ci sessiyasının kuluarlarında yenidən görüşmək barədə razılaşıb", - deyə bəyanatda vurğulanır.
Azərbaycan və Ermənistan xarici işlər nazirlərinin iyulun 11-də Brüsseldə keçirilmiş görüşü ilə əlaqədar Azərbaycan XİN-in Mətbuat xidmətinin rəhbəri Hikmət Hacıyev açıqlama verib. Onun sözlərinə görə, görüşdə ATƏT-in Minsk Qrupunun həmsədrləri tərəfindən xarici işlər nazirlərinin bu il BMT Baş Assambleyasının sessiyası çərçivəsində görüşünün keçirilməsi təklif edilib və Azərbaycan tərəfi bu təklifə razılığını bildirib: "Həmsədrlər tərəfindən Azərbaycan və Ermənistan prezidentlərinin görüşü barəsində təklif hər iki ölkənin xarici işlər nazirləri tərəfindən dövlət başçılarına məruzə ediləcək. Prezidentlərin görüşündən sonra 2017-ci ilin payızında həmsədrlərin regiona təkrar səfəri planlaşdırılıb.
Görüş əsnasında xarici işlər naziri Elmar Məmmədyarov bir daha bildirib ki, münaqişə ilə əlaqədar gərginliyin azaldılması və regionda təhlükəsizliyin təmin olunması üçün, həmsədrlərin təqdim etdikləri mövcud planlara uyğun olaraq, Ermənistan qoşunları Azərbaycanın işğal edilmiş ərazilərindən çıxarılmalıdır.
Görüşdə hər hansı mexanizmlərin yaradılması müzakirə mövzusu olmayıb".
Prezidentlərin nəzərdə tutulan görüşü Dağlıq Qarabağ problemi ilə bağlı vəziyyəti dəyişə bilərmi?
Politoloq Qabil Hüseynli qəzetimizə bildirdi ki, baş tutan görüşdə hər hansı bir nəticə əldə olunmayıb: "Bunun həmsədrlərin öz mandatına yaranmış etimadsızlığı aradan götürməklə bağlı təşkil edildiyinə şübhə yoxdur. Çünki Ermənistan aprel döyüşlərindən sonra konkret olaraq sülh danışıqlarını boykot edirdi. Həmsədrlik institutu isə indiyə qədər yalnız görüşlər keçirməklə məşğul olub. Həm də münaqişə tərəflərinin görüşünü təşkil edib, arada vasitəçilik missiyasını həyata keçirib. Ancaq son vaxtlar Ermənistan sülh danışıqlarına da məhəl qoymurdu. Həmsədrlər bununla tam funksiyasız bir təsisata çevrilmiş olurdu. Bu səbəbdən də bölgəyə etdikləri son səfərdə xarici işlər nazirləri arasında görüşün keçirilməsinə nail oldular. Ölkə başçılarının görüşü isə mənə elə gəlir ki, formal xarakter daşıyacaq. Çünki konkret nəticənin gözlənildiyi görüşdən qabaq xarici işlər nazirləri səviyyəsində hansısa razılaşmalar əldə edilir. Biz son görüşdə bunu görmədik. Bu baxımdan da prezidentlərin nəzərdə tutulan görüşünün münaqişə ilə bağlı kardinal dəyişiklik yaradacağı inandırıcı görünmür. Belə təmaslar Ermənistanı sülh danışıqlarına qaytarmaq baxımından faydalı sayıla bilər. Ancaq ciddi nəticənin əldə olunması üçün, mütləq mənada, Ermənistan konstruktiv mövqeyə gətirilməlidir. Bunun da yolu həmin ölkəyə ediləcək təzyiqlərdən keçir. Hələlik isə biz həmsədrlərin timsalında bu niyyəti görmürük".
Məhəmmədəli QƏRİBLİ
