Seyid Camal Əzimbəyli: "Erməni vandalları hər vəchlə çalışıblar ki, bundan bir əsər-əlamət qalmasın"
Abidcan şəhərində İslam Əməkdaşlıq Təşkilatına üzv ölkələrin Xarici İşlər Nazirləri Şurasının 44-cü sessiyası keçirilib. Azərbaycanı tədbirdə xarici işlər nazirinin xüsusi nümayəndəsi statusunda Oqtay Qurbanov təmsil edib. Sessiyada O.Qurbanov nazir Elmar Məmmədyarovun adından çıxış edib.
Sessiyada ölkəmizlə bağlı bir sıra mühüm sənədlər, o cümlədən Ermənistanın ölkəmizə qarşı təcavüzünə və işğal olunmuş ərazilərimizdə dini-mədəni irsin dağıdılmasına dair qətnamələr qəbul edilib. Həmçinin, Xocalı soyqırımının 25 illiyi ilə əlaqədar İƏT və ona üzv dövlətlərin bu soyqırımın qurbanları ilə həmrəyliyini ifadə edən qətnamə qəbul edilib.
"Ermənistan Respublikasının Azərbaycan Respublikasına qarşı təcavüzü" başlıqlı qətnamədə BMT Təhlükəsizlik Şurasının müvafiq qətnamələrinin yerinə yetirilməsi tələb edilir və bu sənədlərdə əks olunmuş tələblərin Ermənistan tərəfindən hələ də yerinə yetirilməməsinə dair narahatlıq ifadə olunur. Həmçinin, bütün dövlətlər Ermənistanın silah və hərbi təchizatlarla təmin edilməsinə və öz ərazilərindən bu kimi təchizatların ötürülməsi məqsədilə istifadə edilməsinə yol verməməyə çağırılır.
"Ermənistanın Azərbaycana qarşı təcavüzü nəticəsində işğal olunmuş Azərbaycan ərazilərində islam tarixinə və mədəniyyətinə aid abidələrin dağıdılması" adı altında qəbul edilmiş sənəddə Azərbaycanın Ermənistan tərəfindən işğal olunmuş ərazilərindəki tarixi, mədəni, arxeoloji, antropoloji və etnoqrafik abidələrin, maddi mədəniyyət nümunələrinin islam irsinin ayrılmaz tərkib hissəsi olduğu bildirilir və bu irsin dağıdılması kəskin tənqid edilir.
Bu kimi əməlləri ilə Ermənistan Respublikasının silahlı münaqişələr zamanı mədəni mülkiyyətin qorunması haqqında konvensiya və onun əlavə protokollarını kobud şəkildə pozduğu qeyd olunur.
Bütövlükdə, İƏT-in sözügedən məsələ ilə bağlı Azərbaycana dəstək xarakterli qətnamə qəbul etməsinin nə kimi əhəmiyyəti var?
Məsələyə münasibət bildirən şərqşünas Seyid Camal Əzimbəylinin sözlərinə görə, İƏT Dağlıq Qarabağ məsələsinin ədalətli həllində hər zaman Azərbaycanın yanında olub: "Azərbaycan bu təşkilata 1991-ci ildə üzv qəbul olunub. O vaxtdan sonra sözügedən təşkilat hər zaman Azərbaycanın yanında olub. Ermənistan silahlı qüvvələrinin Azərbaycan ərazilərini işğal etməsini konkret olaraq bu təşkilat pisləyib. İƏT-in üzvü olan üç ölkənin - Türkiyə, Səudiyyə Ərəbistanı və Pakistanın Ermənistanla heç bir diplomatik əlaqəsi yoxdur. Əlbəttə, adıçəkilən qurumun işğal olunmuş ərazilərlə bağlı növbəti qətnamə qəbul etməsi diplomatik baxımdan bizim xeyrimizədir. Xüsusən də qətnamədə islam tarixinə və mədəniyyətinə aid abidələrin dağıdılmasının öz əksini tapması müsbət haldır. Çünki Ermənistanla müəyyən əlaqələrə malik olan bəzi müsəlman ölkələri bilməlidir ki, işğal olunuş ərazilərdə islam irsini özündə əks etdirən abidələr məhv edilərək yer üzündən silinib. Erməni vandalları hər vəchlə çalışıblar ki, bundan bir əsər-əlamət qalmasın. Ona görə də ermənilərin iç üzünü növbəti dəfə islam ölkələrinə göstərmək baxımından, hesab edirəm ki, həmin qətnamə mühüm əhəmiyyətə malikdir".
Vidadi ORDAHALLI