Fikrət Sadıqov: "Ukrayna və digər postsovet məkanında baş verən analoji hadisələr bizi yaxınlaşdırır"
Nizami Gəncəvi Beynəlxalq Mərkəzinin üzvləri - Ukraynanın keçmiş prezidentləri Viktor Yuşşenko (2005-2010) və Leonid Kravçukdan (1991-1994) Azərbaycan Prezidenti İlham Əliyevin ünvanına məktub daxil olub.
Sözügedən məktubda son günlər cəbhədə baş verənlərlə bağlı ölkə başçısına dəstək ifadə olunub: "Möhtərəm cənab Prezident, əzizimiz İlham Heydər oğlu! İcazə verin, Azərbaycan üçün bu ağır günlərdə, Dağlıq Qarabağda yenə də dinc azərbaycanlı sakinlərin həlak olduğu, münaqişənin isə yenidən qızışdığı bir vaxtda Sizə və xalqınıza möhkəm dəstəyimizi ifadə edək. Təcavüzkarın və onun müttəfiqlərinin belə addımları bütün sivil dünya üçün təhlükəyə çevrilir. Biz ümid edirik ki, dünya birliyi bu faciəli hadisələrin lazımınca qiymətləndirilməsində həmrəylik nümayiş etdirəcək.
Əziz İlham Heydər oğlu, Qarabağ yarası və ölkənizin hər bir sakininin hiss etdiyi ağrı-acı biz ukraynalılara hər kəsdən daha aydın və yaxındır. Azərbaycan kimi, Ukrayna da ərazisində növbəti dondurulmuş münaqişə və anklav yaradılması üçün bütün cəhdlərə baxmayaraq, var gücü ilə öz ərazi bütövlüyünü bərpa etməyə çalışır. Odur ki, Azərbaycanın ərazi bütövlüyü və müstəqilliyi Ukrayna üçün və şəxsən bizim üçün həmişə müasir geosiyasətin dəyişməz postulatlarından biri olub və bundan sonra da olacaq".
Məktubda o da qeyd olunub ki, bugünkü vəziyyətdə hadisələrin inkişafı təkcə Azərbaycan xalqının və ordusunun gücündən və mütəşəkkilliyindən deyil, həm də başqa ölkələrin dəqiq mövqeyindən asılıdır: "Biz inanırıq ki, Sizin ölkə tezliklə yenə də öz torpaqlarına və sərhədlərinə nəzarət etmək, düşmən tərəfindən işğal olunmuş və dağıdılmış əraziləri bərpa etmək imkanı əldə edəcək".
Görünən odur ki, son illər Ukrayna kimi böyük dövlət separatizmdən əziyyət çəkdiyi üçün, ölkə siyasiləri Azərbaycanı daha dərindən anlayır və öz dəstəklərini ifadə edir.
Məsələyə münasibət bildirən keçmiş diplomat, politoloq Fikrət Sadıqovun sözlərinə görə, Azərbaycan kimi, Ukrayna da separatçılıqdan əziyyət çəkir: "O baxımdan Ukraynanın iki sabiq prezidentinin məktubda səsləndirdiyi fikirlər reallığı əks etdirir. Keçmiş ölkə başçılarının belə məktubları onu göstərir ki, bu istiqamətdə bir sıra dövlətlərin tanınmış, sağlam düşüncəli siyasətçiləri Azərbaycanın həqiqətlərini çox dərindən başa düşür, izləyir. Əlbəttə, belə bir kontekstdə dövlət xadimlərinin bizim yanımızda olması Ukraynanın Azərbaycanla münasibətlərinin yaxınlığından irəli gəlir. Ukrayna və digər postsovet məkanında baş verən analoji hadisələr bizi yaxınlaşdırır. Həmçinin, bir-birimizi daha yaxşı başa düşməyə vadar edir. Hesab edirəm ki, biz bu məsələdə həmkarıq. Ona görə ki, biz təcavüzə məruz qalmışıq və neçə ildir bu problemlə üzləşmişik. Eyni zamanda, böyük qüvvələrlə mübarizə aparırıq. Ukrayna da analoji vəziyyətdədir. O üzdən, belə məktublar ancaq müsbət reaksiya doğura bilər".
Vidadi ORDAHALLI