Qabil Hüseynli: "Hesab edirəm ki, məhz belə bir gərgin məqamda iki ölkə başçısının təması və oradan çıxan nəticələr olduqca faydalıdır"
Azərbaycan Prezidenti İlham Əliyev İstanbulda Türkiyə prezidenti Rəcəb Tayyib Ərdoğanla görüşüb. Görüşdə Türkiyə-Azərbaycan dostluq və qardaşlıq münasibətlərinin uğurla inkişaf etdiyi vurğulanıb, siyasi, iqtisadi və digər sahələrdə əlaqələrin yüksək səviyyədə olduğu bildirilib.
Prezident İlham Əliyev 22-ci Dünya Neft Konqresinin Türkiyədə keçirilməsi münasibətilə prezident Rəcəb Tayyib Ərdoğanı təbrik edib. Söhbət zamanı ölkələrimiz arasında energetika sahəsində strateji əhəmiyyətli layihələrin uğurla icra olunduğu qeyd edilib, xüsusilə TANAP layihəsinin gələn il başa çatacağı məmnunluqla vurğulanıb.
Azərbaycan və Türkiyə prezidentləri ölkələrimizin hərbi sahədə əməkdaşlığının daha da genişləndirilməsi və möhkəmləndirilməsi haqqında da söhbət ediblər.
Görüşdə Ermənistan-Azərbaycan, Dağlıq Qarabağ münaqişəsinin həlli ilə bağlı məsələlər müzakirə edilib. Prezident İlham Əliyev son vaxtlar təmas xəttində Ermənistanın təxribatları və hərbi cinayətləri barədə Türkiyə prezidentinə ətraflı məlumat verib. Prezident Rəcəb Tayyib Ərdoğan Türkiyənin, həmişə olduğu kimi, Ermənistan-Azərbaycan, Dağlıq Qarabağ münaqişəsinin beynəlxalq hüquq normaları, Azərbaycanın ərazi bütövlüyü prinsipləri əsasında həllinə dəstək verdiyini vurğulayıb.
Dövlət başçıları qeyd ediblər ki, Türkiyə və Azərbaycan bütün məsələlərlə bağlı bir-birinin yanındadır.
Qeyd edək ki, Prezident İlham Əliyev İstanbulda keçirilən 22-ci Dünya Neft Konqresində iştirak etmək üçün Türkiyəyə səfər edib.
İlham Əliyevin Türkiyəyə reallaşan səfəri Azərbaycan-Ermənistan qoşunlarının təmas xəttində vəziyyətin gərginləşdiyi bir dönəmə təsadüf edir. Verilən rəsmi məlumatlardan da görünür ki, iki ölkənin prezidenti arasında Dağlıq Qarabağ və onun ətrafındakı vəziyyətlə bağlı müzakirələr aparılıb. Bu baxımdan İlham Əliyevin son Türkiyə səfərini necə şərh etmək olar?
Politoloq Qabil Hüseynli qəzetimizə bildirdi ki, İlham Əliyevin son səfəri cəbhədəki vəziyyətlə əlaqəli olmayıb: "Məlum olduğu kimi, ölkə başçısı İstanbulda keçirilən 22-ci Dünya Neft Konqresində iştirak etmək üçün Türkiyəyə səfər edib. Bu səfərin qrafiki əvvəlcədən müəyyən edilib. Ancaq, istənilən halda, iki ölkə başçısı üçün Dağlıq Qarabağ mövzusu prioritet təşkil edir. Mən deyərdim ki, belə müzakirələr ölkə başçıları arasında yalnız görüşəndə deyil, mütəmadi aparılır. Tez-tez onlar arasında telefon danışığının olması haqda rəsmi məlumat verilir. Əminliklə deyə bilərəm ki, istənilən təmasda Dağlıq Qarabağ məsələsi müzakirə edilir. Çünki bu məsələdə bizimlə qardaş ölkənin maraqları arasında ziddiyyət yoxdur. Ermənistan bizimlə yanaşı, Türkiyə ilə də açıq düşmənçilik aparır. Dünya miqyasında əsası olmayan soyqırım iddiaları ilə Türkiyəyə qarşı fəaliyyət sərgiləyir. Türkiyə ilə maraqlarımızın uzlaşmasını xarakterizə edən bir çox səbəblər olsa da, ən mühümü bundan ibarətdir. Qardaş ölkə birmənalı olaraq Ermənistan qoşunlarının işğal altındakı torpaqlardan çıxarılmasını tələb edir. Dağlıq Qarabağla bağlı məsələdə Türkiyənin mövqeyi prinsipialdır və heç vaxt deformasiyaya uğramayıb. Hesab edirəm ki, məhz belə bir gərgin məqamda iki ölkə başçısının təması və oradan çıxan nəticələr olduqca faydalıdır".
Məhəmmədəli QƏRİBLİ