Yeganə Hacıyeva: "Hesab edirəm ki, Azərbaycan diplomatiyası bu istiqamətdə fəaliyyətini mütləq gücləndirməlidir"
Ermənistan silahlı qüvvələrinin Azərbaycanın Füzuli rayonunun Alxanlı kəndinin mülki əhalisi və mülki obyektlərini iyul ayının 4-də müxtəlif çaplı odlu silahlardan atəşə tutması nəticəsində 1967-ci il təvəllüdlü Sahibə Allahverdiyeva və onun nəvəsi 2 yaşlı Zəhra Quliyevanın həyatını itirməsi, Səlminaz Quliyevanın yaralanması və mülki obyektlərə zərər yetirilməsi ilə bağlı hadisə yalnız Azərbaycanda deyil, bütün dünyada ciddi rezonansa səbəb olub.
Demək olar ki, ölkənin daxilində olan bütün siyasi təşkilatlar, QHT-lər bununla bağlı sərt bəyanatlar verib. Azərbaycanın diaspor təşkilatları xaricdəki Ermənistan səfirliklərinin önündə etiraz aksiyaları keçirib. Verilən bəyanatlarda başlıca qınaq beynəlxalq ictimaiyyətə ünvanlanır. Bildirilir ki, onların və münaqişədə sülhyaratma missiyasını üzərinə götürənlərin səriştəsizliyi nəticəsində belə hallar yaşanır. Ermənistanı yerində oturtmaq, azğınlığının qarşısını almaq üçün yeni təkliflər irəli sürülür. Belə təkliflərdən biri də BMT Təhlükəsizlik Şurasında Ermənistanın dinc sakinləri qətlə yetirməsini pisləyən və mövcud status-kvonun dəyişdirilməsini zəruri sayan yeni sənədin qəbul edilməsilə bağlıdır. BMT belə bir yeni sənəd qəbul edə bilərmi?
Politoloq Yeganə Hacıyeva qəzetimizə açıqlamasında bildirdi ki, bu olduqca maraqlı ideyadlır: "Bilirsiniz ki, Azərbaycan son hadisələrlə bağlı Ermənistanı məhz beynəlxalq konvensiyaları pozmaqda ittiham edir. Cəbhə xəttindən çox-çox kənarda məqsədli şəkildə mülki əhalinin öldürülməsi BMT-nin araşdırmasına səbəb ola bilər. Çünki BMT-nin dünyadakı başlıca funksiyası məhz bununla bağlıdır. Bilirsiniz ki, BMT TŞ-nin Dağlıq Qarabağla bağlı 4 qətnaməsi var və onlardan heç birinə Ermənistan riayət etməyib. Son 20 ildə isə biz dünyada aqressorlara qarşı BMT TŞ-nin qəbul etdiyi qərarların icrasında tamamilə fərqli mənzərənin şahidi olmuşuq. Onlara qarşı bir çox hallarda silah və sanksiyalar tətbiq edilib. Suriya, Ukrayna ilə bağlı hadisələri isə yenilər qəbilinə aid edə bilərik. Yəni Azərbaycanın belə bir tələbi irəli sürməsi üçün əlində kifayət qədər əsası var. Ancaq dünyanın bəzi güclərinin buna icazə verəcəyinə inanmıram. Ancaq onu da etiraf etmək lazımdır ki, son vaxtlar nüfuzlu beynəlxalq təşkilatlarda Azərbaycanla bağlı ciddi sənədlər qəbul edilir. Bizim xeyrimizə olan bu sənədlərin qəbul edilməsini diplomatiyamızın uğuru kimi qiymətləndirə bilərik. Əsasən də həmin sənədlərdə Azərbaycanın təhlükəsizliyinə verilən önəmin birinci yerdə olması bizi sevindirir. Son hadisələrdə isə Ermənistan konkret olaraq Azərbaycana qarşı BMT-nin 3 konvensiyasını pozub. Hesab edirəm ki, Azərbaycan diplomatiyası bu istiqamətdə fəaliyyətini mütləq gücləndirməlidir".
Məhəmmədəli QƏRİBLİ