Elşən Həsənov: "Ehtimal ki, Ermənistan substantiv danışıqlardan bundan sonra da yayınacağı təqdirdə NATO-nun təzyiqlərinə tuş gələ bilər"
NATO Azərbaycanın dinc vətəndaşlarına qarşı erməni hərbi təxribatı nəticəsində ölənlərin ailələrinə başsağlığı verib: "Biz bu faciənin qurbanlarının ailələrinə başsağlığı veririk".
Qeyd olunub ki, Alyans ATƏT-in Minsk Qrupunun həmsədrlərinin Dağlıq Qarabağ münaqişəsinin tərəflərinə hərbi fəaliyyəti dayandırmaq və danışıqlar masasına qayıtmaqla bağlı çağırışını dəstəkləyir: "Dağlıq Qarabağ münaqişəsinin hərbi yolla həlli yoxdur. NATO bu münaqişənin nizamlanması üzrə danışıqlarda birbaşa rol oynamır. Biz Minsk Qrupu çərçivəsində bu istiqamətdə səyləri dəstəkləməyə davam edirik. Bununla belə, biz tərəfləri substantiv danışıqlarda iştirak etməyə, Dağlıq Qarabağ münaqişəsinin sülh yolu ilə nizamlanmasına nail olmağa çağırırıq".
Xatırladaq ki, iyulun 4-də axşam saatlarında erməni silahlı birləşmələri Füzuli rayonunun Alxanlı kəndini minaatanlardan atəşə tutub. Təxribat nəticəsində Alxanlı kənd sakinləri - 1966-cı il təvəllüdlü Quliyeva Sahibə İdris qızı və onun nəvəsi 2016-cı il təvəllüdlü Quliyeva Zəhra Elnur qızı həlak olub, 1965-ci il təvəllüdlü Quliyeva Səlminaz İltifat qızı isə ağır yaralanıb.
NATO, faktiki olaraq, iyulun 11-də həmsədrlərin iştirakı ilə tərəflər arasında baş tutacaq görüşün astanasında Azərbaycanın mövqeyinə tam uyğun gələn münasibət ortaya qoyub. Çünki Azərbaycan rəsmi olaraq dəfələrlə bəyan edib ki, tərəflər təcili olaraq substantiv danışıqlara başlamalıdır. NATO-nun bu mövqeyini necə qiymətləndirmək olar?
Ekspert Elşən Həsənov qəzetimizə açıqlamasında bildirdi ki, NATO-nun belə bir bəyanatla çıxış etməsi bizim üçün məqbul sayıla bilər: "Çünki söhbət dünyanın əsl güc mənbəyi olan təşkilatından gedir. Təbii ki, belə qurumların adından yayılan bəyanatda hər sözün öz dərin mənası var. NATO-nun bəyanatının giriş hissəsi ümumi anlam daşıyır və diplomatik mənanı özündə ehtiva edir. Həlak olan ailəyə başsağlığı verilir, sonra münaqişənin güc yolu ilə həllinin yolverilməz olduğu qeyd edilir. Sonra isə Minsk Qrupunun səyləri dəstəklənir. Bütün bunları biz növbətçi bəyanat olaraq daim eşidirik. Ən diqqətçəkən məqam isə substantiv danışıqların tələb olunmasıdır. Bu sırf Azərbaycanın mövqeyinin ifadəsi deməkdir. Çünki biz rəsmi səviyyədə dəfələrlə bu mövqeyi ifadə etmişik. Ermənistan, birmənalı şəkildə, həmin prosesə hazır olmadığını bəyan edir. Onlar substantiv danışıqlardan müxtəlif bəhanələrlə yayınır. Ən vacib məqam isə bundan ibarətdir ki, Minsk Qrupunun həmsədrləri də substantiv danışıqların aparılmasının zəruriliyilə bağlı hansısa bəyanat verməyib. Yəni indiyə kimi bu mövqeyi yalnız biz ifadə etmişik. Hazırda tərəflərin nəzərdə tutulan görüşü ərəfəsində NATO-dan belə bəyanatın verilməsi ciddi mətləblərdən xəbər verir. Yəni buna təsadüfi yanaşmaq da olmaz. Demək ki, NATO bu məsələdə Azərbaycanın mövqeyini tam dəstəkləyir. Ehtimal ki, Ermənistan substantiv danışıqlardan bundan sonra da yayınacağı təqdirdə NATO-nun təzyiqlərinə tuş gələ bilər".
Məhəmmədəli QƏRİBLİ