Arzu Nağıyev: "Gələcəkdə insan hüquqları ilə bağlı cavabdehlik daşıyacağını bilir"
Fransa parlamentinin bir qrup deputatı - sabiq nazir, Avropa Parlamentinin deputatı Rəşidə Dati, sabiq nazir, Yuxarı Rən Departamentindən senator Jan-Mari Bokel, Luare Departamentindən deputat Jan-Pyer Dor, Şarant Departamentindən deputat Jerom Lambert, Yuxarı Ren Departamentindən deputat Jan-Lük Reitzer, Yonn Departamentindən deputat Andre Vilye, Aşağı Ren Departamentindən senator, Avropa İşləri üzrə Komissiyanın vitse-prezidenti, Fransa-Qafqaz Dostluq Qrupunda Azərbaycan üzrə sədr Andre Rişar, Orn Departamentindən senator, xarici işlər komissiyasının müdafiə və silahlı qüvvələr üzrə vitse-prezidenti, Fransa-Qafqaz Dostluq Qrupunun vitse-prezidenti Natali Qule, Somm Departamentindən senator Jerom Binyon, Luare Departamentindən senator Erik Dolij, En Departamentindən senator Silvi Go-Şavan, Kot-d"Or Departamentindən senator Alen Uper, Möz Departamentindən senator Kristian Nami, Uaz Departamentindən senator Alen Vassel, sabiq deputat, Azərbaycanın Dostları Assosiasiyasının sədri Jan-Fransua Mansel, sabiq deputat, Kle-Suyi şəhərinin meri İv Albarello, sabiq deputat, Arkaşon şəhərinin meri İv Fulon, sabiq deputat, Udan şəhərinin meri Jan-Mari Tetar, sabiq deputat, Jorj Feneş prezident Emmanuel Makrona müraciət ünvanlayıb. Müraciətdə fransalı parlamentarilər Ermənistanın 25 ildir beynəlxalq hüququ pozduğunu bildirib. Onlar iyulun 4-də Azərbaycanın Füzuli rayonunun Alxanlı kəndinin erməni silahlı qüvvələri tərəfindən atəşə tutulduğunu və nəticədə 2 yaşlı Zəhra və nənəsinin həlak olduğunu qeyd edib. Bildirilir ki, vəziyyətin bu məcraya düşməsində Ermənistanın işğalçılığı ilə yanaşı, dünya birliyinin laqeydliyinin də payı az deyil.
Ermənistan-Azərbaycan, Dağlıq Qarabağ münaqişəsi nəticəsində bir milyon azərbaycanlının doğma yurdlarından didərgin salınmasından, ermənilərin azərbaycanlılara qarşı apardığı etnik təmizləmə siyasətindən, Xocalı genosidindən söz açılan müraciətdə göstərilir ki, ölkəmizin torpaqlarının 20 faizi erməni silahlı qüvvələrinin işğalı altındadır.
"Artıq ədalətli və davamlı sülhə nail olmaq üçün danışıqlara başlamağın vaxtıdır, onsuz da yaşadığımız təlatümlü dünyada bu Qafqaz münaqişəsində Azərbaycanın səbri tükəndiyi təqdirdə, bütün region alova qərq ola bilər.
Bu gün vəziyyət çox aydındır, beynəlxalq ictimaiyyətin əlində səsvermə ilə qəbul edilmiş qətnamələr və münaqişənin həlli həvalə edilmiş ATƏT-in Minsk Qrupu var. Artıq son 25 ildə davam edən status-kvoya və Azərbaycanın ərazilərinin 20 faizinin işğalına son qoymaq vaxtıdır. Beynəlxalq hüquq hər yerdə tətbiq edilməlidir. Regional və beynəlxalq təhlükəsizlik üçün bu qaçılmaz amildir. Fransa da daxil olmaqla, beynəlxalq ictimaiyyətin Ermənistanın ən qısa zamanda BMT Təhlükəsizlik Şurasının qətnamələrinə riayət etməsi üçün təzyiq göstərməsi təcili və vacibdir.
Rusiya və Amerika Birləşmiş Ştatları kimi, Fransa da 1997-ci ildən Minsk Qrupunun həmsədridir. Onun tərəfdaşlarının strateji və taktik səbəblərdən münaqişənin həllinə nail olmaq üçün səfərbər olmağa əminlikləri görünmür. Vasitəçilərin süründürməçiliyinə son qoymaq üçün və münaqişənin yenidən başlanmasının ağlasığmaz olduğunu nəzərə alaraq, cənab Respublika Prezidenti, Minsk Qrupunun həmsədri və BMT Təhlükəsizlik Şurasının daimi üzvü səlahiyyətlərinizə uyğun olaraq dərhal reaksiya verməyinizi xahiş edirik".
Fransanın tanınmış şəxslərinin imzası ilə yayılan bu məktubda dünya birliyinin laqeydlikdə ittiham olunması nədən irəli gəlir?
Ekspert Arzu Nağıyev qəzetimizə açıqlamasında bildirdi ki, baş verən son hadisə ilə bağlı biz dünyanın bir çox ölkələrindən, təşkilatlarından ciddi reaksiyaların verildiyinin şahidi olduq: "Nə qədər təəccüblü görünsə də, bəzi bəyanatlarda sərt tona rast gəldik. Ermənistana qarşı daim diplomatik davranan qurumlar bu dəfə Ermənistanı öz adı ilə çağırdı, hətta işğaldan əl çəkməyə belə səslədi. Fransada imzalanan bəyanat isə daha obyektiv və geniş məzmunlu idi. Orada Ermənistanla yanaşı, dünya birliyinin laqeydliyi də sərt tənqid edilir.
Fransa bu addımı üç əsas səbəbə görə atır. Birinci məqam ATƏT-in Minsk Qrupunun həmsədrliyində təmsil olunduğu üçün mütləq şəkildə cavabdehliyini hiss edir və hətta gələcəkdə insan hüquqları ilə bağlı cavabdehlik daşıyacağını bilir. Digər tərəfdən, BMT-nin Təhlükəsizlik Şurasının daimi üzvüdür və buna görə reaksiya verməlidir. Üçüncü məqam da odur ki, Makron seçkiqabağı platformasında Dağlıq Qarabağ münaqişəsinin həllinin vacibliyini və bunun üçün mühüm səy göstərəcəyini vəd etmişdi. Məhz buna görə də Fransa senatorları belə bəyanatlar verdi".
Məhəmmədəli QƏRİBLİ