Məhəmməd Əsədullazadə: "Alxanlı kəndində hər hansı bir hərbi vasitənin olması haqda deyilənlər düşmənin cəfəngiyyatı və beynəlxalq birliyi çaşdırmaqdır"
Ermənistanın Azərbaycana yönəlik təxribatları səngimək bilmir. Alxanlıda dinc insanları qətlə yetirən ermənilər bunun dünyada doğurduğu qınağı pərdələmək üçün indi də şantaja əl atmağa başlayıb. İşğalçı tərəfin mətbuatı iddia edir ki, guya Azərbaycan dinc insanlardan canlı hədəf kimi istifadə edir. O cümlədən Alxanlı kəndində atəş mövqeləri var və bu səbəbdən ora zərbə endirilib. Halbuki, adıçəkilən kənddə dinc insanlar yaşayır və heç bir atəş nöqtəsi yoxdur.
Bu arada Müdafiə Nazirliyi, Xarici İşlər Nazirliyi, Respublika Baş Prokurorluğu və Füzuli Rayon İcra Hakimiyyəti tərəfindən Azərbaycanda akkreditə olunmuş hərbi attaşelərin və xarici kütləvi informasiya vasitələri nümayəndələrinin Ermənistan silahlı bölmələri tərəfindən atəşə tutulması nəticəsində iki dinc kənd sakininin həlak olduğu Füzuli rayonunun Alxanlı kəndinə səfəri təşkil edilib. Sözügedən ərazidə Azərbaycan Silahlı Qüvvələri bölmələrinin qərargahının və atəş nöqtələrinin olmadığını sübut edən dəlillər onlara yerində təqdim olunub.
Azərbaycan Müdafiə Nazirliyi bildirir ki, hərbi attaşelər və KİV nümayəndələri kənd ərazisində Silahlı Qüvvələrin bölmələrinin heç bir qərargahının və atəş nöqtələrinin olmadığına yerində əmin olub. Bu fakt bir daha təsdiq edir ki, Ermənistan silahlı bölmələrinin əsas hədəfi məhz dinc əhali olub.
Sözügedən məsələni dəyərləndirən politoloq Məhəmməd Əsədullazadənin sözlərinə görə, işğalçı tərəfin bu cür həyasız açıqlamalar verəcəyi gözlənilən idi: "Ermənistanın cəbhə xəttində geniş təxribatlar törətməsi, heç bir hərbi obyektin olmadığı Alxanlı kəndini artilleriya atəşinə tutması sırf etnik təmizləmə və terrordur. Əlbəttə, düşmən ölkə bu kənddə hərbi obyekt olduğunu deyəcək. Azərbaycan MN bəyanat yayaraq, hərbi attaşelər və səfirliklərin nümayəndələrini Alxanlı kəndinə apararaq, orada heç bir hərbi obyektin olmadığını sübut etdi. Azərbaycan heç vaxt öz vətəndaşlarını təhlükə ilə üzləşdirməz. Ona görə də Alxanlı kəndində hər hansı bir hərbi vasitənin olması haqda deyilənlər düşmənin cəfəngiyyatı və beynəlxalq birliyi çaşdırmaqdır. Ölkəmiz gərəkən tədbirlərini görür və düşmən layiqli cavabını alır və alacaq. Təəssüf ki, Minsk Qrupunun üzvləri ciddi şəkildə Ermənistana qarşı sərt siyasət aparmadı. Azərbaycan artıq beynəlxalq birliyə və dövlətlərə erməni cinayətini bəyan edib. Diplomatik və hərbi müstəvidə işlər aparılır. Ermənistan hakimiyyəti artıq müharibənin başlanması və Azərbaycanın cəza tədbirləri görəcəyindən narahatdır. Hesab edirəm ki, düşmənin kəndlərimizə yaxın bütün hərbi hədəfləri artilleriya atəşinə tutulmalı və düşmən yaşayış məntəqələrinin yaxınlığından uzaqlaşdırılmalıdır. Ermənistanın beynəlxalq qınaqdan yayınmaq üçün yalan taktikaları səmərəli olmayacaq. Beynəlxalq birliyin nə deməsindən və mövqeyindən asılı olmayaraq, Azərbaycan öz vətəndaşlarının təhlükəsizliyini qoruyur. İşğalçı sarsıdıcı zərbələrdən sığortalanmayacaq. Cənubi Qafqaz regionunda ciddi proseslər yaşanır. Azərbaycanın enerji və nəqliyyat sahəsində geosiyasi əhəmiyyət daşıyan layihələrə imza atması Rusiya və Ermənistanda narahatlıq doğurur. Azərbaycan düşmənin bundan sonra təxribatlarına daim hazır olmalıdır. Regionda cərəyan edən hadisələr Azərbaycanın əleyhinə şimal tərəfdən formalaşır".
Vidadi ORDAHALLI