Nəzakət Məmmədova: "Bu məsələ məni o qədər narahat edir ki, dünya nə üçün Zəhranın qətlinə Aylanın ölümünə verdiyi reaksiyanı vermir?" Musa Qasımlı: "Belə yanaşma rüsvayçılıqdır" Mənsum İbrahimov: "Dünyanın gözü qarşısında körpə qətlə yetirilib, ancaq hər gün "ədalət" deyə bağıran dünya susur" Əjdər Ağayev: "Biz də gecikmədən Zəhranın müsibətini bütün dünyaya bəyan etməliyik ki, ermənilər uşaqlarımızı qətlə yetirir" Xeyrəddin Qoca: "Biz özümüz çalışmalıyıq ki, bu müsibət dünya ictimaiyyətinə çatdırılsın"
Bir körpənin ah-naləsi dünyaya yayılmadımı görəsən? Namərd erməni əsgərinin atdığı top mərmisindən 2 yaşlı Zəhranın həyatına son qoyuldu, gözəl arzuları beşiyində boğuldu. Amma hələ də dünya susur, bu sükut bəs nə zaman pozulacaq görəsən?
Bir neçə gün əvvəl Füzuli rayonunun Alxanlı kəndində 2015-ci il təvəllüdlü Zəhra Elnur qızı Quliyeva erməni vandalizminin qurbanı olub. Açıq görsənən budur ki, düşmən ordu ordumuzla hesablaşmaqda aciz olduğu üçün hədəf kimi uşaqlarımızı, körpələrimizi seçir. 2 yaşlı Zəhranın ermənilər tərəfindən qətlə yetirilməsi şokunu bütün Azərbaycan cəmiyyəti, ictimaiyyəti dərin sarsıntı ilə yaşayır. Hələ də gözlərdə yaş, dillərdə "təəssüf" var.
Bu gün hamımız 2 yaşlı Zəhranın şəhidliyinin ağrısını çəkirik. Amma dünya bizim bu ağrıya reaksiya vermək əvəzinə sakit-sakit tamaşa edir. Bir körpə dünyanın gözü qarşısında vəhşiliklə qətlə yetirilib, ancaq dünya mediası bunu əsas gündəm xəbərinə çevirməyib.
2015-ci ildə, elə Zəhranın doğulduğu ildə dəniz yolu ilə Türkiyədən Yunanıstana keçmək istəyən suriyalı qaçqınların qayığı çevrilmiş və nəticədə 3 yaşlı körpə Aylan Kurdi dənizdə boğulmuşdu. Dalğalar uşağın cəsədini Bodrumda dəniz kənarına çıxarmışdı. A.Kurdinin ölümü bütün dünya mediasında əsas xəbər sırasına başçılıq etdi. Dünya mediasının səyi nəticəsində bu xəbər hər yerə yayıldı, hətta ən ucqar kəndlərdə belə Kurdinin faciəli ölümü insanları yandırdı. O körpənin fotoları tirajlanaraq dünyanın hər yerinə çatdırıldı. 2 yaşlı Zəhranın müsibətinə isə dünya soyuq yanaşır. Zəhra atəşkəs rejimində düşmən mərmisindən dünyasını dəyişib, qəsdən öldürülüb.
Hər iki körpənin öldüyü şərait fərqlidir, onların vəfat taleyi də oxşar deyil. Zəhra evinin içində, həyətində, kəndində düşmən mərmisinə tuş gəlib, Kurdi isə taleyin oynadığı tərs oyunun qurbanı olub. Amma dünya Zəhra Quliyeva və Aylan Kurdiyə fərqli münasibət sərgiləyir.
Bunun səbəbini izah edən ekspertlər bildirir ki, Zəhranın erməni ordusunun əsgəri tərəfindən qətlə yetirilməsinə reaksiyanın olmaması dünya ictimaiyyətinin Azərbaycana qarşı ikili yanaşması ilə bağlıdır. Mövzu ilə bağlı fikirlərini öyrəndiyimiz ekspertlər, ziyalılar hesab edir ki, dünya gözündəki pərdəni qaldırıb 2 yaşlı Zəhranın müsibətini görməli və media orqanlarında işıqlandırmalıdır.
Azərbaycan Respublikası "Xatirə kitab"ı redaksiyasının baş redaktoru, tanınmış şairə Nəzakət Məmmədova bizimlə söhbətində bildirdi ki, 2 yaşlı Zəhra Quliyevanın düşmən gülləsi ilə qətlə yetirilməsi onu əməlli-başlı sarsıdıb. N.Məmmədovanın sözlərinə görə, Zəhranın qətlinə Azərbaycan anaları, qadınları, zərif cinsin tanınmış nümayəndələri fəryad qoparmalıdır ki, nəhayət ki, dünya eşitsin: "Zəhranın müsibətinə susqunluqla yanaşılmamalıdır. Mən özüm həddindən artıq sarsılmışam, heç özümə gələ bilmirəm. 2 yaşlı günahsız körpənin qətlinə Azərbaycan anaları fəryad qoparmalıdır. Qadınlarımız öz səslərini dünyaya çatdırmalı, dünya anaların ah-fəryadını eşitməlidir.
Erməni hər gün dinc əhaliyə güllə atıb mülki şəxsləri hədəfə alır, körpələrimizi qətlə yetirir. Görün, indiyə kimi nə qədər uşağımız erməni vandalizminin qurbanı olub. Atəşkəs rejimi olsa da, ermənilər uşaqlarımızı hədəfə alır".
N.Məmmədovanın bildirdiyinə görə, Zəhra qətlə yetirildiyi gündən o içində qeyri-ixtiyari olaraq Zəhra ilə Aylanı müqayisə edib və dünya ictimaiyyətinin, mediasının ikincinin müsibətinə daha çox reaksiya verməsinin səbəbləri haqqında düşünüb: "İnanın, bu məsələ məni o qədər narahat edir ki, dünya nə üçün Zəhranın qətlinə Aylanın ölümünə verdiyi reaksiyanı vermir? Doğrudur, dünya bizə ikili standartla yanaşır. 2 yaşlı körpənin qətlinə münasibətdə də bu özünü aydın şəkildə büruzə verdi. Suriyalı körpənin ölümünü bütün dünyaya yaydılar. Yadımdadır ki, o körpənin cəsədini ləpə vurub sahilə çıxarmışdı, hətta onun ayağının birində ayaqqabı vardı, o birində yox idi. Onun fotosu hamımızın ürəyini parçaladı. Amma həm Zəhranın faciəsi, həm ondan əvvəl ermənilərin qətlə yetirdiyi körpələrin ölümünə dünya reksiyasız ötüşür. Bunun səbəbi araşdırılmalıdır.
İranda yaşayan soydaşlarımızın Zəhranın qətlinə münasibəti çox sərtdir. Dünən səhər o tayda çap olunan "Xudafərin" jurnalının baş redaktoru Hüseyn Şərqi ilə telefonla danışdım. Soruşdum ki, səsiniz nə üçün batıb? Cavab verdi ki, Nəzakət xanım, biz gecə-səhərə yatmayıb küçələrə axışıb Zəhranın qətlinə dünyanın reaksiya verməsi üçün petisiya toplayırıq, Zəhranın qanı yerdə qalmamalıdır, onu qətlə yetirənlər cəzasını almalıdır. Hüseyn Şərqi dedi ki, Tehranda petisiya üçün çoxlu səs toplanıb, onlar o sənədi lazımi təşkilatlara təqdim edəcək. Artıq o taydakı soydaşlarımız ayağa durub bu qətli törədənləri lənətləyir. Onlar səsimizi dünyaya çatdırmaq üçün mübarizə aparır. Soydaşlarımız dünyanı səsini səsimizə qoşmağa çağırır.
Amma bizim cəmiyyətdə, ictimaiyyətdə Zəhranın qətlilə bağlı lazımi etirazı, reaksiyanı görmürəm. Çox təəssüf ki, belədir. Özümüz haqqımızı tələb etməliyik. Məni incidən bilirsiniz nədir? Hətta oxudum ki, Zəhra və nənəsi dəfn ediləndə ATƏT-in fəaliyyətdə olan sədrinin şəxsi nümayəndəsi Anjey Kaspşik oradan keçirmiş və o da orada ayaq saxlayıb dəfnin gedişatını gözləri ilə görüb. ATƏT-in nümayəndəsinin də şahid olduğu bir hadisəyə dünya ictimaiyyəti niyə reaksiya vermir, niyə susurlar? Əslində, Zəhranın qətli dünya mediasında baş xəbər olmalıdır. Bizim körpəmizin müsibəti, analarımızın fəryadı dünyaya yayılmalıdır".
Millət vəkili, professor Musa Qasımlının məsələyə münasibəti belədir: "Təcavüzkar ölkənin bu qanlı əməlinə qiymət verilməməsi erməni təəssübkeşliyi, lobbi və diaspor fəaliyyətinin nəticəsi və ikili standartların nümunəsidir. Belə yanaşma rüsvayçılıqdır. Beynəlxalq təşkilatlar bu hərəkətləri ilə özlərini tamamilə gözdən düşürür".
Azərbaycan Respublikasının xalq artisti, "Şöhrət" ordenli, professor Mənsum İbrahimov "Bakı-Xəbər"ə açıqlamasında Zəhranın müsibətindən sarsıldığını bildirdi: "Bu xəbəri eşidəndən özümə gələ bilmirəm. Bilirsiniz ki, qarabağlıyam, mütəmadi olaraq ora ilə maraqlanıram, əlaqələrim var. Ermənilər torpaqlarımızın 20 faizdən artığını işğal edib, mülki şəxsləri, körpələrimizi qətlə yetirir. Körpə balalarımızın günahı nədir ki, erməni ona silah tuşlayır? Ermənilərin törətdiyi bu qətl hadisəsi yerə-göyə sığası deyil. Vallah bunu bəndə götürsə də, Allah götürməz. Dünyanın gözü qarşısında körpə qətlə yetirilib, ancaq hər gün "ədalət" deyə bağıran dünya susur. Haqq-ədalətdən danışanların bu faciəyəyə göz yumması qətiyyən qəbul edilən deyil. Mən bu yanaşmaya çox əsəbləşirəm. Bu qədər ədalətsizlik olmaz. Dünya öz ədalət hissini, ölçüsünü itirib. 2 yaşlı körpə düşmən ordusu tərəfindən qətlə yetirilir, amma reaksiya yoxdur. Dünya birliyi ya bu işə əncam çəksin, ya da biz özümüz düşmənə gücümüzü göstərək. Güclü ordumuz var, torpaqlarımızı işğaldan azad etməyə qadirik. Beynəlxalq təşkilatların nümayəndələri bizim ölkəmizə "sülh yaratmaq" adı ilə turist kimi gəlir. Belə olmaz! Görmürlər ki, 2 yaşlı günahsız körpəni erməni mərmisi parçalayıb. Mən dünyanın ədalətinə inanmıram. Əlac qalıb özümüzə. Ümidimiz özümüzə və qardaş Türkiyəyədir".
Zəhra ilə Aylanın müsibətinə dünyanın baxışını müqayisə edən sənətkar bildirdi ki, Zəhranın qətlinə dünyanın zəif reaksiya verməsinin kökündə bizə qarşı münasibət, aparılan çirkin siyasi oyunlar durur.
Respublika Təhsil Şurasının rəhbəri, professor Əjdər Ağayevin fikrincə, bu faciə erməni vandalizminin, erməni xislətinin yeni nümunəsidir: "Ermənilər aşətkəs şəraitində belə, əhalini hədəfə alır, hətta uşaqlarımızı qətlə yetirir. Erməni düşmənçiliyi bizə qarşı bütün dünyada davam edir. Zəhranın qətli ilə bağlı dünyanın müəyyən ölkələri reaksiya verdi, amma bu bizi qaneedəcək səviyyədə olmadı. Çünki bu informasiyanın dünyada qarşısının alınması üçün ermənilər, erməni lobbisi ciddi işlər görür. Dünya ictimaiyyəti bu faciəyə kütləvi şəkildə reaksiya verməyib. Bəlkə də informasiya geniş şəkildə yayıldıqdan sonra buna reaksiyalar olacaq. Bütün dünya bu faciəyə reaksiya verməlidir. Düşünürəm ki, Zəhranın qətli ilə bağlı xəbər ən müxtəlif dillərdə xarici ölkələrə yayılmalıdır. Bu faciəni törədənlər ancaq belə ifşa oluna bilər. Azərbaycan mediası, QHT-ləri, ziyalıları bu məsələdə susmamalıdır. Ən müxtəlif dillərdə bülletenlər, məlumatlar hazırlanıb beynəlxalq təşkilatlara, dünyanın nüfuzlu media qurumlarına təqdim edilməlidir. Biz özümüz deyib özümüz eşitməklə heç nəyə nail ola bilmərik. Biz Respublika Təhsil Şurası olaraq Zəhranın faciəli şəkildə erməni ordusu tərəfindən qətlə yetirilməsi ilə bağlı əməkdaşlıq etdiyimiz beynəlxalq təhsil qurumlarına, dünya müəllimlərinə, dünya valideynlərinə bir neçə dildə müraciətlər hazırlayırıq. Yəqin ki, tezliklə o müraciəti dünya ictimaiyyətinə çatdıracağıq. O ki, qaldı suriyalı uşaqla 2 yaşlı körpəmizin faciəsinə dünyanın eyni cür reaksiya verməməsinə, suriyalı qaçqın uşağın müsibətini görənlər onu operativ şəkildə dünyanın anlayacağı dildə çatdırıb. Onlar xəbəri daha tez çatdırıb. Biz də gecikmədən Zəhranın müsibətini bütün dünyaya bəyan etməliyik ki, ermənilər uşaqlarımızı qətlə yetirir".
Professor hesab edir ki, Zəhra Quliyevanın fotoları tirajlanaraq bütün dünya mediasına, beynəlxalq qurumlara göndərilməlidir.
Yazıçı-dramaturq Xeyrəddin Qoca da bizimlə söhbətində bildirdi ki, Zəhra Quliyevanın ermənilər tərəfindən qətlə yetirilməsi hadisəsinin dünya ictimaiyyətində reaksiya doğurması üçün çalışmalıyıq: "Biz özümüz çalışmalıyıq ki, bu müsibət dünya ictimaiyyətinə çatdırılsın. Diplomotik korpuslara, səfirliklərə, beynəlxalq qurumlara müraciət edib onları ayağa qaldırmalıyıq".
İradə SARIYEVA