Baş direktor cənab İv Biqonun və İnformasiya Departamentinin direktoru cənab Andre Qrettenandın nəzərinə:
"Cənablar,
Bu müraciətimlə 22 iyun 2017-ci il tarixdə özünü Fransada "Dağlıq Qarabağın nümayəndəsi" kimi təqdim edən Hovanes Gevorkyanın iştirakı ilə "TV5 Monde" telekanalında "64 dəqiqə, Frankofoniya" verilişində efirə getmiş reportaja münasibətimi bildirirəm.
Sizin üçün dəqiqləşdirmək istəyirəm ki, Dağlıq Qarabağ münaqişəsi 80-ci illərin sonlarında Ermənistanın Azərbaycana qarşı irəli sürdüyü ərazi iddiaları nəticəsində başlayıb və Azərbaycan ərazilərinin qanunsuz olaraq Ermənistan tərəfindən işğalına gətirib çıxarıb.
Dağlıq Qarabağ 1991-ci ilin sentyabrında keçirilmiş və nə Azərbaycan hakimiyyəti və Azərbaycan xalqı tərəfindən, nə də beynəlxalq ictimaiyyət tərəfindən tanınan mübahisəli bir referendum nəticəsində "müstəqil respublika elan olunub. Ermənistanın özü də daxil olmaqla, heç bir dövlət Dağlıq Qarabağın müstəqilliyini tanımayıb. Etnik təmizləmə ilə müşayiət olunmuş bu qanlı münaqişə minlərlə insanın qaçqın və didərginə çevrilməsinə səbəb olub ki, bu gün Azərbaycan hakimiyyəti onların problemlərinin həlli ilə məşğuldur. 106-sı qadın və 63-ü uşaq olmaqla 613 nəfər mülki şəxsin vəhşicəsinə qətli və minlərlə sakinin əsirə çevrilməsi ilə nəticələnmiş Xocalı qırğını buna təsirli misaldır.
Regionda sülh yaratmaq və Dağlıq Qarabağ münaqişəsini həll etmək məqsədilə Avropada Təhlükəsizlik və Əməkdaşlıq Təşkilatı (ATƏT) 1992-ci ildə Fransanın, Rusiyanın və Birləşmiş Ştatların həmsədrliyi ilə Minsk Qrupunu yaradıb. Amma Ermənistan bu günə qədər bu münaqişəin həlli istiqamətində bütün danışıqlardan yayınır.
Həmçinin Avropa Şurası Parlament Assambleyası və ATƏT-lə birlikdə Azərbaycanın ərazi bütövlüyünü tanıyan Birləşmiş Millətlər Təşkilatı da bu işğalı qanunsuz hesab edir. Beləliklə, BMT Təhlükəsizlik Şurasının 1993-cü ildə qəbul etdiyi dörd qətnamə (822, 853, 874, 884 saylı) Azərbaycana qarşı güc tətbiqini və onun ərazilərinin işğalını pisləyir, Azərbaycanın suverenliyini və ərazi bütövlüyünü bir daha təsdiqləyir. Bu qətnamələr işğalçı qüvvələrin dərhal və bütünlüklə işğal olunmuş Azərbaycan torpaqlarından heç bir şərt irəli sürmədən geri çəkilməsini tələb edir.
Münaqişənin əvvəlindən bəri Fransada faktların yalnız bir versiyası təqdim olunub və biz təəssüf edirik ki, Dağlıq Qarabağın öz doğma torpaqlarından qovulmuş azərbaycanlı icması tamamilə görməzliyə vurulur.
Azərbaycan əsilli fransız olaraq mən özüm bu hərbi işğaldan canı qurtulmuşlardan və həmin işğal olunmuş rayonlardan qaçqın düşmüşlərdən biri kimi öz adımdan, Dağlıq Qarabağın azərbaycanlı icması adından və eləcə də bir milyonluq qaçqın və didərginin adından Hovanes Gevorkyanın sizin verilişinizdəki çıxışına etiraz edirəm.
Biz çox inanırıq ki, sizin kanal Azərbaycan tərəfə də öz mövqeyini ifadə etmək imkanı verəcək və mən Ermənistandan, Dağlıq Qarabağdan və Azərbaycanın digər bölgələrindən qovulmuş qaçqın və köçkünlərin, həmçinin hərbi təcavüzün qurbanına çevrilmiş bütün azərbaycanlıların nümayəndəsi kimi onları təmsil etməyə hazıram.
Təəssüflər olsun ki, mülki əhaliyə qarşı təcavüz hər gün davam edir və Ermənistan Respublikasının silahlı qüvvələrinin bu günlərdə, iyulun 4-də Azərbaycanın Füzuli rayonunun Alxanlı kəndinin mülki əhalisini hədəf seçərək insan ölümü ilə nəticələnmiş yeni hərbi provokasiyası buna misaldır. Bu sonuncu təxribat zamanı 2 yaşlı körpə qızcığaz və onun nənəsi öldürülüb, digər bir mülki qadın yaralanıb və çoxlu sayda mülki obyektə ziyan vurulub.
Sizə səmimi salamlarımı və xoş münasibətimi yetirərək, ümid edirəm ki, sizinlə üzbəüz görüşüb fikirlərimi bölüşmək imkanım olacaq".
Səmimiyyətlə,
Mirvari FƏTƏLİYEVA Paris Azərbaycan Evinin prezidenti