İyulun 4-də Ermənistan silahlı qüvvələrinin Azərbaycanın Füzuli rayonunun Alxanlı kəndinin mülki əhalisini atəşə tutması nəticəsində 1967-ci il təvəllüdlü Sahibə Quliyeva və onun nəvəsi, 2 yaşlı Zəhra Quliyevanın öldürülməsi ilə bağlı ABŞ-ın Arizona ştatının Nümayəndələr Palatasının üzvü Donald Şuter Ermənistan prezidenti Serj Sarkisyana açıq məktub ünvanlayıb. Məktubun bir surəti Azərbaycanın Los Ancelesdəki Baş Konsulluğuna göndərilib.
Azərbaycan Xarici İşlər Nazirliyindən baki-xeber.com-a verilən məlumata görə, məktubda mülki vətəndaşların, xüsusilə də uşaqların qətlə yetirilməsinin tamamilə qeyri-məqbul olduğu və beynəlxalq hüquq normalarını ciddi şəkildə pozduğu qeyd olunur.
Ermənistan-Azərbaycan münaqişəsi barədə danışan D.Şuter Azərbaycanın suveren ərazisinin 20%-nin Ermənistan tərəfindən işğal edilməsini və etnik təmizləməyə məruz qoyulmasını çağdaş Avropa tarixinin ən qara səhifələrindən biri adlandırır. O, bu ədalətsizliyin yüz minlərlə azərbaycanlı məcburi köçkünün məşəqqətinə səbəb olmaqda davam etdiyini ürək ağrısı ilə vurğulayır.
Münaqişə zamanı azərbaycanlı mülki əhaliyə qarşı Ermənistan qoşunları tərəfindən müxtəlif qəddarlıqların törədildiyini qeyd edən D.Şuter bu səpkidə Xocalı qətliamını diqqətə çatdırır. O qeyd edir ki, yüzlərlə uşaq, qadın və yaşlıların qətlə yetirildiyi bu qətliam müharibə və münaqişələrin mülki şəxslərə vurduğu böyük ziyanların bariz göstəricisidir.
Azərbaycanın işğal olunmuş ərazilərindən erməni qoşunlarının dərhal və qeyd-şərtsiz çıxarılmasını tələb edən BMT Təhlükəsizlik Şurasının müvafiq qətnamələrinin indiyədək yerinə yetirilməməsinin təəssüf doğurduğunu qeyd edən D.Şuter bu münaqişənin bu gün Cənubi Qafqazdakı təhlükəsizliyə ən böyük təhdid təşkil etdiyini vurğulayır.
Sonda mülki əhalinin hədəfə alınmasını tamamilə qəbuledilməz olduğunu vurğulayan D.Şuter balaca Zəhra və onun nənəsinin öldürülməsini qətiyyətlə pislədiyini bildirərək, Ermənistan prezidentini bu dəhşətli cinayəti pisləməyə və bu cinayəti törədənləri tezliklə taparaq məsuliyyətə cəlb etməyə, eləcə də belə faciələrin təkrarlanmaması üçün müvafiq tədbirləri görməyə çağırır.
Avroparlamentin üzvləri Ermənistandan mülki əhalini hədəfə almağı tez bir zamanda dayandırmağı tələb etdi
Avropa Parlamentinin üzvləri fransalı Rəşidə Dati, sloveniyalı İvo Vayql və latviyalı İveta Qriqule Azərbaycanın Füzuli rayonunun Alxanlı kəndində Ermənistan silahlı qüvvələrinin törətdiyi təxribat barədə mətbuata açıqlama verib.
"Trend"in məlumatına görə, parlamentarilər Ermənistandan zorakılığı dayandırmağı və mülki şəxsləri hədəfə almamağı tələb edib: "Azərbaycanın Füzuli rayonunun Alxanlı kəndində Ermənistan silahlı qüvvələrinin törətdiyi təxribat nəticəsində iki mülki şəxs həlak olub. Biz qurbanların ailə üzvlərinə dərin hüznlə başsağlığı verir və bütün Azərbaycan xalqına dəstəyimizi bəyan edirik".
Qeyd olunur ki, günahsız insanların ölümü, qeyri-insani akt dayandırılmalıdır. Münaqişənin həllində beynəlxalq hüququn norma və prinsiplərinə riayət olunmalıdır. Zorakılıq heç vaxt həll yolu ola bilməz.
Açıqlamada bildirilir ki, ATƏT-in Minsk Qrupu tərəflərdən hərbi aktları dayandırmağı tələb edir: "Biz isə ATƏT-dən mülki əhalinin müdafiəsi, eləcə də Azərbaycanın ərazi bütövlüyünə riayət edilməsi istiqamətində daha konkret öhdəlik götürməsini tələb edirik".
Parlamentarilər Ermənistandan əsassız və qanunsuz siyasi tələblər üçün mülki əhalini hədəfə almağı tez bir zamanda dayandırmağı tələb ediblər.
İtalyan siyasətçi də Ermənistanın Azərbaycan vətəndaşlarına qarşı təcavüzünü pislədi
İtaliya parlamentinin Deputatlar Palatasının üzvü Xalid Çauki Ermənistan silahlı qüvvələrinin iyulun 4-də təxribatı nəticəsində mülki azərbaycanlı əhaliyə qarşı törədilmiş cinayətləri pisləyən bəyanat verib.
"Trend"in məlumatına görə, hakim Demokratik Partiyadan olan deputat, xarici əlaqələr daimi komissiyasının üzvü X.Çauki qeyd edib ki, Ermənistan silahlı qüvvələri tərəfindən Azərbaycanın Füzuli rayonunun Alxanlı kəndində bir qadının və onun nəvəsinin öldürülməsi, digər bir mülki şəxsin yaralanması və mülki obyektlərə ziyan vurulması ilə nəticələnən hücumla bağlı yeni xəbərlər dərin narahatlıq doğurur və Dağlıq Qarabağ münaqişəsinin dondurulmuş münaqişə olmadığını göstərir: "Biz Ermənistan tərəfindən törədilən təcavüz aktını qəti və kəskin şəkildə qınayırıq, ziyan çəkən mülki əhali ilə tam həmrəyliyimizi ifadə edirik. Ümid edirik ki, ATƏT-in Minsk Qrupunun səyləri ilə Ermənistan qoşunlarının Azərbaycanın işğal edilmiş ərazilərindən çıxarılması və azərbaycanlı məcburi köçkünlərin öz doğma evlərinə qayıtması zərurətindən başlamaqla, sülh danışıqlarını yenidən bərpa etmək mümkün olacaq".
Bəyanat Demokratik Partiyanın rəsmi internet səhifəsində və İtaliya milli xəbər agentliyi - ANSA tərəfindən yayılıb.
İran spikerinin müşaviri erməni qoşunları tərəfindən dinc sakinlərin öldürülməsini mühakimə etməyə çağırdı...
Erməni qoşunları tərəfindən iki Azərbaycan vətəndaşı, o cümlədən bir uşağın öldürülməsi mühakimə olunmalıdır. Bunu "Trend"ə İran parlamenti spikerinin müşaviri Mənsur Həqiqətpur deyib.
O qeyd edib ki, dinc sakinlər siyasi mübahisələrin qurbanı olmamalıdır: "Dağlıq Qarabağ tarixən Azərbaycana məxsusdur".
M.Həqiqətpur, həmçinin Azərbaycan hökumətini Dağlıq Qarabağ münaqişəsinə son qoymaq üçün qəti addımlar atmağa çağırıb.
İtaliya parlamentinin üzvləri Ermənistanın təxribatını pisləyən bəyanatlar veriblər
İtaliya parlamentinin Deputatlar Palatasının üzvləri Kristina Bargero və Xalid Çauki, habelə Senatın üzvü Vito Petroçelli Ermənistan silahlı qüvvələrinin iyulun 4-də təxribatı nəticəsində mülki azərbaycanlı əhaliyə qarşı törədilmiş cinayətləri pisləyən, eləcə də Ermənistanın işğalçı siyasətini qınayan bəyanatlar veriblər.
Azərbaycanın İtaliyadakı səfirliyindən "Trend"ə verilən məlumata görə, iqtidar Demokratik Partiyadan olan deputat Kristina Bargero bildirib ki, bu gün daha bir körpənin həyatından qəddarlıq nəticəsində məhrum olması xəbərini almaq və hələ də aktiv fazada qalmaqda davam edən Ermənistan-Azərbaycan münaqişəsi barədə az yazan bir çox mətbuat orqanlarının laqeydliyini görmək çox ağrılıdır. "Ermənistan qoşunlarının Azərbaycanın işğal olunmuş torpaqlarından çıxarılmasını və azərbaycanlı məcburi köçkünlərin öz yurd-yuvalarına qayıtmasını tələb edən çoxsaylı beynəlxalq sənədlərə, o cümlədən BMT-nin Təhlükəsizlik Şurasının 4 qətnaməsinə məhəl qoymayan və Azərbaycan torpaqlarını işğal altında saxlamaqda davam edən Ermənistanın silahlı qüvvələri tərəfindən iki yaşlı körpə qətlə yetirilib", - deyə italiyalı deputat vurğulayıb.
Deputat K.Bargero Ermənistanın ən tez zamanda öz qoşunlarını işğal olunmuş ərazilərdən çıxaracağına və beynəlxalq ictimaiyyəti aldatmağa son qoyacağına ümid etdiyini bildirib. "İtaliya hökuməti isə gələn il ATƏT-ə sədrliyi dövründə konstruktiv danışıqlar vasitəsilə uzunmüddətli sülhün bərqərar olunması yolunda fəaliyyət göstərməlidir",- deyə Kristina Bargero fikirlərini tamamlayıb.
Hakim Demokratik partiyadan olan digər deputat, xarici əlaqələr daimi komissiyasının üzvü Xalid Çauki isə qeyd edib ki, Ermənistan silahlı qüvvələri tərəfindən Azərbaycanın Füzuli rayonunun Alxanlı kəndində bir qadının və onun nəvəsinin öldürülməsi, digər bir mülki şəxsin yaralanması və mülki obyektlərə ziyan vurulması ilə nəticələnən hücumla bağlı yeni xəbərlər dərin narahatlıq doğurur və Dağlıq Qarabağ münaqişəsinin dondurulmuş münaqişə olmadığını göstərir. O deyib: "Biz Ermənistan tərəfindən törədilən təcavüz aktını qəti və kəskin şəkildə qınayırıq, ziyan çəkən mülki əhali ilə tam həmrəyliyimizi ifadə edirik. Ümid edirik ki, ATƏT-in Minsk Qrupunun səyləri ilə Ermənistan qoşunlarının Azərbaycanın işğal edilmiş ərazilərindən çıxarılması və azərbaycanlı məcburi köçkünlərin öz doğma evlərinə qayıtması zərurətindən başlamaqla, sülh danışıqlarını yenidən bərpa etmək mümkün olacaq".
İtaliya Senatında 5 ulduz hərəkatı partiyasının təmsilçisi, Senatın xarici əlaqələr daimi komissiyasının üzvü Vito Petroçelli isə bildirib ki, beynəlxalq ictimaiyyət Ermənistan-Azərbaycan, Dağlıq Qarabağ münaqişəsinin həlli ilə məşğul olmağa başlamalıdır. İtalyan senator deyib ki, 30 ilə yaxın davam edən bu müharibə ilə bağlı həm BMT, həm də ATƏT öz rəylərini dəfələrlə bildirib və dünən də bir qadın və bir körpənin həyatını itirməsinə münasibətdə susqunluq hökm sürür.
Deputatlar Kristina Bargero və Xalid Çaukinin bəyanatları mənsub olduqları Demokratik partiyanın rəsmi internet səhifəsində və İtaliya milli xəbər agentliyi-ANSA tərəfindən yayılıb, senator Vito Petroçellinin bəyanatı isə ANSA agentliyində yerləşdirilib.
Belarus prezidenti Alxanlı qətliamı barədə...
Belarus prezidenti Aleksandr Lukaşenko iyulun 4-də erməni silahlı birləşmələrinin Füzuli rayonunun Alxanlı kəndini minaatanlardan atəşə tutması nəticəsində, azyaşlı da daxil olmaqla, 2 nəfərin ölümü və daha 1 nəfərin yaralanması ilə bağlı təəssüfünü bildirib. "Trend"in məlumatına görə, bu barədə Azərbaycan Parlamentinin vitse-spikeri Bahar Muradova "Facebook" səhifəsində qeyd edib.
B.Muradova qeyd edib: "Belarus Prezidenti A.T.Lukaşenko ilə ATƏT PA-nın 26-cı illik sessiyasının rəsmi açılış mərasimindəki ayaqüstü qısa görüşümüz zamanı ilk sözü təmas xəttində baş verən insident barədə oldu. Azərbaycanın yüksələn xətlə inkişafını vurğulayan prezident baş verən hadisədən məlumatlı olduğunu bildirərək təəssüfünü ifadə etdi".
Növbəti erməni təxribatı Dağlıq Qarabağ münaqişəsinin dondurulmuş olmadığını bir daha sübut edir
Fransalı senator belə dedi
Növbəti erməni təxribatı Dağlıq Qarabağ münaqişəsinin dondurulmuş olmadığını bir daha sübut edir. "Trend"in məlumatına görə, bu barədə erməni vəhşiliyi nəticəsində Füzuli rayonu Alxanlı kəndində Sahibə Quliyeva və onun iki yaşlı nəvəsi Zəhra Quliyevanın qətlə yetirilməsi ilə bağlı Avropa Azərbaycan Cəmiyyətinin (TEAS) Fransa ofisi tərəfindən verilən sorğuya cavab olaraq Fransa-Qafqaz Dostluq Qrupunun sədri senator Andre Reyşar (Andre Reichardt) bəyanat verib.
O qeyd edib: "Günahsız dinc sakinlərin qətlə yetirilməsi barədə xəbər məni çox kədərləndirdi. Azyaşlı uşağın qətlə yetirilməsi xəbərinin isə mənə xüsusi təsiri oldu. Mən Azərbaycan ailələri və hakimiyyətinə dərin hüznlə başsağlığı verirəm. Bu dramatik hadisə Dağlıq Qarabağ münaqişəsinin dondurulmuş olmadığını bir daha sübut edir. Bu o deməkdir ki, Dağlıq Qarabağ münaqişəsi sülh yolu ilə ədalətli və təxirəsalınmaz şəkildə həll olunmalıdır. Mən bunları Avropa Azərbaycan Cəmiyyətinin Azərbaycandakı qaçqın və məcburi köçkünlərlə bağlı bu yaxınlarda təşkil etdiyi konfransda da demişəm. Təsadüfi deyil ki, Prezident Emanuel Makron bu məsələni hər zaman diqqət mərkəzində saxlayır".
A.Reyşar bildirib ki, Fransa ATƏT-in Minsk qrupunun digər həmsədrləri Rusiya və ABŞ ilə birlikdə bu münaqişənin sülh yolu ilə həllinin sürətləndirilməsinin tərəfdarıdır və bunun üçün öz töhfələrini verməkdədir: "Münaqişə ərazisindən Ermənistan silahlı qüvvələrinin çıxarılması münaqişənin sülh yolu ilə həll edilməsinin əsas şərtidir. Mən Azərbaycan Ordusunun qisas almaq niyyətindən və bunun yeni hərbi toqquşmalara səbəb olacağından qorxuram".
Lord Kilkluney ermənilərin dinc sakinləri qəsdən hədəfə almasını mənfur hərəkət adlandırdı
Ermənilərin dinc sakinləri qəsdən hədəfə alması mənfur hərəkətdir. "Trend"in məlumatına görə, bunu iyulun 4-də Ermənistan silahlı qüvvələrinin Azərbaycanın Füzuli rayonunun Alxanlı kəndinin mülki əhalisini atəşə tutması nəticəsində Quliyeva Sahibə və onun iki yaşlı nəvəsi Quliyeva Zəhranın həlak olması barədə Avropa Azərbaycan Cəmiyyətinin (TEAS) sorğusuna cavab olaraq Böyük Britaniya parlamentinin üzvü Lord Kilkluney deyib.
L.Kilkluney qeyd edib: "Mən regionda dəfələrlə səfərdə olmuşam və münaqişənin həll yolunun diplomatik ola biləcəyindən əminəm. Təmas xəttində baş verən istənilən insan tələfatı təəssüf hissi doğurur. Lakin iki insanın ölümü ilə nəticələnən dinc sakinlərin qəsdən hədəfə alınması mənfur hərəkətdir".
NATO erməni təxribatı nəticəsində ölən azərbaycanlıların ailələrinə başsağlığı verib
NATO Azərbaycanın dinc vətəndaşlarına qarşı erməni hərbi təxribatı nəticəsində ölənlərin ailələrinə başsağlığı verib. NATO-nun mətbuat xidmətindən "Trend"in sorğusuna cavab olaraq bildiriblər: "Biz bu faciənin qurbanlarının ailələrinə başsağlığı veririk".
Qeyd olunub ki, Alyans ATƏT-in Minsk Qrupu həmsədrlərinin Dağlıq Qarabağ münaqişəsinin tərəflərinə hərbi fəaliyyəti dayandırmaq və danışıqlar masasına qayıtmaqla bağlı çağırışını dəstəkləyir:
"Dağlıq Qarabağ münaqişəsinin hərbi yolla həlli yoxdur. NATO bu münaqişənin nizamlanması üzrə danışıqlarda birbaşa rol oynamır. Biz Minsk Qrupu çərçivəsində bu istiqamətdə səyləri dəstəkləməyə davam edirik. Bununla belə, biz tərəfləri substantiv danışıqlarda iştirak etməyə Dağlıq Qarabağ münaqişəsinin sülh yolu ilə nizamlanmasına nail olmağa çağırırıq".
Britaniyalı parlamentarilər balaca Zəhranın qatillərinə qarşı...
Ermənilərin dinc azərbaycanlıları qətlə yetirməsi sülh danışıqların pozulmasına yönəlmiş addımdır. "Trend"in məlumatına görə, bunu iyulun 4-də Ermənistan silahlı qüvvələrinin Azərbaycanın Füzuli rayonunun Alxanlı kəndinin mülki əhalisini atəşə tutması nəticəsində Quliyeva Sahibə və onun iki yaşlı nəvəsi Quliyeva Zəhranın həlak olması barədə Avropa Azərbaycan Cəmiyyətinin (TEAS) sorğusuna cavab olaraq Böyük Britaniya parlamentinin üzvü Mark Menzies deyib.
M.Menzies bildirib ki, regionda yaşayan insanların böyük əksəriyyəti münaqişənin sülh yolu ilə həllini istəyir: "İki yaşlı uşağın və onun nənəsinin qətlə yetirilməsi sülh danışıqların pozulmasına yönəlmiş bir addımdır".
Erməni qoşunları Azərbaycan ərazilərindən çıxarılmasa, insan tələfatı halları tez-tez baş verə bilər. "Trend"in məlumatına görə, bunu iyulun 4-də Ermənistan silahlı qüvvələrinin Azərbaycanın Füzuli rayonunun Alxanlı kəndinin mülki əhalisini atəşə tutması nəticəsində Quliyeva Sahibə və onun iki yaşlı nəvəsi Quliyeva Zəhranın həlak olması barədə Avropa Azərbaycan Cəmiyyətinin (TEAS) sorğusuna cavab olaraq Böyük Britaniya parlamentinin üzvü Baronessa Zahidə Mənsur deyib.
O, istənilən insan tələfatının faciə olduğunu bildirib: "Azyaşlı uşağın qətlə yetirilməsi isə xüsusilə ağırdır. Lakin erməni silahlı qüvvələri bu ərazilərdən çıxarılmasa və sülh danışıqları sürətlənməsə, belə hallar tez-tez baş verə bilər".
Fransa erməni təxribatı nəticəsində dinc azərbaycanlıların həlak olması ilə bağlı təəssüfünü bildirdi...
Fransa Ermənistan silahlı birləşmələrinin Füzuli rayonunun Alxanlı kəndini atəşə tutması nəticəsində dinc Azərbaycan vətəndaşlarının həlak olması ilə bağlı təəssüfünü bildirir. "Trend"in məlumatına görə, bu barədə Fransa Xarici İşlər Nazirliyinin bəyanatında deyilir.
Bəyanatda qeyd olunur: "Biz iyulun 4-də təmas xəttində Alxanlı kəndində insan ölümü ilə nəticələnən insidentdən təəssüf edirik. Fransa tərəfləri atəşkəs rejiminə riayət etməyə çağırır".
Bildirilir ki, Fransa əvvəlki kimi razılığa gəlinməsi və bu münaqişənin davamlı həlli üçün razılığın əldə olunmasına tam sadiqdir: "Bu bütün region üçün sabitliyi və çiçəklənməni təmin edəcək".
Almaniya Bundestaqının deputatı Katrin Albsteiger Zəhranın qatillərini ittiham etdi
İyulun 4-də Ermənistan silahlı qüvvələrinin Azərbaycanın Füzuli rayonun Alxanlı kəndinin mülki əhalisinin atəşə tutması, Quliyeva Sahibə və onun iki yaşlı nəvəsi Quliyeva Zəhranın həlak olması barədə Avropa Azərbaycan Cəmiyyətinin (TEAS) sorğusuna münasibət bildirən Almaniya Bundestaqının CDU/CSU koalisiyasından olan deputatı Katrin Albsteiger bəyan edib ki, BMT-nin məlum 4 qətnaməsinə görə, beynəlxalq hüquq Dağlıq Qarabağı Azərbaycanın tərkib hissəsi kimi tanıyır. Bu qətnamələrin yerinə yetirilməsi üçün Ermənistan Silahlı Qüvvələrinin işğal olunmuş ərazilərdən çıxarılması zəruridir.
Azərbaycan da daxil olmaqla, hər bir dövlətin ərazi bütövlüyü və siyasi müstəqilliyi toxunulmazdır. Dövlətlərin ərazi bütövlüyünün qorunması bütün beynəlxalq ictimaiyyətin marağında olmalıdır. Qaçqın və məcburi köçkünlərin öz yurd-yuvalarına qayıtmaq hüququ var. Onların öz yurdlarına qayıdışı yalnız Azərbaycanın ərazisi bütövlüyünün və toxunulmazlığının təmin edilməsi ilə mümkündür.
Avropa İttifaqı kimi Almaniya Federativ Respublikası da Dağlıq Qarabağ münaqişəsinin sülh yolu ilə həllinin tərəfdarıdır. O, regionda sülhün bərqərar olunması və Azərbaycanın ərazi bütövlüyünün bərpası üçün lazımi töhfələr verməyə hazırdır.
Almaniya Federativ Respublikası Dağlıq Qarabağ münaqişəsi zamanı baş verən zorakı toqquşmaları pisləyir, onların dərhal dayandırılmasını və atəşkəs razılaşmasına əməl olunmasını tələb edir. Mülki əhali zorakı toqquşmaların əsas qurbanı olmamalıdır.