Fikrət Sadıqov: "Düşünürəm ki, ermənilərin törətdiyi vəhşiliyin bu cür qiymətləndirilməsi bizim maraqlarımıza tam cavab verir"
"Son hadisədə bir uşağın ölümü bizi daha çox təəssüfləndirir, bu cinayətdir. Ermənistan silahlı qüvvələrinin Azərbaycan əhalisinə qarşı atdığı son addımlar bizdə ciddi təəssüf doğurub". Bunu keçirdiyi mətbuat konfransında İranın Azərbaycandakı səfiri Cavad Cahangirzadə erməni silahlı bölmələrinin Füzuli rayonunun Alxanlı kəndini atəşə tutması nəticəsində nənə və nəvənin ölümünə münasibət bildirərkən deyib.
Səfir bildirib ki, bu cür hadisələr Dağlıq Qarabağ münaqişəsinin həllini çətinləşdirir: "Azərbaycan dost, qardaş dövlətdir. Biz baş verən bu hadisəyə çox təəssüflənirik. Azərbaycan dövləti öz mülki vətəndaşlarına qarşı atılan qanunsuz addımları aidiyyəti beynəlxalq təşkilat və dairələr səviyyəsində araşdırmaq hüququna malikdir. Dağlıq Qarabağ münaqişəsinin tənzimlənməsi ilə məşğul olan ATƏT-in Minsk Qrupu üzərinə götürdüyü missiyanı yerinə yetirməlidir".
Diplomat, həmçinin, həlak olanların ailəsinə və Azərbaycan dövlətinə başsağlığı verib: "Mülki şəxslərə qarşı hərbi addım tərəfimizdən pislənir. Beynəlxalq qayda və qanunlar humanitar hüququn pozulmasını pisləyir. Ermənilər tərəfindən atılan bu cür təhrikedici addımlar münaqişənin siyasi və sülh yolu ilə həlli prosesinə heç bir köməklik göstərməyəcək və vəziyyəti daha da gərginləşdirəcək".
Göründüyü kimi, İran səfirinin bu məsələdə sərgilədiyi mövqe prinsipial xarakterlidir. O üzdən də bu yanaşma təqdir olunmalıdır.
Məsələyə münasibət bildirən keçmiş diplomat, politoloq Fikrət Sadıqov İranın Azərbaycandakı səfirinin bu məsələdə ortaya qoyduğu yanaşmaya müsbət prizmadan yanaşdı: "İran səfirinin belə münasibətini müsbət qiymətləndirmək lazımdır. Çünki biz bilirik ki, bəzi hallarda İran çox qəti mövqedə dayanmır. Ancaq bu məsələdə belə bir bəyanatın verilməsi bizi sevindirir. Çünki bu reallıqdır və beynəlxalq hüquq normalarına uyğun bir bəyanatdır. Onu da qeyd edim ki, məlum hadisədən sonra dünya birliyinin bir sıra nümayəndələri buna öz münasibətini bildirdi. İspaniya, Fransa və hətta İsrailin nümayəndələri, Rusiyada olan bəzi deputatlar çox kəskin surətdə Ermənistanı pisləyib. Bütün bunlar bizim xeyrimizə olan bəyanatlardır. Düşünürəm ki, ermənilərin törətdiyi vəhşiliyin bu cür qiymətləndirilməsi bizim maraqlarımıza tam cavab verir".
Vidadi ORDAHALLI