Arzuxan Əlizadə: "Şəraitə uyğun olaraq cəbhə bölgəsində düşmənə güclü əks zərbələr endirilməlidir"
Məlum olduğu kimi, işğalçı Ermənistan ordusu tərəfindən atəşkəs rejiminin pozularaq mülki sakinlərin öldürülməsi böyük rezonansa səbəb olub. Azərbaycanın Xarici İşlər Nazirliyi mətbuat xidmətinin rəhbəri Hikmət Hacıyev Ermənistanın bu addımını vandalizm aktı kimi qiymətləndirərək düşmən dövlətin terrorçu mahiyyətini bir daha sübut etdiyini bildirib.
"Ermənistanın siyasi-hərbi rəhbərliyinin ATƏT-in Minsk Qrupunun həmsədrlərinin və beynəlxalq təşkilatların münaqişənin həlli üçün substantiv danışıqlara çağırışlarına mülki şəxslərin qəddar şəkildə öldürülməsi ilə cavabı bir daha onu sübut edir ki, həmsədrlər beynəlxalq hüququn norma və prinsipləri və beynəlxalq təşkilatların qərar və qətnamələrinə uyğun olaraq Ermənistandan öz qoşunlarının tezliklə Azərbaycanın işğal olunmuş ərazilərindən çıxarılması və işğala əsaslanan status-kvonun dəyişdirilməsini tələb etməlidir".
Ermənistanın işğalçı davranışı və terrorçuluq fəaliyyəti davam etdirilsə də, Azərbaycan tərəfi münaqişənin danışıqlar yolu ilə həllindən də imtina etmir.
Qeyd edək ki, Azərbaycan xarici işlər naziri Elmar Məmmədyarovun erməni həmkarı Edvard Nalbandyanla iyulun 11-də Avstriyanın Mauerbax şəhərində görüşü planlaşdırılıb. O da məlumdur ki, Ermənistan danışıqlarda daha çox atəşkəsin möhkəmləndirilməsini gündəliyə salmağa çalışır. Bundan fərqli olaraq Azərbaycan isə konkret məsələlər üzrə danışıqların aparılmasına səy göstərir.
Maraqlıdır, iyulun 11-də keçiriləcək danışıqlarda nə gözlənir? Ermənistan analoji mövqeyini danışıqlarda növbəti dəfə təkrar edərsə, o zaman nə baş verəcək? Məsələyə münasibət bildirən AMİP-in baş katibi Arzuxan Əlizadənin sözlərinə görə, xarici işlər nazirlərinin görüşündə konkret hansısa irəliləyiş gözlənilmir: "Bu, hazırkı vəziyyətdə açıqca ortadadır. Ermənistan, əvvəlki danışıqlarda olduğu kimi, bu dəfə də status-kvonun qorunmasına yönəlik mövqe sərgiləyəcək. Yəni daha çox atəşkəsin qorunub saxlanmasına önəm verəcək. Üstəlik, son günlər cəbhədə baş verən insidentləri bəhanə edərək, bu mövqeyi danışıqlarda qabardacaq. Ona görə də 11 iyul danışıqlarından, praktiki olaraq, heç bir nəticə gözlənilmir. Belə olan halda Azərbaycan nə etməlidir? Azərbaycan buna konkret olaraq etiraz edib danışıqlardan imtina etməlidir. Hesab edirəm ki, hazırkı situasiyada ən optimal variant budur. Eyni zamanda şəraitə uyğun olaraq cəbhə bölgəsində düşmənə güclü əks zərbələr endirilməlidir. Fikrimcə, Azərbaycanın mülki vətəndaşlarına qarşı törədilən bu qətliamdan sonra belə addımların atılması üçün zəmin var. Atəşkəsə əməl etməklə bağlı beynəlxalq qurumların şablon bəyanatlarına əhəmiyyət vermək lazım deyil. Konkret cavab tədbirləri görülməlidir". Vidadi ORDAHALLI