Vüqar Qədirov: "Bildirmək istəyirəm ki, Ermənistanın bu təxribatı da səmərə verən deyil"
Məlum olduğu kimi, ermənilərin cəbhədə törətdiyi təxribat nəticəsində Füzuli rayonundan olan iki dinc sakinimiz həlak olub. Onlardan biri hətta ikiyaşlı uşaqdır. Cəbhəyə yaxın ərazilərdə yaşayan dinc əhaliyə qarşı ermənilərin atdığı bu addım təsadüfi xarakter daşıya bilməz. Çox güman ki, onlar bu addımı son zamanlar azad edilən kəndlərə əhalinin köçünün qarşısını almaq üçün edir. Çünki yerli əhali işğaldan azad edilən kəndlərə böyük həvəslə qayıdır. Ancaq cəbhə xəttinə yaxın ərazilərdə yaşayan mülki əhali hesab edir ki, ermənilərin bu təxribatı heç bir səmərə verən deyil:
"Erməni heç vaxt bizi ölümlə qorxuda bilməz. Biz burada yaşamışıq, axıradək də yaşayacağıq, ölsək də burada öləcəyik". Bu sözləri Ermənistan ordusunun atəşə tutduğu Füzuli rayonunun Alxanlı kənd sakinləri bildirib. Kənd sakinləri orduya güvəndiklərini və düşmənin bu kimi təxribatlarından zərrə qədər də olsa çəkinmədiklərini bildirib.
Kənd sakinləri Ermənistan silahlı qüvvələrinin bu təxribatı nəticəsində yaşlı qadın və onun 2 yaşlı nəvəsinin öldürülməsinin, digər mülki şəxsin yaralanması və mülki obyektlərə ziyan vurulmasının vəhşilik aktı olduğunu vurğulayıb. "Bu, insanlığa sığan iş deyil, müharibə şəraiti olsa belə, uşaqlara, qadınlara atəş açmaq insanlığa sığan hərəkət deyil", - deyə kənd sakini Mətləb Quliyev bildirib.
"Erməni ordusunun bu təxribatı həmişə törətdiyi vəhşilikdir. Onlar vəhşiliklərindən heç vaxt qalmır. Bu, insanlığa sığmayan şeydir. Körpə uşağın, dinc əhalinin belə qətlə yetirilməsi dünyanın heç bir yerində qəbul edilə bilməz", - deyə digər kənd sakini Qurban Quliyev deyib.
Ekspert Vüqar Qədirov da qəzetimizə açıqlamasında bildirdi ki, ermənilərin bu tip vəhşiliyə məhz belə məqamda əl atması təsadüfi deyil: "Bilirsiniz ki, aprel döyüşlərindən sonra Azərbaycan düşmənə ciddi zərbələr endirdi. Bunun da nəticəsində bəzi strateji yüksəklikləri geri qaytardıq. Bu da bizə imkan verdi ki, mülki əhalini təmas xəttinə yaxın olan bəzi yaşayış məntəqələrinə köçürək. Xüsusilə də Cocuq Mərcanlı kəndində dövlətin dəstəyilə böyük quruculuq işləri aparıldı. Yerli əhali ora həvəslə qayıtdı. Hətta həmin hərəkətləri Böyük Qayıdışın başlanğıcı kimi xarakterizə etdilər. Təbii ki, bu, erməniləri ciddi narahat edir. Çünki onlar işğal altında saxladıqları ərazilərdə yaşamağa adam tapa bilmir. Yaşayanlar da oraları sürətlə tərk edir. Cəhbə xəttinə yaxın ərazilərdə yaşayan mülki əhali arasındakı balansın pozulması, təbii ki, ermənilərə əlavə problemlər yaratmış olur. Bu, ordunun mənəvi-psixoloji durumuna da ciddi təsir edir. Məhz bu səbəbdən də onlar dinc əhalini hədəf alır. Hesab edirlər ki, bununla azad olunmuş torpaqlara qayıtmaq istəyən əhali arasında panika yaşanacaq. Ancaq biz cəbhə xəttinə yaxın ərazidə yaşayan insanların və ora yenidən qayıtmaq istəyənlərin əhvalında qorxu hiss etmirik. Əksinə, onlar daha da həvəsli görünür. Bildirmək istəyirəm ki, Ermənistanın bu təxribatı da səmərə verən deyil".
Məhəmmədəli QƏRİBLİ