Türkiyənin Xarici İşlər Nazirliyi Füzuli rayonunda ermənilərin dinc sakinləri öldürməsi hadisəsi ilə bağlı bəyanat yayıb. APA-nın nazirliyin saytına istinadən verdiyi xəbərə görə, bəyanatda bildirilir ki, iyulun 4-də Ermənistan silahlı bölmələri Azərbaycanın Füzuli rayonunun Alxanlı kəndini minaatanlardan və dəzgahlı qumbaraatanlardan atəşə tutub.
Nəticədə kənd sakinlərindən 50 yaşlı qadın və onun 2 yaşlı nəvəsi həlak olub, bir qadın yaralanıb:"Bu hadisəni şiddətlə qınayırıq. Xain hücumda ölən azərbaycanlılara Allah rəhmət eləsin! Yaralanan qadına isə sağlamlığına qovuşmağı arzulayırıq. Bu mənfur hadisə Azərbaycan torpaqlarının beşdə birini işğal edən Ermənistanın cəbhə xəttində ağır silahlarla təxribat törətdiyini, beynəlxalq hüquqa və insan haqlarına zidd olaraq dinc sakinləri, xüsusilə uşaq və qadınları hədəfə aldığını göstərir. Beynəlxalq ictimaiyyət bilməlidir ki, Ermənistanın sistemli şəkildə yeritdiyi şiddət siyasəti Dağlıq Qarabağ münaqişəsinin sülh yolu ilə həllinin qarşısında ən böyük əngəldir. Ermənistanın işğal etdiyi torpaqlardan çıxarılması üçün təzyiq göstərilməlidir.
Türkiyə ATƏT-in Minsk Qrupunun üzvü kimi münaqişənin Azərbaycanın ərazi bütövlüyü və suverenliyi çərçivəsində həllinə dəstəyini davam etdirəcək".
"Sülhün və əminamanlığın olmadığı mühitdə əməkdaşlıqdan danışmaq asan deyil". APA-nın məlumatına görə, bu sözləri Qara dəniz İqtisadi Əməkdaşlıq Təşkilatı Parlament Assambleyasının 49-cu sessiyasının açılışında Türkiyə Böyük Millət Məclisinin (TBMM) sədri İsmayıl Qəhrəman deyib. Təşkilata üzv ölkələr arasındakı əlaqələrin inkişaf etdirilməsi sahəsində parlamentlərin üzərinə düşən vəzifələrdən danışan İsmayıl Qəhrəman ölkələr arasında sülh və təhlükəsizlik mühitinin formalaşdırılmasının vacib olduğunu vurğulayıb: "Sülhün və əminamanlığın olmadığı mühitdə əməkdaşlığı inkişaf etdirmək asan deyil. Parlamentlərin gücü də burada özünü göstərir. Xalqların ən çox istədiyi şey sakitlik, əminamanlıq və təhlükəsizlik mühitidir. Qara dəniz bölgəsinin sülh regionu halına gətirilməsi ən böyük arzumuzdur. Qara dəniz İqtisadi Əməkdaşlıq Təşkilatı Parlament Assambleyasının da sülhə xidmət edən təşkilat olduğunu düşünürəm".
TBMM sədri İsmayıl Qəhrəman dünyadakı konfliktlərin həll edilməsində BMT Təhlükəsizlik Şurasının üzərinə düşən vəzifələri yerinə yetirə bilmədiyini sözlərinə əlavə edib.
"Dövlətimizə qarşı yönələn təhdidləri aradan qaldırmaq üçün mübarizə apararkən qardaş Azərbaycanın Qarabağ bölgəsində Ermənistan işğalçılarının ağır silahlarla hücumu nəticəsində 2 yaşlı övladımızın qətlə yetirilməsi Türkiyədə hamını ağrıdıb. Bu, öz torpağını işğaldan azad etmək üçün Azərbaycanın səbrini daşdıran bir damladır".
Bu sözləri APA-nın Türkiyə bürosuna açıqlamasında Ədalət və İnkişaf Partiyası (AKP) Osmaniyə millət vəkili Suat Önal deyib. O bildirib ki, Türkiyəni "soyqırım" törətməkdə haqsız şəkildə ittiham edən Ermənistan və erməni diasporası üçün 2 yaşlı azərbaycanlı uşağın onların özləri tərəfindən qətlə yetirilməsi ən ibrətamiz cavabdır: "Türk-islam milləti bunu unutmayacaq, unutmamalıdır. Azərbaycanlı qardaşlarımız əmin olsunlar ki, yüz il əvvəl olduğu kimi, bu gün də öz torpaqlarını işğalçı ünsürlərdən təmizləmək yolunda Türkiyə hər an onların yanındadır və üzərinə düşən hər bir vəzifəni qərarlı şəkildə yerinə yetirəcək".
Müstəqil millət vəkili Yusuf Halaçoğlu da hadisəni sərt şəkildə qınayıb: "Bu alçaq hücum Azərbaycanın öz torpaqlarında birbaşa mülki vətəndaşlara və dövlətə qarşı yönəlmiş qanlı cinayətdir. 100 il əvvəlin qondarma, saxta, baş verməmiş hadisələrini bu gün daha da saxtalaşdıraraq Türkiyəni ittiham etməyə çalışan erməni işğalçıları və onların havadarları suç törətdikləri yerdə yaxalandılar. İki yaşlı uşağın ağır silahla qətlə yetirilməsi Xocalı və Srebrenitsadan sonra tarixin ən ağır soyqırımıdır. Bu mənfur hadisə beynəlxalq hüquqdan irəli gələn haqlarından istifadə edərək öz torpaqlarını işğaldan azad etmə istiqamətində Azərbaycan türklərini daha da səfərbər etməlidir. Buna Azərbaycanın kifayət qədər gücü olduğu kimi, Türkiyənin də hər an qardaşlarının yanında olduğu unudulmamalıdır".
Putinin səlahiyyətli nümayəndəsi daha konkret mülahizə yürütdü...
Dağlıq Qarabağ münaqişə zonasında insan ölümlərinin qarşısını almaq üçün beynəlxalq ictimaiyyət Ermənistana təzyiq göstərməlidir. Bunu "Trend"ə Rusiya prezidentinin səlahiyyətli nümayəndəsi, RF İctimai Palatasının üzvü, politoloq Sergey Markov deyib.
O bildirib ki, təzyiq diplomatik, siyasi, psixoloji, hətta iqtisadi yolla olmalıdır: "Ermənistan- Azərbaycan, Dağlıq Qarabağ münaqişəsi qaynar hesab olunmur, amma dondurulmuş münaqişə də deyil. Zorakılıq halları da bunu təsdiq edir. Hərbçilərlə yanaşı, dinc sakinlərin də ölümü bu münaqişənin öldürməyə davam edəcəyinin bir sübutudur. Ona görə də təcili surətdə danışıqlar masasına oturmaq lazımdır. Minsk Qrupu Ermənistana təzyiqi artırmalıdır ki, tərəflər danışıqlara başlasın və kompomis əldə etsin".
S.Markov qeyd edib ki, münaqişə zonasındakı hazırkı vəziyyət Ermənistana sərf edir: "Ona görə də Ermənistan kompromisin əldə olunmasına mane olmağa çalışır. Amma həmin dövrdən bəri qüvvələr balansı dəyişib".
Fransalı senatordan Azərbaycana dəstək...
Beynəlxalq ictimaiyyətdə Dağlıq Qarabağ münaqişəsinin həlli üçün cəsarət və iradənin olmaması yenə də azərbaycanlıların qanının axıdılmasına səbəb oldu. Bunu "Trend"ə Fransa senatoru, Senatın Xarici işlər komitəsinin sədr müavini Natali Qule deyib.
N.Qule qeyd edib: "Ölkə öz ərazilərinin 20 faizinin qanunsuz işğalına nə vaxta qədər dözməlidir? Hələ nə qədər ölüm faktı olacaq?"
Senator ölənlərin ailələrinə, həmçinin öz torpaqlarını azad etmək uğrunda cəsarətlə mübarizə aparan Azərbaycan xalqına başsağlığı verib: "Mən qaçqın və məcburi köçkünlərlə həmrəy olduğumu bildirirəm və onları əmin edirəm ki, biz problemin həlli üzərində işləyəcəyik".
Onun sözlərinə görə, artıq hamı Dağlıq Qarabağ münaqişəsinin dondurulmuş münaqişə olması barədə eşitməkdən yorulub: "Bu dondurulmuş münaqişə deyil, işğaldır".
Fransalı senator həmçinin qeyd edib ki, Bakının bəyan etdiyi kimi, Ernənistana qarşı sanksiyalar nəhayət tətbiq edilməlidir: "Hesab edirəm ki, Azərbaycan BMT Təhlükəsizlik Şurasını bu vəziyyətin müzakirə edilməsi üçün ATƏT-in Minsk Qrupunun həmsədrlərinin iştirakı ilə birgə təcili iclas keçirməyə çağırmalıdır".
Beynəlxalq ictimaiyyətin Ermənistanın təxribatlarına ümumi bəyanatlarla reaksiya verməsinə də etirazlar başladı
Ermənistanın son təxribatı ilə əlaqədar beynəlxalq ictimaiyyətin kəskin reaksiyasını gözləməyə dəyməz. Bunu "Trend"ə Rusiya Elmlər Akademiyasının İqtisadiyyat İnstitutunun elmi işçisi, politoloq Aleksandr Karavayev deyib.
Onun sözlərinə görə, bu ilk belə hal deyil: "Bu cür hallar daim baş verir. Onların intensivliyi bəzən azalır, bəzən artır. Amma istənilən dinc sakin bu hadisələrin qurbanı olur".
Ekspert qeyd edib ki, Ermənistanın bu cür təxribatlarına beynəlxalq ictimaiyyət yalnız ATƏT-in Minsk Qrupunun ümumi bəyanatları çərçivəsində reaksiya verir: "Beynəlxalq ictimaiyyət ötən ilin aprelində olduğu kimi irimiqyaslı hərbi əməliyyatlar baş verəndə reaksiya verir. Ona görə də, Azərbaycan sakinləri üçün nə qədər acı olsa da, kəskin reaksiya gözləməyə dəyməz".
Rusiyalı deputat erməni separatçılarının hərəkətini açıq təxribat adlandırdı
"Dağlıq Qarabağdakı erməni separatçılarının bu hərəkətini ancaq açıq təxribat kimi qiymətləndirmək olar". Bunu APA-nın Moskva müxbirinə açıqlamasında Rusiya-Azərbaycan parlamentlərarası dostluq qrupunun rəhbəri, Rusiya Dövlət Dumasının deputatı Dmitri Savelyev Ermənistan ordusunun Füzulinin Alxanlı kəndini atəşə tutması nəticəsində biri azyaşlı körpə olmaqla 2 nəfərin öldürülməsi, bir nəfərin isə yaralanmasına münasibət bildirərkən deyib.
D.Savelyev bildirib ki, G-20 sammiti öncəsi Qarabağ separatçılarının bu cür fəaliyyətini ancaq açıq təxribat kimi qiymətləndirmək olar: "Bunun qurbanı günahsız dinc sakinlər, o cümlədən körpə oldu. Bu fakt beynəlxalq ictimaiyyət tərəfindən müvafiq qiymətini almalıdır və Qarabağ münaqişəsinin sülh yolu ilə həllinə yönələn səylər artırılmalıdır. Beynəlxalq hüquq normaları işləməli, Azərbaycanın ərazi bütövlüyü ən qısa müddətdə bərpa edilməlidir".
Ermənilərin 2 yaşlı azərbaycanlını öldürməsinə UNICEF də etiraz etdi
"UNICEF vətəndaşların həlak olması ilə nəticələnən hadisələrdən narahatdır". "Trend"in məlumatına görə, bunu UNICEF-in Azərbaycandakı nümayəndəsi Edvard Karvardin (Edward Carwardine) deyib.
E.Karvardin qeyd edib ki, biz hər iki tərəfi uşaqları təhlükədən qorumaq üçün əllərindən gələni etməyə və təmkinli davranmağa çağırırıq.
Metyu Brayza MQ-nin reaksiyasını "yerlə bir etdi"...
İstənilən beynəlxalq münaqişənin vasitəçiləri üçün bu münaqişənin hərbi həll yolunun olmadığını demək səhvdir. Bunu "Trend"ə ABŞ dövlət katibinin Avropa və Avrasiya məsələləri üzrə sabiq köməkçisi, Birləşmiş Ştatların Azərbaycandakı keçmiş səfiri, ATƏT-in Minsk Qrupunun sabiq amerikalı həmsədri Metyu Brayza deyib.
Onun sözlərinə görə, ATƏT-in Minsk Qrupunun bəyanatı vəziyyətə aydınlıq gətirmir: "ATƏT-in Minsk Qrupu həmsədrlərinin bəyanatında adi qaydada zorakılığın pisləndiyi səsləndirilir. Bu ifadələri isə dünyanın istənilən nöqtəsində istənilən münaqişəyə aid etmək olar".
İsrail səfiri ermənilərin iki yaşlı Zəhranı və nənəsini öldürməsindən dəhşətə gəlib
İsrailin Azərbaycandakı səfiri Dan Stav Ermənistan Silahlı Qüvvələrinin Azərbaycana qarşı son təxribatından dəhşətə gəldiyini bildirib.
"Trend"ə danışan səfir Füzuli rayonunun Alxanlı kəndinin minaatanlardan atəşə tutulması nəticəsində iki yaşlı Zəhra Quliyeva və onun nənəsi Sahibə Quliyevanın öldürülməsi xəbərindən dəhşətə gəldiyini və dərindən kədərləndiyini bildirib: "Ölənlərin ailəsinə və bütün Azərbaycan xalqına başsağlığımı bildirirəm".
Qeyd edək ki, Ermənistan Silahlı Qüvvələri iyulun 4-də saat 20 radələrində Azərbaycanın işğal olunmuş ərazilərindən Füzuli rayonunun Alxanlı kəndinin mülki əhalisinin və mülki obyektlərinin ərazilərini mina və qumbaraatanlardan atəşə tutaraq mülki əhalinin qəsdən öldürülməsi və vətəndaşların şəxsi mülkiyyətində olan əmlaklarının qəsdən məhv edilməsi məqsədilə növbəti təxribat törədiblər.
Nəticədə Alxanlı kənd sakinləri - 1966-cı il təvəllüdlü Allahverdiyeva Sahibə İdris qızı və onun nəvəsi 2016-cı il təvəllüdlü Quliyeva Zəhra Elnur qızı həlak olub, digər mülki şəxs 1965-ci il təvəllüdlü Quliyeva Səlminaz İltifat qızı isə ağır bədən xəsarətləri alaraq xəstəxanaya yerləşdirilib.
İşğalçı ordunun Qarabağda dinc sakinləri qətlə yetirməsi Rusiya parlamentində də etiraz doğurdu
Rusiya parlamentinin Rusiya-Azərbaycan dostluq qrupunun rəhbəri Dmitri Savelyev Azərbaycanla Füzuli rayonunda dinc sakinlərin işğalçı erməni ordusu tərəfindən öldürülməsini qətiyyətlə pisləyib.
Baki-xeber.com-un xəbərinə görə, o deyib ki, "Böyük iyirmiliy"in sammiti ərəfəsində Qarabağ separatçılarının hərəkətini yalnız provokasiya adlandırmaq olar ki, bu addımla onlar hətta günahsız körpənin də ölümünə səbəb oldular. "Bu fakt dünya ictimaiyyəti tərəfindən qiymətini almalı və Qarabağ münaqişəsinin sülh yolu ilə həllinə yönəlik səylər artırılmalıdır. Eyni zamanda beynəlxalq hüququn norma və prinsiplərinə dayanılaraq Azərbaycanın ərazi bütövlüyü tez bir zamanda bərpa olunmalıdır"- Savelyev bildirib.
İran səfiri ermənilərin 2 yaşlı Zəhranı qətlə yetirməsini cinayət adlandırdı
"Ermənistan silahlı qüvvələrinin Azərbaycan əhalisinə qarşı atdığı son addımlar bizdə ciddi təəssüf doğurub". "Trend"in məlumatına görə, bu barədə İranın Azərbaycandakı səfiri Cavad Cahangirzadə bildirib. Diplomat bununla bağlı həlak olanların ailəsinə və Azərbaycan dövlətinə başsağlığı verib: "Mülki şəxslərə qarşı hərbi addım tərəfimizdən pislənir. Beynəlxalq qayda və qanunlar humanitar hüququn pozulmasını pisləyir. Ermənilər tərəfindən atılan bu cür təhrikedici addımlar münaqişənin siyasi və sülh yolu ilə həlli prosesinə heç bir köməklik göstərməyəcək və vəziyyəti daha da gərginləşdirəcək".
Səfir 2 yaşlı Zəhranın qətlə yetirilməsini cinayət işi adlandırıb: "Azərbaycan dövləti öz mülki vətəndaşlarına qarşı atılan qanunsuz addımları aidiyyəti beynəlxalq təşkilat və dairələr səviyyəsində araşdırmaq hüququna malikdir. Minsk Qrupu atəşkəs rejiminin pozulması hallarının və mülki vətəndaşlara qarşı bu hərəkətlərin qarşısını almaq üçün ciddi addımlar atmalıdır".
Baki-xeber.com