Erməni silahlı bölmələrinin Füzuli rayonunun Alxanlı kəndini atəşə tutması nəticəsində dinc sakinlərin həlak olması məsələsi ATƏT Parlament Assambleyasının (PA) Minskdə keçirilən 26-cı illik sessiyasında qaldırılıb. APA-nın məlumatına görə, Azərbaycan Milli Məclisinin ATƏT PA-dakı nümayəndə heyətinin rəhbəri, MM sədrinin müavini Bahar Muradova iclasda çıxış edərək Ermənistan qoşunlarının Azərbaycanın dinc əhalisinə qarşı hücumlarının sistemli xarakter daşıdığını bildirib.
B.Muradova qeyd edib ki, baş verənlərə görə bütün məsuliyyət Ermənistanın hərbi-siyasi rəhbərliyinin üzərinə düşür.
"Burada qarşılıqlı etimadın möhkəmləndirilməsi məsələsini müzakirə etdiyimiz bir vaxtda ölkəmizdə, torpaqlarımızda qan töküldüyünü düşünməkdən dəhşətə gəlirik. Mən Füzuli rayonundan məcbur köçkünəm. Qoşunların təmas xəttində yaşayan seçicilərim daim təhlükə altındadır. Orada dinc sakinlər yaşayır, qarşı tərəfdə isə erməni silahlı birləşmələri yerləşir".
Həlak olanları şəxsən tanıdığını qeyd edən B.Muradova iclas iştirakçılarını, eləcə də bütün dünya ictimaiyyətini bu cinayəti qətiyyətlə pisləməyə çağırıb: "Deputatlar dialoqun yollarını tapmalı, qan tökülməsinin qarşısının alınmasına öz töhfələrini verməlidirlər".
ATƏT-in PA-nın vitse-prezidenti, millət vəkili Azay Quliyev də sessiyada çıxış edərək, Ermənistanın silahlı qüvvələrinin atəşi nəticəsində iyulun 4-də Füzuli rayonunun Alxanlı kəndində dinc sakinlərin qətlə yetirilməsi faktını sərt şəkildə qınayıb.
A.Quliyev bildirib ki, erməni silahlı birləşmələri qəsdən mülki əhalini hədəfə alaraq iki günahsız insanı - Sahibə Quliyeva və 2 yaşlı Zəhra Quliyevanı qətlə yetirib: "Bu, Ermənistanın Azərbaycan xalqına qarşı olan barbar və vəhşi hərəkətdir. ATƏT PA bu qəddar hücumları kəskin şəkildə pisləməlidir. Münaqişələrdə belə halların baş verməsinə heç vaxt icazə verməməliyik. Düşünürəm ki, bu hərəkət azərbaycanlı mülki əhali qarşı qəsdən, məqsədli şəkildə törədilmiş hücumdur. Bu kimi hallar beynəlxalq humanitar hüququn, insan hüquqlarının pozulmasıdır və birbaşa olaraq 1949-cu il 12 avqust tarixli Cenevrə Konvensiyasının müddəalarına və cəbhə xəttində uşaqların, mülki əhalinin hüquqlarını müdafiə edən digər əlavə protokollara ziddir. Minsk Qrupunun həmsədrləri bu məsələ ilə məşğul olmalı və belə qəddar hücumları pisləməlidir, dərhal bu kimi hücumları dayandırmaq üçün addım atmalıdır".
A.Quliyev bütün hərbi və siyasi məsuliyyətin Ermənistanın üzərinə düşdüyünü bildirərək ATƏT PA-nın bu insidentlə bağlı səssiz qalmamasının və gələcəkdə cəbhə xəttində belə halların baş verməməsi üçün müvafiq addımlar atılmasının vacibliyini vurğulayıb.
Sessiyada qətlə yetirilən mülki şəxslər barədə XİN-in bəyanatı və onların şəkilləri ATƏT PA-nın üzvlərinə paylanıb.
Məsuliyyət həm də Avropa Parlamentində Ermənistana dəstək verən qüvvələrin üzərinə düşür...
Məsuliyyət həm də Avropa Parlamentində Ermənistana dəstək verən qüvvələrin üzərinə düşür. "Trend"in məlumatına görə, bu, Azərbaycanın Avronest Parlament Assambleyasındakı (PA) nümayəndə heyətinin rəhbəri Fuad Muradovun Avropa Parlamentinin və Avronest PA-nın üzvlərinə Ermənistan silahlı qüvvələri tərəfindən mülki əhalinin sıx yaşadığı Füzuli rayonunun Alxanlı kəndinin ağır artilleriyadan atəşə tutulması nəticəsində kənd sakinləri - 50 yaşlı Quliyeva Sahibə İdris qızı və 2 yaşlı Quliyeva Zəhra Elnur qızının həlak olması ilə əlaqədar ünvanladığı müraciətində deyilir.
Müraciətdə bildirilir ki, Ermənistan hərbi-siyasi rəhbərliyi 25 ildir ki, ölkəmizin 20 faiz ərazisini silah gücü ilə işğal edib, 1 milyonadək insan evlərindən didərgin düşüb, 30 minə yaxın vətəndaşımız öldürülüb, minlərlə insan hələ də girovluqda saxlanır və Azərbaycanın mülki əhalisi ilə müharibə aparmasını Xocalı soyqırımı ilə sübuta yetib.
Bildirilir ki, 1994-cü ildə atəşkəs əldə olunmasına dair iki ölkə arasında Bişkek protokolunun imzalanmasından sonra da Ermənistan tərəfi, demək olar ki, hər gün atəşkəsi pozaraq cəbhə xətti, eləcə də sərhəd boyu hərbçilərlə yanaşı yaşayış məntəqələrində mülki əhalinin həyat və sağlamlığına zərər vurur və mülki obyektləri dağıdır. İyulun 4-də baş verən hadisə isə bu işğalçı siyasətin davamıdır. Ermənistan bu terror siyasəti ilə daim Azərbaycan əhalisini qorxu və təşviş içində saxlamaq və sülh danışıqlarında Azərbaycana təzyiqlər etməyə çalışır.
Müraciətdə Avropa Parlamentində Ermənistana dəstək verən qüvvələrin bu cinayətin məsuliyyətini daşıması da vurğulanır. Qeyd edilir ki, müharibə şəraiti olsa belə, uşaqlara, qadınlara atəş açmaq insanlığa sığan hərəkət deyil. Körpə uşağın, dinc əhalinin qətlə yetirilməsi dünyanın heç bir yerində qəbul edilə bilməz. Bu, dünya dövlətlərinin və beynəlxalq təşkilatların Ermənistanın 25 ilə yaxındır davam etdirdiyi işğalçı siyasətinə qarşı etinasızlığın və hətta bəzən onlara verilən güclü dəstəyin nəticəsidir. Baş vermiş qanlı təxribata görə bütün məsuliyyət Ermənistanın hərbi-siyasi rəhbərliyi ilə bərabər bu siyasətə qarşı susqunluq nümayiş etdirən, dünyada və Avropa Parlamentində Ermənistana dəstək verən qüvvələrin də üzərinə düşür.
Şərq Tərəfdaşlığı ölkələrində mövcud işğalçılıq siyasətinin tərəfdaş ölkələrin Aİ ilə əməkdaşlığının qarşısında duran ən ciddi maneələrdən biri olduğu diqqətə çatdırılan müraciətdə Avropa Parlamentinin bu məsələni ciddi nəzarətdə saxlaması və işğala məruz qalmış ölkələrə daim dəstək olması xüsusi vurğulanır.
Müraciətdə Cənubi Qafqazda cərəyan edən hadisələr, insan hüquqları və demokratiyanı daim öz daxili və xarici siyasətində prioritet edən Avropa İttifaqının və onun vətəndaşlarını təmsil edən Avropa Parlamentinin təmsilçilərinin birbaşa marağına toxunduğundan, Avropa Parlamenti törədilmiş bu qanlı cinayətə hüquqi qiymət verməsi üçün təcili müzakirələr təşkil etmək və qətnamə qəbul etməyə çağırılır: "Çox ümid edirik ki, Avropa Parlamenti tərəfdaşlarının yerləşdiyi bu regionda baş verən bu cür qanlı və işğalçı siyasət qarşısında səssizlik nümayiş etdirməyəcək və buna öz hüquqi qiymətini verəcək".
Müraciətə baş vermiş hadisənin dəhşətinin daha yaxşı dərk edilməsi üçün Ermənistan tərəfinin qətl yetirdiyi 2 yaşlı Zəhra Quliyevanın şəkilləri də əlavə edilib.
Son olaraq Azərbaycanın Avronest PA-dakı nümayəndə heyəti bu məsələni qurumun növbəti büro iclasında və Avropa Parlamentinin bütün qurumlarında və iclaslarında daim qaldıracağı da diqqətə çatdırılıb.
NATO PA-nın seminarında Ermənistan nümayəndələrinə xəbərdarlıq edildi
Ukraynanın paytaxtı Kiyev şəhərində keçirilən NATO Parlament Assambleyasının (PA) 95-ci "Rose-Roth" seminarında srağagün gecə erməni silahlıları tərəfindən Füzuli rayonunda dinc azərbaycanlıların artilleriya atəşinə tutulması nəticəsində yaşlı qadının və körpə uşağın öldürülməsi məsələsi qaldırılıb.
İclasda iştirak edən Azərbaycanın NATO PA-da nümayəndə heyətinin üzvü, deputat Məlahət İbrahimqızı APA-ya bildirib ki, üç gündür davam edən seminarın iclasında hadisə ilə bağlı məsələ qaldırılıb, artilleriya atəşi nəticəsində Sahibə Quliyeva ilə birlikdə qətlə yetirilən nəvəsi, 2 yaşlı Zəhra Quliyevanın al qana qərq edilmiş fotosunu nümayiş etdirilib.
İclasda çıxış edən M. İbrahimqızı Füzulidə baş verən qanlı olayla bağlı Azərbaycan nümayəndə heyəti tərəfindən hazırlanan bəyanatı təqdim edib. O bildirib ki, Azərbaycan dövləti Dağlıq Qarabağ münaqişəsini diplomatik yolla həll etməyə üstünlük verdiyi halda erməni silahlı qüvvələrinin atəşkəsi pozması, bəşəri cinayətə əl atması Ermənistanın bu məsələdə işğalçılıq siyasətində israrlı olmasından xəbər verir: "İki yaşlı məsum körpənin artilleriya atəşi ilə öldürülməsi hansı müharibə qanunlarında var? İndiki prezident Serj Sarkisyan 1992-ci il 26 fevralda Azərbaycanın Xocalı qəsəbəsində törətdikləri soyqırımın mahiyyətini ötən gecə Füzuli rayonumuzda təkrarladı. Bu faktlar artıq erməni silahlıları tərəfindən Azərbaycana qarşı ənənə halına çevrilir. Dünya buna nə vaxtadək susacaq?".
Deputat bildirib ki, Qara Dəniz İqtisadi Əməkdaşlıq Təşkilatı çərçivəsində Ermənistanın Azərbaycana qarşı işğalı potensial təhlükə mənbəyidir: "Törədilən hadisələr hər dəfə bunu artıqlaması ilə sübut edir. Ermənistan faktiki olaraq nümayişkaranə şəkildə beynəlxalq hüquqa məhəl qoymur. Münaqişənin həllində hər zaman destruktiv mövqe sərgiləyir. Bununla nəinki Qafqaz bölgəsini, eyni zamanda Qara dəniz hövzəsini də təhlükə şəraitində saxlamış olur. Biz ilk növbədə belə bir işğalçı dövlətin sürətlə silahlanmasının dayandırılmasını tələb edirik. Artıq 25 ildir bu işğal Azərbaycana qarşı davam edir və heç bir nəticə yoxdur. Biz artıq NATO-nun da bununla bağlı addım atmasını tələb edirik. Əks halda Ermənistan tərəfindən bu halların getdikcə artması labüddür. Erməni xalqı özü də Sarkisyandan narazı olsa da, o buna məhəl qoymur və cinayət əməllərini regionda daha dərin formada təkrarlayır".
Sonra deputat Füzulinin Alxanlı kəndində qətlə yetirilən körpənin fotolarını nümayiş etdirib. Hadisə seminar iştirakçısı olan ölkələrin nümayəndələri arasında hiddətə və qınağa səbəb olub. Ermənistan nümayəndə heyəti adından deputat Koryun Nahapetyan isə iclasda bu məsələnin müzakirəsinin və fotoların nümayişinin dayandırılmasını tələb edib. Nümayəndə heyətləri arasında mübahisə düşüb. Buna görə erməni deputatlar qınanıb. İclasa sədrlik edən NATO PA-nın vitse-prezidenti Osman Aşkın Bak Ermənistan nümayəndə heyətinə xəbərdarlıq edib.
Seminarda Azərbaycanı deputatlar M.İbrahimqızı, Kamran Bayramov və Milli Məclisin Beynəlxalq şöbəsinin əməkdaşı Rəhim Axundov təmsil edir.
Ermənilərin Füzulidə törətdiyi vəhşiliklə bağlı məsələ AŞPA-ya da daşınır
İyulun 4-də axşam saatlarında Ermənistan Silahlı Qüvvələrinin Azərbaycanın Füzuli rayonunun Alxanlı kəndində dinc sakinləri artilleriya atəşinə tutması faktı ilə bağlı bir sıra beynəlxalq təşkilatlara, o cümlədən Avropa Şurasına müraciət olunacaq. Bu barədə APA-ya açıqlamasında Milli Məclisin AŞPA-da nümayəndə heyətinin rəhbəri Səməd Seyidov bildirib.
O qeyd edib ki, məsələ Avropa Şurası Parlament Assambleyasının (AŞPA) növbəti sessiyasında müzakirəyə çıxarılacaq.
S.Seyidovun sözlərinə görə, erməni silahlıları tərəfindən yaşlı qadının və körpə uşağın ölümü ilə nəticələnən hadisə hətta müharibə qanunlarına sığmayan insanlıq əleyhinə cinayətdir: "Təbii ki, Avropa Şurası, o cümlədən digər beynəlxalq təşkilatlar buna qiymət verməlidir. Biz səlahiyyətlərimizin imkan verdiyi bütün beynəlxalq təşkilatlara faktlar, fotolar təqdim etməklə hüquqi qiymət verilməsini tələb edəcəyik. Bu dəhşətli faktı artıq ermənilər ört - basdır edə bilməyəcək. O yaşlı xanımın və körpənin qanı yerdə qalmayacaq".
S.Seyidov onu da qeyd edib ki, AŞPA-nın növbəti sessiyasında onsuz da xeyli məsələ Azərbaycanla bağlıdır və bu hadisə də həmin məsələlər arasında geniş yer tutacaq: "Bütün iclaslarda bu məsələ qaldırılacaq".
İƏT Azərbaycan kəndinin erməni qoşunları tərəfindən atəşə tutulmasını kəskin pislədi...
İslam Əməkdaşlıq Təşkilatının (İƏT) Baş Katibliyi istənilən güc tətbiqini pisləyir və hesab edir ki, bütün mübahisələr dinc yolla həll edilməlidir. Bu barədə "Trend"ə təşkilatdan bildirilib. Təşkilatın şərhində qeyd olunur ki, İƏT Azərbaycanda dinc sakinlərin həlak olması ilə nəticələnmiş Füzuli rayonunun Alxanlı kəndinin atəşə tutulmasını pisləyir.
İƏT-in Baş Katibliyi bir daha bəyan edir ki, Ermənistanın Azərbaycana qarşı təcavüzü ilə bağlı əvvəlki mövqeyində qalır və hesab edir ki, bu münaqişənin həlli yolu BMT Təhlükəsizlik Şurasının müvafiq qətnamələrinin dərhal yerinə yetirilməsi və Ermənistan silahlı qüvvələrinin Azərbaycanın işğal edilmiş ərazilərindən çıxarılmasıdır.
Bildirilib ki, İƏT münaqişənin sülh yolu ilə həllini dəstəkləyir və hesab edir ki, vəziyyətin daha da gərginləşməsinin qarşısının alınması istiqamətində bütün zəruri addımlar atılmalıdır.
Baki-xeber.com