Arzu Nağıyev: "Aktivlik etsələr belə, faydası yoxdur"
Azərbaycanın bütün beynəlxalq məsələlərlə bağlı öz prinsipial mövqeyi var. Bu mövqe ölkənin milli maraqlarından irəli gəlir. Bunu Azərbaycanın ATƏT-dəki daimi nümayəndəsi, Avstriyadakı səfir Qalib İsrafilov deyib. O qeyd edib ki, bu gün Azərbaycanın ATƏT-də çoxlu tərəfdarları var və bunun sayəsində ölkənin nümayiş etdirdiyi mövqe qurum tərkibində dəstəklənir.
Səfirin sözlərinə görə, ATƏT müxtəlif dövlət və siyasi blokların maraqlarının müzakirə edildiyi geniş platformadır: "ATƏT, NATO və KTMT-dən fərqli olaraq, təhdidlərin neytrallaşdırılması fəaliyyəti ilə məşğul olmur. Bu blokların fərqli məqsədləri və dəyərləri var və ATƏT üçün onlar bir-birinə qarşı olan hərbi bloklardır. Bu blokların heç birinə və ATƏT daxilindəki siyasi qruplara daxil olmayan Azərbaycan ATƏT tərəfindən razılaşdırılmış və ölkənin milli maraqları və mövqeyi ilə möhkəmləndirilən siyasətini həyata keçirir".
Onun sözlərinə görə, bu platformada Bakı üçün prioritet məsələ Ermənistan-Azərbaycan, Dağlıq Qarabağ münaqişəsinin həlli məsələsidir.
O bildirib ki, ATƏT çərçivəsində 1992-1994-cü illərdə həm nizamnamə formatı, həm də mediator ölkələr qrupuna daxil olan tərkib üzrə qərar qəbul edilib: "Bundan sonra nizamlanma prosesi ATƏT-in Minsk Qrupunun səlahiyyətinə keçdi. Minsk Qrupu 1990-cı illərin sonlarında fəal idi, hazırda isə praktiki olaraq toplaşmır və bütün işləri yalnız onun həmsədrləri aparır".
Q.İsrafilov əlavə edib: "Bu yaxşıdır, yoxsa pis - siz mühakimə yürüdün. Biz bu qrupun yaradılmasından etibarən, son 23 il ərzində həmsədrlərin fəaliyyətinin nəticəsizliyini görürük. Onların işinin nəzərəçarpan və səmərəli nəticələri hələ ki, yoxdur. Lakin biz ümid edirik ki, həmsədrlər bu istiqamətdə daha böyük səy göstərəcək".
Diplomat qeyd edib ki, Azərbaycan ATƏT-ə hazırda sədrlik edən Avstriyadan Ermənistan-Azərbaycan, Dağlıq Qarabağ münaqişəsinin nizamlanmasında səmərəli fəaliyyət gözləyir.
Göründüyü kimi, diplomat ATƏT-in Minsk Qrupunun fəaliyyətini 90-cı illərin sonu ilə müqayisədə çox passiv sayır. Bu nə ilə bağlıdır?
Ekspert Arzu Nağıyevin sözlərinə görə, Dağlıq Qarabağ münaqişəsi ilə bağlı beynəlxalq hüquq işləmir. Münaqişənin həlli istiqamətində hər hansı addım atılacağı inandırıcı görünmür. 20 ildən çoxdur münaqişə var, münaqişənin davam etməsi, eyni zamanda prosesin BMT qanunları çərçivəsində həll olunmamasında Minsk Qrupu həmsədrlərinin mövqesizliyi də əsas faktorlardan biridir. Yəni tək deklorativ bəyanatlarla iş bitmir. Son görüşdə onlar Dağlıq Qarabağ separatçılarını dolayı yolla üçüncü tərəf kimi danışıqlara cəlb etməyə çalışdılar. Halbuki, onların təmsil etdiyi dövlətlər BMT TŞ-nin 5 daimi üzvündən üçüdür. Yəni burada ikili yanaşma var. Bu dövlətlər öz maraqları çərçivəsində Ermənistana təzyiq və təsir mexanizmini gücləndirməlidir. 90-cı illərdə format yeni yaranmışdı. Ona görə də onlara həm inam vardı, həm də Minsk Qrupu inandırıcı manevrlər edə bilirdi. Uzun sürən proseslər göstərdi ki, deyilən format heç nəyə qadir deyil. Bu da onlara inamı daha da zəiflədib. Aktivlik etsələr belə, faydası yoxdur".
Məhəmmədəli QƏRİBLİ