Qabil Hüseynli: "Yeni bir mexanizmə ehtiyac var"
Məlum olduğu kimi, Dağlıq Qarabağ münaqişəsinin nizama salınması missiyasını ATƏT-in Minsk Qrupu adlanan bir təsisat öz öhdəsinə götürüb. Ancaq proseslə daha aktiv şəkildə həmin quruma həmsədrlik edən Rusiya, Fransa və ABŞ məşğul olur. Əslində isə bu aktivlik heç bir nəticə verməyib. Sadəcə, həmin üç ölkəni ATƏT-in Minsk Qrupunun digər üzvlərindən bir qədər fərqləndirir. Sözügedən üç ölkənin formatı inhisara alması belə təəssürat yaradır ki, Minsk Qrupu sanki həmin ölkələrdən ibarətdir. Amma belə deyil. Məhz bu səbəbdəndir ki, Azərbaycan rəsmiləri dəfələrlə Minsk Qrupunun tam tərkibdə toplanmasını istəyib.
Ermənistan-Azərbaycan münaqişəsi, ATƏT-lə Azərbaycan arasında münasibətlərin hazırkı vəziyyəti və gələcək inkişaf perspektivlərinin müzakirəsi zamanı bu təklif dəfələrlə səsləndirilib.
ATƏT-in Minsk Qrupunun bütün üzvlərinin münaqişənin həllinə töhfə verməsi və tam tərkibdə Minsk Qrupunun toplantılarının keçirilməsi zəruri sayıla bilərmi?
Politoloq Qabil Hüseynli qəzetimizə bildirdi ki, həmin qrupun tam tərkibdə toplanması lazımdır: "Hansısa ölkələr formatı tam inhisara alıb. Üç həmsədrdən ikisi isə oradakı mövqeyini sanki Rusiyaya güzəştə getmiş kimi görsənir.
Minsk Qrupu isə tam tərkibdə 11 ölkədən ibarətdir. Onlardan 10-u xristian, yalnız biri - Türkiyə müsəlman ölkəsidir. Biz bu münaqişənin sivilizasiyaların toqquşması müstəvisinə keçirilməsini istəmirik. Amma Ermənistan bu yöndə tez-tez bəyanatlar verir. Hətta Sarkisyanın özü iddia edib ki, guya onlar xristianların təəssübünü çəkir. Türkiyə niyə həmsədrlərdən biri olmasın? Çünki bu münaqişə onun təmsil olunduğu regiona daha yaxındır. Hətta İranın da bu yöndə qaldırdığı vasitəçilik təşəbbüsünə normal yanaşa bilərik. Çünki hər iki ölkə regionun aparıcı və təsir imkanları olan dövlətləridir. Azərbaycan formatın dəyişməsini çox istəyir. Amma sizə bildirim ki, Minsk Qrupunun tam toplanması həmsədrlik formatını dəyişməyə qadir deyil. Bunun üçün ATƏT-in ümumi toplantısı çağırılmalı və qərar orada verilməlidir. Ancaq Minsk Qrupunun 11 ölkədən olan tam tərkibi də uzun illərdir toplanmır. Bəlkə də bəzi ölkələr belə formatın olmasını unudublar da. Ancaq Azərbaycan tələbində israrlı olub onları yuxudan ayıltmalıdır. Çünki buna bizim haqqımız çatır. Həmsədr ölkələr bu prosesdə etibarını itirib. Yeni bir mexanizmə ehtiyac var".
Məhəmmədəli QƏRİBLİ