Ağa Seyidli: "İslam dini, məscid yalnız bizim yox, həm də onların müqəddəs dəyəridir"
Azərbaycan Prezidenti İlham Əliyev müqəddəs Ramazan ayı münasibətilə müsəlman ölkələrinin Azərbaycandakı səfirləri və diplomatik nümayəndəliklərinin rəhbərləri ilə görüşü zamanı Ermənistanın törətdiyi vandalizmdən söz açıb:
"Ermənistan Azərbaycanın torpaqlarının bir hissəsini uzun illərdir ki, işğal altında saxlayır, bütün beynəlxalq normaları kobudcasına pozur, BMT Təhlükəsizlik Şurasının dörd qətnaməsinə biganə qalır, işğal edilmiş torpaqlarda bizim bütün tarixi, dini abidələrimizi məhv edib və bunu təsdiqləyən bir çox sənədlər, videomateriallar var. Erməni işğalı nəticəsində bir milyondan artıq azərbaycanlı öz doğma torpağında qaçqın-köçkün vəziyyətinə düşüb".
O qeyd edib ki, Ermənistan-Azərbaycan, Dağlıq Qarabağ münaqişəsi yalnız beynəlxalq hüququn norma və prinsiplərinə uyğun, Azərbaycanın ərazi bütövlüyü çərçivəsində öz həllini tapmalıdır: "Biz bütün beynəlxalq təşkilatlarda münaqişə ilə bağlı həqiqətləri ortaya qoyuruq, dünya ictimaiyyətinə çatdırırıq. Əlbəttə, bunu müsəlman ölkələrinin ictimaiyyətinə də çatdırırıq ki, bu ölkələrdə yaşayan bizim qardaşlarımız ermənilər tərəfindən işğal edilmiş torpaqlarda hansı vəhşiliklərin törədildiyini görsünlər. Bu vəhşilik təkcə Azərbaycana qarşı deyil, bütün müsəlman aləminə qarşı törədilib. Bu yaxınlarda işğaldan azad edilmiş Cocuq Mərcanlı kəndində ucaldılmış məscid Şuşa məscidinin memarlığını təkrarlayır. Şuşa məscidləri, Ağdam məscidləri, işğal altında olan digər şəhərlərimizin məscidləri ermənilər tərəfindən dağıdılıb. Bu cinayət bütün müsəlman aləminə qarşı törədilmiş cinayətdir. Biz istəyirik ki, bütün dünya müsəlmanları bunu bilsinlər".
Göründüyü kimi, Prezident müsəlman ölkələrinin səfirlərinə təsirli mesaj vermiş oldu və bildirdi ki, Ermənistanın Azərbaycanda dağıtdığı məscidlər yalnız bizə deyil, həm də onlara qarşı olan cinayətdir. Bundan sonra müsəlman ölkələri hansı nəticəni çıxarmalı və nə addımlar atmalıdır?
Şərqşünas Ağa Seyidlinin sözlərinə görə, Prezidentin keçirdiyi son görüş bir daha sübut etdi ki, Azərbaycan ölkə olaraq çoxşaxəli siyasət yürüdür və milli-mənəvi dəyərlərə böyük önəm verir: "İslam aləmi üçün müqəddəs sayılan Ramazan ayında Prezident əvvəlki illərdə də səfirlərlə bu formatda görüşüb. Azərbaycan dünyəvi olmaqla yanaşı, həm də islami dəyərlərə böyük önəm verir. Bunu biz yalnız bayrağımızda olan, islamın simvolu sayılan yaşıl rənglə əsaslandırmırıq. Azərbaycan dövlətinin müstəqillikdən sonra yürütdüyü siyasət buna əyani sübutdur. Ölkəmiz İslam aləmilə çox isti münasibətlərdədir. İƏT-in üzvü kimi həmin qurumdakı ölkələrlə qarşılıqlı əməkdaşlığımız mövcuddur. BMT Təhlükəsizlik Şurasına qeyri-daimi sədrlik etdiyimiz dönəmdə müsəlman aləminin problemlərini ən ali tribunaya qaldırdıq. Bu yaxınlarda ölkəmizdə keçirilən İslam Həmrəylik Oyunlarını da buna misal göstərə bilərik. Bütün bunlar sübut edir ki, Azərbaycan müsəlmanlığın təəssübünü çəkən bir ölkədir. Ölkəmizdə dini maarifləndirməyə, məscidlərin tikilməsinə xüsusi önəm verilir. Bakının mərkəzində hələ də erməni kilsəsi qalır. Ancaq onlar bizim tarixi və dini abidələrimizi məhv edib. Təbii ki, bu yalnız bizim problemimiz deyil. Onlar etdikləri əməllərlə islam dininə sataşmış olub. Bu baxımdan da səfirlər təmsil etdikləri hökumətləri bu vandalizmə ciddi reaksiya verməyə çağırmalıdır. İslam dini, məscid yalnız bizim yox, həm də onların müqəddəs dəyəridir".
Məhəmmədəli QƏRİBLİ