İlham Şaban: "İtaliyanın ərazisində 8 kilometrlik boru kəməri tikilməlidir ki, qazpaylayıcı şəbəkəyə birləşdirilsin və bununla da məsələ bitsin"
Transadriatik boru kəmərinin (TAP) tikintisi "Şahdəniz-2" yatağından Azərbaycan qazının 2020-ci ildə Avropaya tədarükünə başlanması planına uyğun olaraq davam etdirilir.
Bunu mətbuata açıqlamasında TAP-ın səhmdarlarından biri olan "Snam" şirkətindəki (İtaliya) mənbə deyib. O qeyd edib ki, zeytun ağaclarının təhlükəsiz köçürülməsindən sonra kiçik tunellərin tikintisi üçün meydan hazırlanıb.
Mənbə bildirib ki, TAP və ümumilikdə "Cənub Qaz Dəhlizi" həm İtaliya, həm də bütün Avropa üçün çox mühüm layihədir: "Cənub Qaz Dəhlizi" gələcəkdə Avropaya qaz tədarükü mənbələri və marşrutlarının şaxələndirilməsi, eləcə də tədarükün təhlükəsizliyini gücləndirmək üçün konkret imkanlar təqdim edir".
O əlavə edib ki, "Snam" şirkəti öz təcrübəsi və imkanları ilə layihənin həyata keçirilməsi ilə bağlı müvafiq icazələrin alınması prosesində TAP-a dəstək verir və Xəzər qazının Avropaya nəzərdə tutulan müddətdə çatdırılmasını təmin etmək məqsədilə İtaliyada layihənin idarə edilməsi üzrə xidmətlər göstərir.
Onu da qeyd edək ki, TAP Bolqarıstan, Albaniya, Bosniya-Hersoqovina, Çernoqoriya, Xorvatiya və digərləri də daxil olmaqla, Cənub-Şərqi Avropanın bir neçə ölkəsinə qaz təchizatını asanlaşdıra bilər. Bundan əlavə, İtaliya keçidi Xəzər dənizi qazının Avropanın Almaniya, Fransa, Böyük Britaniya, İsveçrə və Avstriya kimi ən böyük enerji bazarlarına daşınması üçün böyük zəmin yaradır. Gürcüstana və Türkiyəyə ilk qaz təchizatları 2018-ci ilin sonunadək gözlənilərkən, Avropaya ilk təchizat təxminən 2020-ci ilin əvvəllərində başlayacaq.
TAP səhmdarlarının pay bölgüsü belədir: BP (20 faiz), "Cənub Qaz Dəhlizi" QSC (20 faiz), "Snam S.p.A." (20 faiz), "Fluxys" (19 faiz), "Enags" (16 faiz) və "Axpo" (5 faiz).
Kəmərlə bağlı son açıqlama onu deməyə əsas verirmi ki, artıq heç bir problem qalmayıb? Məsələyə münasibət bildirən Neft Araşdırmaları Mərkəzinin rəhbəri İlham Şabanın sözlərinə görə, "Snam" şirkətindən verilən açıqlamalar həqiqəti əks etdirir: "Aprelin 19-da TAP-la bağlı məhkəmə qərar çıxardı. Qərar ondan ibarət idi ki, artıq konsorsium öz işini davam etdirə bilər. Aprelin 22-də konsorsiumun belə bir açıqlaması oldu ki, biz fəaliyyətimizi davam etdiririk. Bu müddət ərzində görüləcək işlər cəmi 3 faiz qrafikdən geri qalıb. Bu 3 faiz də zeytun ağaclarının köçürülməsi ilə bağlı işləri nəzərdə tuturdu. Yəni bunlar da elə bir böyük problem deyil. İkinci bir tərəfdən, İtaliyanın ərazisində 8 kilometrlik boru kəməri tikilməlidir ki, qazpaylayıcı şəbəkəyə birləşdirilsin və bununla da məsələ bitsin. Cari ildə bununla bağlı hər hansı bir iş görülməsə belə, yenə problem deyil. Ona görə ki, 2019-cu ilədək hələ vaxt var. Ona görə də səslənən fikirlər həqiqəti əks etdirir və heç bir problem olmayacaq".
Vidadi ORDAHALLI
