Azərbaycan-Fransa Parlamentlərarası işçi qrupun üzvü, millət vəkili Cavanşir Feyziyevin redaksiyamıza verdiyi məlumata görə, Şuşanın işğalı ərəfəsində Azərbaycanın Dostları Assosiasiyası Parisdə bir sıra tədbirlər keçirir. Həmin tədbirlər çərçivəsində Assosiasiyanın prezidenti Jan Fransua Manselin Şuşanın işğalı ilə bağlı məqaləsi də Fransanın aparıcı mətbuat orqanı olan "Mond" qəzetində dərc olunub. Həmin məqalənin tərcüməsini oxucularımızın diqqətinə çatdırırıq:
"8 mayda Şuşanı unutmayaq"
Əgər 1945-ci ilin 8 mayı bizim yaddaşlarımızda müttəfiqlərin qalib gəldiyi nasist Almaniyasının təslim olduğu gün kimi qalıbsa, 1992-ci ilin 8 mayı azərbaycanlı dostlarımızın yaddaşında erməni ordusunun ələ keçirdiyi Şuşanın işğalı günü kimi qalıb.
Şuşa Azərbaycan müsiqisinin beşiyi olub. Məhz bu şəhərdə Azərbaycan xalqının emosiyalarını qədimlərdən bu günə qədər daşıyan muğamla bağlı Azərbaycan mədəniyyətinin ən gözəl səhifələri yazılıb. Qafqaza səfəri zamanı Aleksandr Düma o dövrün ən lirik şairlərindən biri olmuş Qarabağ Xanının qızı Xurşudbanu Natavanla məhz Şuşada görüşüb.
Şuşa şəhəri 1992-ci ildə erməni ordusu tərəfindən işğal olunana qədər bütün tarix boyu Azərbaycan mədəniyyətinin döyünən ürəyi olub. Onun təslim olması ilə Azərbaycan Dağlıq Qarabağının işğalı başa çatır: Şuşanın işğalı zamanı 480 nəfər öldürülüb, 600 nəfər yaralanıb, 552 uşaq valideynini itirib. Məktəblər, tarixi, mədəni və dini abidələr dağıdılıb; Azərbaycan mədəni irsinin Şuşanın tarixi ilə bağlı olan bütün elementləri yoxa çıxıb. Dağıdıcı erməni işğalı əsrlərdən bəri Şuşada yaşamış azərbaycanlı ailələrini istisnasız olaraq öz yurd-yuvasından qovub və işğalçı ermənilər onların evlərinə yerləşdirilib. Odur ki, bu gün məhz bunun hesabına süni şəkildə öz müqəddəratını həlletmə tələb olunur. O vaxtdan bəri Şuşanın intellekt və sənətkarlıq zənginliyi yalnız xəyallarda canlandırılır.
Biz Fransada bu gün zülmdən azad olmağımızın 72-ci ildönümünü qeyd edəndə azərbaycanlı dostlarımızı, 25 ildir azadlığını və müstəqilliyini itirmiş Şuşanı xatırlayırıq. Amma bu həmişəlik belə qalmayacaq. Arzu edək ki, Respublikanın yeni prezidenti tezliklə fəal bir şəkildə Minsk Qrupunun həmsədri vəzifəsini üzərinə götürsün, Azərbaycan və Ermənistan arasında barışa, işğal olunmuş torpaqların azad olunmasına və qaçqınların hüquqlarının bərpasına söykənən ədalətli və davamlı bir sülhə nail ola bilsin.
Jan-Fransua MANSEL Fransa Nümayəndələr Palatasının deputatı, Azərbaycanın Dostları Assosiasiyasının prezidenti