Akif Nağı: "Şavarş Köçəryanın söylədikləri sırf ictimai rəyi çaşdırmağa hesablanmış ağ yalandır"
Ermənistan xarici işlər nazirinin müavini Şavarş Köçəryan öz ölkəsinin KİV-inə açıqlamasında azərbaycanlı diplomat Araz Əzimovun Dağlıq Qarabağ münaqişəsinin nizama salınma mexanizmlərilə bağlı fikirlərinə "cavab" verib.
O bildirib ki, istənilən konfliktin həlli beynəlxalq qanunlar əsasında tənzimlənməlidir: "Ən başlıcası isə, BMT-nin nizamnaməsinə ciddi riayət olunmalıdır. Mən Araz Əzimovun diqqətinə çatdırmaq istəyirəm ki, BMT-nin Nizamnaməsinə görə, ölkənin ərazi bütövlüyü prinsipi xalqların öz müqəddəratını həll etməsinə qarşı ola bilməz. BMT-nin 1993-cü ildə qəbul etdiyi qətnamələrin icrasına gəldikdə isə, onları Azərbaycan atəşkəsi pozmamaq öhdəliyinə əməl etməməklə pozub".
Ermənistan rəsmisinin bu açıqlaması necə dəyərləndirilə bilər?
Qarabağ Azadlıq Təşkilatının sədri Akif Nağının sözlərinə görə, Ş.Köçəryan ciddiliyini itirmiş bir diplomatdır: "Çünki onun çıxışlarında heç bir məsuliyyət hissi olmur. Sanki bir millətçi ekspert kimi şərh verir. Onun son açıqlaması da bu qəbildən olan sərsəm fikirlər sırasına aid edilə bilər. Xalqların öz müqəddəratını təyin etmək hüququ ilə bağlı onun verdiyi şərh kökündən yanlışdır. Onlar bu məsələni dərindən araşdırıblar. İkinci Dünya Müharibəsindən sonra, xüsusilə də 60-cı illərdə xalqların öz müqəddəratını həll etməsi hallarına daha çox rast gəlinib. Ancaq beynəlxalq hüququn bugünkü reallıqları ölkələrin ərazi bütövlüyünün pozulması hesabına xalqların öz müqəddəratını təyin etmə hüququnu tanımır. Bu, Helsinki Yekun Aktı və BMT Nizamnaməsində aydın qeyd edilir. Ərazi bütövlüyü çərçivəsində hansısa muxtariyyət və ya fərqli bir statusdan söhbət gedə bilər. Bunu Ş.Köçəryan hamıdan gözəl bilir, sadəcə, ağ yalan danışmaqla ictimai rəyi başqa istiqamətə kökləmək istəyir.
BMT qətnamələri isə Ermənistanı daha ciddi narahat edir. Ona görə də həmin sənədlərə fərqli rəy verməyə çalışırlar. Bəli, həmin sənəddə atəşkəsə riayət olunması ilə bağlı müddəa var. Ancaq atəşkəsi hər zaman Ermənistan pozub. Bu baxımdan da BMT qətnamələrinin nə vaxtsa icra olunacağına onlar əmindir. Hesab edirəm ki, Ş.Köçəryanın söylədikləri sırf ictimai rəyi çaşdırmağa hesablanmış ağ yalandır".
Məhəmmədəli QƏRİBLİ