Yeganə Hacıyeva: "Azərbaycan bu istiqamətdə bütün dünyaya örnək ola biləcək bir ölkədir"
Müasir qloballaşma şəraitində müxtəlif mədəniyyətlərin bir-birinə sürətlə qarşılıqlı təsiri aşkar faktdır. Tarixi prosesin müasir mərhələsində mədəni, sosial-iqtisadi, texnoloji, kommunikasiya və digər münasibətlərin qloballaşması şəraitində bəşəriyyət öz vəhdətini dərk edir. Bu prosesdə mədəniyyətlərarası dialoq ən uğurlu vasitə kimi qəbul olunur.
Hazırda ölkəmiz beynəlxalq səviyyədə mədəniyyətlərarası dialoq məkanı kimi tanınır. Azərbaycan həm İslam Əməkdaşlığı Təşkilatı (İƏT), həm də Avropa Şurası ilə sıx əməkdaşlıq edən ölkədir. Ölkəmiz hər iki qurumda bərabərhüquqlu üzv kimi təmsil olunur. Hər iki qurumda təmsil olunan başqa hansı müsəlman ölkələri var və Azərbaycan onlarla müqayisədə Şərq-Qərb yaxınlaşmasında hansı fərqlilikləri ortaya qoya bilib?
Politoloq Yeganə Hacıyeva qəzetimizə bildirdi ki, dünya xalqları arasında dialoqun təbliğ olunması və inkişafında Azərbaycanın xidmətləri göz qabağındadır: "Azərbaycan Şimalla Cənubun, Şərqlə Qərbin kəsişmə nöqtəsində yerləşir. Real coğrafi və geomədəni imkanlara malik Azərbaycan həm Avropa Şurasına, həm də İƏT-ə üzv olan müsəlman ölkəsidir. Bizdən başqa hər iki qurumda təmsil olunan müsəlman ölkəsi qardaş Türkiyədir.
Azərbaycanın həm İslam, həm də Qərb dövlətləri ilə dostluq və əməkdaşlıq münasibətləri var. Azərbaycan müxtəlif etnosların və millətlərin, fərqli dinlərə mənsub insanların tarixən mehriban dostluq və qardaşlıq şəraitində yaşadığı tolerant bir ölkədir.
Azərbaycan Respublikasının Prezidenti İlham Əliyevin 4 noyabr 2008-ci il tarixdə "Avropa Şurasına üzv dövlətlərin mədəniyyət nazirlərinin "Mədəniyyətlərarası dialoq Avropa və onun qonşu regionlarında davamlı inkişafın və sülhün əsasıdır" mövzusunda konfransının Bakı şəhərində keçirilməsi haqqında" Sərəncamına uyğun olaraq, 2008-ci il dekabrın 2-3-də paytaxtda Avropa Şurasına üzv dövlətlərin mədəniyyət nazirlərinin konfransı keçirilib.
Sonra sivilizasiyalar arasında dialoqun inkişafını nəzərdə tutan "Bakı prosesi"nin əsası qoyulub və bu təşəbbüsün qlobal bir prosesə çevrilməsinə səbəb olub. Artıq "Bakı prosesi" dəqiq işləyən bir mexanizmə çevrilib. Mədəniyyətlərarası və sivilizasiyalararası dialoq indi dünyada ən aktual mövzulardan biridir. Dünyanın müxtəlif ölkələrində bu problemə həsr olunmuş çoxlu sayda konfrans, forumlar keçirilir. Dialoqdan danışıb dialoqun əleyhinə iş görmək, dialoqun aparıldığı meydanın özüllərini uçurmağa çalışmaq yolverilməzdir. Azərbaycan həm də yürütdüyü dövlət siyasətilə bu məsələlərə böyük önəm verdiyini ortaya qoymuş olur. Bu baxımdan da hesab edirəm ki, Azərbaycan bu istiqamətdə bütün dünyaya örnək ola biləcək bir ölkədir".
Məhəmmədəli QƏRİBLİ