Ramil Hüseynov: "Çünki ABŞ Rusiyadan yan keçən boru xətlərinin çəkilməsinə xüsusi dəstək verir"
Məlum olduğu kimi, energetika naziri Natiq Əliyev ABŞ-ın Azərbaycandakı səfiri Robert Sekutanı qəbul edib. Görüşdə bir sıra məsələlər müzakirə olunub. R.Sekuta "Cənub Qaz Dəhlizi" layihəsinin gedişatı ilə də maraqlanıb. N.Əliyev səfiri layihə üzrə işlərin gedişatı və mövcud çətinliklər barədə məlumatlandırıb. Nazir "Şahdəniz-2", "Cənub Qafqaz Boru Kəmərinin Genişləndirilməsi", TANAP layihələri üzrə işlərin qənaətbəxş səviyyədə olduğunu, lakin İtaliyada TAP layihəsinin tikintisi ilə bağlı bir sıra çətinliklərin hələ də qaldığını deyib. Bu problemlərin "Cənub Qaz Dəhlizi" layihəsinin vaxtında yekunlaşmasına mümkün təsirlərindən narahatlığını ifadə edib.
O da məlumdur ki, ABŞ-ın regionda maraqları dairəsində enerji layihələri mühüm əhəmiyyət kəsb edir. İki ölkə arasında diplomatik münasibətlərin 25 illiyi münasibətilə mətbuata müsahibəsində Sekuta bu məqama xüsusi toxunmuşdu. R.Sekuta deyib ki, ABŞ Avropanın enerji təhlükəsizliyinin təmin olunmasında oynaya biləcəyi müsbət rola görə "Cənub Qaz Dəhlizi"ni güclü şəkildə dəstəkləyir. Səfir qeyd edib ki, Azərbaycan və ABŞ-ın əməkdaşlıq edə biləcəyi bir çox məqamlar var. Amma onlar arasında iki sahə var ki, burada əməkdaşlıq təkcə hər iki ölkə üçün yox, həm də region üçün böyük strateji əhəmiyyət daşıyır. Bu, enerji təhlükəsizliyi və terrorçuluqla mübarizədir: "Azərbaycan əhəmiyyətli enerji resurslarına malik ölkədir və Avropanın enerji təhlükəsizliyində, Avropaya enerji ehtiyatları təchizatının diversifikasiyasının təmin olunmasında vacib rol oynayıb, oynayır və fikrimcə, oynamaqda davam edəcək. Bu, Avropa ölkələrinə xarici təzyiqlərə qarşı daha yaxşı müqavimət göstərməyə imkan verir. Azərbaycanın vacib rolu məhz bundadır".
Bütün bunlardan çıxış edərək, ehtimal etmək olarmı ki, TAP-la bağlı yaradılan süni əngələ görə ABŞ İtaliyaya hansısa təsir göstərə bilər?
Məsələyə münasibət bildirən VİP-in sədr müavini Ramil Hüseynov bunu istisna etmədi. O bunu bir sıra arqumentlərlə əsaslandırdı: "Məsələ ondadır ki, NATO üzvü olan Avropa ölkələrindən İtaliya Böyük Britaniyadan sonra Birləşmiş Ştatlarla xüsusi yaxın əlaqələrə malik olan ikinci ölkədir. Bu iki ölkə arasında çox nadir hallarda fikir ayrılığı yaranır. Ona görə də Birləşmiş Ştatlar bununla bağlı İtaliyaya hansısa formada təsir göstərə bilər. Hesab edirəm ki, TAP-la bağlı yaranan vəziyyət uzansa, rəsmi Vaşinqtonun hərəkətə keçməsi istisna deyil. Çünki ABŞ Rusiyadan yan keçən boru xətlərinin çəkilməsinə xüsusi dəstək verir. "Cənub Qaz Dəhlizi" də belə layihələrdən biridir. Məqsəd bu istiqamətdə diversifikasiya işləri aparmaq və Avropanın Rusiyadan enerji asılılığını azaltmaqdır. O baxımdan güman edirəm ki, TAP-la bağlı yaranan problem tezliklə öz həllini tapacaq və Birləşmiş Ştatların hansısa formada proseslərə müdaxilə etməsinə ehtiyac qalmayacaq. Zatən, bu yeni deyil. Bakı-Tiflis-Ceyhan kəməri çəkilən zaman da bənzər problemlər ortaya çıxdı, amma onlar öz həllini tapdı. O üzdən, bununla bağlı ciddi narahatlığa ehtiyac yoxdur".
Vidadi ORDAHALLI
