Qulu İsmayılov: "Azərbaycan özünün əhatə olunduğu digər layihələrə də eyni məsuliyyətlə yanaşır"
Prezident İlham Əliyev Nazirlər Kabinetinin 2017-ci ilin birinci rübünün sosial-iqtisadi inkişafının yekunlarına və qarşıda duran vəzifələrə həsr olunan iclasında Azərbaycanın təşəbüskarı olduğu böyük layihələrin əngəllənmə cəhdlərindən danışıb:
"Cənub Qaz Dəhlizi"nin icrası artıq reallıqdır. Düzdür, bizə əngəl törətmək istəyənlər də var. Bu da təbiidir. Biz bunu hələ 10 il bundan əvvəl görmüşük. Yadımdadır, o vaxt Bakı-Tbilisi-Ceyhan neft kəməri tikiləndə bizim siyasətimizə zərbə vurmaq istəyən qüvvələr, eyni zamanda, erməni lobbisi və bu layihəyə müsbət yanaşmayan bəzi dairələr müxtəlif yollarla daha çox ekoloji bəhanələri gətirərək çalışırdılar ki, bizim işimizə zərbə vursunlar. Buna müəyyən dərəcədə nail oldular. Yadımdadır, o vaxt hətta bəzi beynəlxalq maliyyə qurumları da kreditləşməni bir qədər yubatdılar. Ancaq buna baxmayaraq, Bakı-Tbilisi-Ceyhan 2006-cı ildə açıldı. Bu gün də bəzi dairələr, bəzi kənar qüvvələr çalışırlar ki, yenə də ekoloji bəhanələr gətirərək "Cənub Qaz Dəhlizi"nin bəzi seqmentlərində işləri yubatsınlar. Ancaq bunun heç bir əsası yoxdur. Bu, sadəcə olaraq, bir bəhanədir. Bütün ekoloji normalar gözlənilir, bütün məsələlər razılaşdırılıb. Tezliklə "Cənub Qaz Dəhlizi"nin istifadəyə verilməsi həm bizim, həm də bu layihədə iştirak edən və bu layihədən gələcəkdə xeyir götürəcək bütün tərəflər üçün önəmlidir. Mən əminəm ki, 2017-ci il bu baxımdan həlledici il olacaq və biz gələn il TANAP layihəsinin açılışını qeyd etməliyik".
Bu cür böyük layihələrin reallaşmasında ən böyük amil nəyi hesab etmək olar?
İqtisadçı Qulu İsmayılov qəzetimizə açıqlamasında bildirdi ki, Azərbaycan kimi ölkənin belə layihələrin icrasını üzərinə götürməsi əvvəldən çox risqli görünürdü: "Çünki bunlar meqalayihə sayılır. Özü də dünyanın gözünü dikdiyi enerji sahəsini əhatə edir. Prinsip belədir ki, hamı çox pay almaq istəyir. İstəyinə nail olmayanlar da mane olmağa çalışır. Bizim üçün ən fərqli cəhət budur ki, bəzən layihəyə aidiyyəti olmayan istiqamətlərdən belə zərbə alırıq. Bunu da Prezident xüsusilə vurğuladı ki, başlıca maneələrdən biri də erməni lobbisidir. Onlar bizimlə bütün aspektlərdə müharibə aparır. Bu istiqamət isə onlar üçün daha böyük əhəmiyyət kəsb edirdi. Çünki bilirdilər ki, Azərbaycan bu layihələr hesabına varlana bilər. Bakı-Ceyhanda səylər fayda vermədi. Nəticədə Azərbaycana böyük məbləğdə valyuta daxil oldu. Bunun da nəticəsində biz daha güclü dövlətə çevrildik. İndi "Cənub Qaz Dəhlizi"nin istifadəyə verilməsilə Azərbaycan iqtisadiyyatında yeni mərhələ başlayacaq. Buna da mane olmağa çalışırlar. Ancaq Azərbaycan hakimiyyətinin, xüsusilə də İlham Əliyevin möhkəm iradəsi bu layihənin də sona çatmasına imkan yaradacaq. Hər iki layihənin ərsəyə gəlməsində ən mühüm faktor kimi Azərbaycan hakimiyyətinin göstərdiyi dönməzliyi, möhkəm iradəni göstərə bilərik. Azərbaycan özünün əhatə olunduğu digər layihələrə də eyni məsuliyyətlə yanaşır. Təsadüfi deyil ki, belə layihələrdə işlərin icrası ilə bağlı hesabatlarda Azərbaycan hamını qabaqlayır".
Məhəmmədəli QƏRİBLİ
