Vüqar Qədirov: "Bu da beynəlxalq münasibətlərin normallaşmasının bu günü və gələcəyi üçün ciddi əhəmiyyət daşıyacaq"
Məlum olduğu kimi, Beşinci Qlobal Bakı Forumuna 50-dən çox ölkədən 300-ə yaxın nümayəndə qatılıb. 40-dan çox indiki və sabiq prezident, dövlət və hökumət nümayəndələrinin də iştirak etdiyi tədbirdə qlobal gündəmdə olan məsələlər diqqət mərkəzindədir.
Bakı Forumunun açılışında iştirak edən Prezident İlham Əliyev dünyada hələ də təhlükəsizlik problemlərinin aktual olmasına diqqət çəkib: "Bəzi hallarda isə Azərbaycanın siyasəti reallıqları dəyişməyə yönəlir. Qonşular arasında sabitləşdirici rol oynayır". Prezident bir müddət əvvəl Amerika Birləşmiş Ştatları və Rusiya Silahlı Qüvvələri Baş Qərargah rəislərinin Bakıda keçirilən görüşünü xatırladıb. Qeyd edib ki, görüş tərəflərin təşəbbüsü olub. Bu isə Azərbaycana olan hörmət, Azərbaycanın müstəqil siyasətinin qiymətləndirilməsi deməkdir. Dövlət başçısı Azərbaycanın terrorçuluğa qarşı mübarizə, sülhməramlı əməliyyatlara verdiyi töhfədən danışıb. Ölkəmizin təşəbbüskarı və iştirakçısı olduğu iri layihələrə diqqət çəkib.
"Azərbaycan mədəniyyətlərarası dialoqa da töhfə verir. Ölkənin sabit inkişafı göstərir ki, yalnız qarşılıqlı anlaşma, tolerantlıq, multikulturalizmlə tərəqqiyə nail olmaq mümkündür".
Bakıda keçirilən bu forum beynəlxalq münasibətlərin bu günü və gələcəyi barədə dünyaya hansı mesajları verir?
Ekspert Vüqar Qədirovun sözlərinə görə, Azərbaycan elə ölkədir ki, burada müxtəlif millətlərin, müxtəlif dinlərin nümayəndələri yaşayır: "Ona görə də Azərbaycan beynəlxalq forumun keçirilməsi üçün ən yaxşı ölkədir. Bu çox vacib bir forumdur. Burada dünya ölkələrinin sabiq və hazırkı liderləri toplaşır ki, qlobal problemləri müzakirə etsinlər. Azərbaycan bir sıra mötəbər və beynəlxaq əhəmiyyətli tədbirlərə ev sahibliyi etməklə, öz üzərinə çox böyük və məsuliyyətli bir missiya götürüb. Ölkəmizdə bir-birinin ardınca keçirilən beynəlxalq əhəmiyyətli tədbirlərin miqyası ildən-ilə daha da genişlənir. Artıq beşinci dəfədir Azərbaycanda keçirilən Qlobal Bakı Forumunun əhatə etdiyi coğrafiya və toplantıda iştirak edən nüfuzlu qonaqların sayının artması bir daha onu göstərir ki, bu gün bəşəriyyət üçün önəmli olan beynəlxalq tədbirlərin mərkəzinə çevrilən Azərbaycan dünyada etibarlı tərəfdaş, yüksək səviyyəli təşkilatçı imici qazanıb. Bilirsiniz ki, ən ciddi problemlərin həlli məhz bu cür forumlarda aparılan müzakirələrdə tapılır. Hesab edirəm ki, forumun mahiyyəti, müzakirə edilən mövzular dünyanı narahat edən ən ciddi problemlərin həllinə töhfə vermiş olacaq. Bu da beynəlxalq münasibətlərin normallaşmasının bu günü və gələcəyi üçün ciddi əhəmiyyət daşıyacaq".
Məhəmmədəli QƏRİBLİ