Qabil Hüseynli: "Ermənistanla Türkiyə arasında olan narazılığın heç biri həllini tapmayıb ki, Ankara buna razılıq versin"
"Moskva Ermənistanla Türkiyə arasında danışıqlara kömək etməyə hazırdır və Türkiyə-Ermənistan sərhədlərinin açılmasını alqışlayardı". Bunu Rusiyanın xarici işlər naziri Sergey Lavrov deyib. Lavrov qeyd edib ki, Rusiya 2007-2009-cu illərdə Ermənistanla Türkiyə arasında donmuş münasibətlərin açılmasında vacib rol oynadı, amma sonradan normallaşma prosesi dayandı.
Lavrov deyib ki, Ankara ilə İrəvan danışıqlar masasına dönsələr, Moskva onlara aktiv yardım göstərə bilər və buna hazırdır.
Qeyd edək ki, hazırda Türkiyə ilə Ermənistan arasında diplomatik münasibətlər yoxdur və iki ölkə arasındakı sərhədlər bağlıdır.
Hazırda Türkiyə ilə Rusiya arasında münasibətlərdə istiləşmə hiss edilir. Münasibətlərin bu fazasında Rusiyanın Türkiyəni sərhədlərin açılmasına razı sala biləcəyi təhlükəsi varmı?
Politoloq Qabil Hüseynlinin sözlərinə görə, Türkiyənin buna razı olacağına inanmaq sadəlövhlük olardı: "Qeyd edim ki, Ermənistanın "erməni soyqırımı" iddiası ilə bağlı Ankara ilə İrəvan arasında ciddi fikir ayrılığı var. Ermənistan Osmanlı imperiyası dövründə Türkiyədə milyon yarım erməninin "soyqırım"a məruz qaldığını iddia edir. Türkiyə isə bu rəqəmin şişirdildiyini və həmin vaxt baş verən vətəndaş müharibəsində hər iki tərəfdən kütləvi ölənlər olduğunu deyir.
Bundan başqa, Türkiyə rəhbərliyi dəfələrlə bəyan edib ki, Ermənistan-Azərbaycan, Dağlıq Qarabağ münaqişəsi həll olunmayınca, Ermənistanla sərhəd bağlı qalacaq. Rusiyadan başqa, dünyanın digər aparıcı ölkələri həmin sərhədlərin açılmasına çalışıb. 2009-cu ildə imzalanan "Sürix protokolu" adlı sənədi ölkələrin parlamentləri ratifikasiya etmədi. Bu məsələ eyni zamanda böyük risq tələb edir. Belə bir addımın atılması Türkiyənin daxili ictimai rəyində "bomba effekti" verə bilər. Çünki Ermənistanla Türkiyə arasında olan narazılığın heç biri həllini tapmayıb ki, Ankara buna razılıq versin".
Məhəmmədəli QƏRİBLİ