"Atəşkəsə nəzarət mexanizminin gücləndirilməsi tələbi mövcud status-kvonu qoruyub saxlamaq üçün Ermənistanın növbəti bəhanəsidir"
Ermənistan prezidenti Serj Sarkisyan Qarabağ münaqişəsinin nizama salınması üzrə sülh danışıqlarında iştirakdan nümayişkaranə imtinasını növbəti dəfə izah etməyə çalışıb və Azərbaycanın ünvanına yeni ultimativ bəyanatla çıxış edib. Məlum olduğu kimi, Azərbaycandan fərqli olaraq, Ermənistan rəhbərliyi sülh danışıqlarını əvvəlki formatlarda və əvvəlki gündəliklə davam etməkdən imtina edir.
"Ermənistan heç vaxt Qarabağ münaqişəsinin nizama salınması üzrə danışıqlardan imtina etmir və Yerevan yüksək səviyyədə yeni görüş imkanını müzakirə etməyə hazırdır, əgər Bakı rəvvəlki görüşlərində nail olunmuş razılığı yerinə yetirəcəksə". Ermənistan prezidenti Serj Sarkisyan bunu ispan agentliyi EFE-yə müsahibəsində Azərbaycanla münasibətlərin normallaşdırılması perspektivinə toxunarkən deyib.
S.Sarkisyanın sözlərinə görə, Ermənistan danışıqlar masasına yalnız atəşin dayandırılması rejiminin pozulması hadisələrinin araşdırılması üçün mexanizmin yaradılması halında qayıdacaq. Məlum olduğu kimi, Azərbaycan öz işğal edilmiş və beynəlxalq səviyyədə tanınmış ərazilərində belə mexanizmin yaradılmasından prinsipial olaraq imtina edir və tələb irəli sürür ki, işğalçı Ermənistan qoşunlarını özünün beynəlxalq aləm tərəfindən tanınmış sərhədlərinə çəksin.
Ermənistan prezidenti Serj Sarkisyanın İspaniyanın Efe agentliyinə verdiyi müsahibəsində səsləndirdiyi bəyanatlarına Azərbaycan Xarici İşlər Nazirliyinin (XİN) mətbuat xidmətinin rəhbəri Hikmət Hacıyev cavab verib.
H.Hacıyev EFE agentliyinə "Bakı hesab edir ki, Qarabağ danışıqlarına hər hansı qeyd-şərtin qoyulması şantajdır" adı altında müsahibə verib.
Müsahibədə H.Hacıyev bildirib ki, Ermənistan-Azərbaycan Dağlıq Qarabağ münaqişəsinin həlli üzrə substantiv danışıqlara başlamağa Ermənistan tərəfindən dövlət başçısı səviyyəsində qeyd-şərtin qoyulması Ermənistan tərəfindən qəsdən danışıqların pozulması, boykot və şantaj edilməsidir.
Sarkisyanın danışıqlar prosesinə qayıtmaqla bağlı şərt irəli sürməsi hansı anlamı daşıyır?
Politoloq Qabil Hüseynlinin sözlərinə görə, indiyə qədər danışıqlar prosesində qeyri-konstruktivlik nümayiş etdirən Ermənistan hazırkı mərhələdə təmaslardan imtina edir:
"Çünki müxtəlif bəhanələrlə status-kvonun qorunub saxlanmasını təmin etmək uzun sürə bilməz. Artıq rəsmi Bakı ortaya konkret mövqe qoyur və Ermənistan dilemma qarşısında qalıb. Ya konstruktiv mövqeyə qayıtmalıdır, ya da müharibə variantı ilə üzləşə bilər. Aprel hadisələri bir daha sübut etdi ki, Azərbaycan Ordusunun döyüş əzmi, torpaqlarımızı işğaldan azad etmək istəyi yüksəkdir. Yəni Azərbaycan Ermənistanın bu cür oyunları ilə barışmağı düşünmür. Danışıqlara başlamaq üçün hər hansısa şərtin irəli sürülməsi qəbuledilməzdir. 2016-cı ilin ortalarından Ermənistan bütün görüşlərdən qaçır. Ermənistanın danışıqlardan imtina etməsi davamlı şəkildə hərbi təxribatların törədilməsilə müşayiət olunur. Sarkisyanın bu fikri heç də yenilik deyil. Bundan qabaq da, istər Ermənistan rəsmilərinin, istərsə də parlament səviyyəsində bu tip fikirlərin söylənməsinin əvvələr də şahidi olmuşuq. Atəşkəsə nəzarət mexanizminin gücləndirilməsi tələbi mövcud status-kvonu qoruyub saxlamaq üçün Ermənistanın növbəti bəhanəsidir. Azərbaycanın bununla bağlı mövqeyi konkretdi. Ermənistan atəşkəsin qorunub saxlanmasında maraqlıdırsa, öz işğalçı qoşunlarını ərazilərimizdən geri çəkməlidir".
Məhəmmədəli QƏRİBLİ