"Yaxşı olar ki, Ermənistan bu konstruktivliyini Dağlıq Qarabağla bağlı aparılan danışıqlarda nümayiş etdirsin və həmin prosesdən yayınmasın"
Ermənistan parlament seçkilərini izləməyə müşahidə missiyası göndərməsi üçün Azərbaycana müraciət edib. Ermənistan KİV-nin verdiyi məlumata görə, Baş nazir Karen Karapetyanın bununla bağlı məktubu bütün MDB-yə üzv ölkələrə göndərilib. Bu barədə MDB-nin icraiyyə komitəsinin birinci sədr müavini Viktor Quminski İrəvanda jurnalistlərə açıqlamasında deyib.
O, "İrəvana Azərbaycandan olan müşahidəçilər də gələcəkmi" sualına isə belə cavab verib:
"Biz bütün ölkələrə dəvət göndərmişik. Ancaq Rusiya, Türkmənistan, Qazaxıstan, Ukrayna və Belarusdan olan 76 müşahidəçi müsbət cavab verib".
Xatırladaq ki, Ermənistanda parlament seçkiləri aprelin 2-də keçiriləcək.
Bəllidir ki, Azərbaycanın torpaqlarını işğal altında saxlayan və həmin dövlətin işğalçı siyasəti səbəbindən Ermənistanla heç bir əlaqəsi yoxdur. Bu səbəbdən də, Azərbaycanın həmin dəvəti qəbul etməyəcəyi bəllidir. Belə olan təqdirdə, Ermənistan niyə bu təşəbbüslə çıxış edib?
Milli Qeyri Hökumət Forumunun Prezidenti Rauf Zeyni qəzetimizə bildirdi ki, Ermənistanın bu addımını növbəti hiylə adlandırmaq olar: "Təbii ki, bununla beynəlxalq ictimaiyyəti aldatmaq istəyirlər. Belə rəy yaratmağa çalışırlar ki, sanki bizimlə münasibətlərin normallaşmasında xüsusilə maraqlıdırlar. Bunun sonunun nə olacağını da bilirlər. Azərbaycanın iştirakını əvvəlcədən bildikləri üçün, seçkilərdən sonra deyəcəklər ki, görürsünüz, Azərbaycan bizimlə diaoloqa gəlmir. Süni dialoq atmosferi yaratmaqla beynəlxalq birliyi aldada bilməzlər. Belə edirlər ki, sanki bunlar bizim torpaqları işğal etməyib, 1 milyondan artıq vətəndaşımızı qaçqın salmayıb. Azərbaycan bu illər ərzində ermənilərin bütün məkirli niyyətlərini ifşa edib. Yaxşı olar ki, Ermənistan bu konstruktivliyini Dağlıq Qarabağla bağlı aparılan danışıqlarda nümayiş etdirsin və həmin prosesdən yayınmasın".
Məhəmmədəli QƏRİBLİ