"İstənilən mübahisəli məsələlər, anlaşılmaz situasiyalar dialoq vasitəsilə həll olunmalıdır"
Azərbaycan Prezidenti İlham Əliyev Fransaya işgüzar səfəri çərçivəsində fransız həmkarı Fransua Ollandla görüşüb. Rəsmi məlumata görə, sənədlərin imzalanması mərasimindən sonra prezidentlər mətbuat qarşısında bəyanatla çıxış ediblər.
Bəyanatda bir sıra məqamlara toxunulub. O cümlədən, Türkiyə-Niderland arasında yaşananlar da diqqət mərkəzində olub. Niderland və Türkiyə arasında yaşanan diplomatik gərginlikdən danışan Olland deyib: "Bizim Avropaya və Türkiyəyə ehtiyacımız var, Türkiyənin də Avropaya. Hər mövzuda olduğu kimi, bu mövzuda da dialoqu təşviq etməliyik".
Bununla yanaşı, Ollandın açıqlamasından o da məlum olub ki, Azərbaycan Türkiyə ilə Niderland arasında yaşanan problemin həllinə töhvə verməlidir: "Hesab edirik ki, hər dəfə sülhə töhfəmiz beynəlxalq səviyyədə həyata keçirmək istədiyimiz fəaliyyətin və qurmaq istədiyimiz münasibətlərin məğzidir. Xüsusilə də gərginliklər olanda və hazırda Avropa ilə Türkiyə arasında olan vəziyyətdə. Bizim rolumuz aydın şəkildə bildirməkdir ki, nəyi qəbul edirik, nəyi qəbul etmirik. Avropa ilə Türkiyə arasında olan münasibətlərin sabitləşməsi üçün də töhfəmizi verməliyik. Digər mövzularda olduğu kimi, bu mövzu ilə də bağlı dialoqu təşviq etməliyik".
Maraqlıdır, Azərbaycan Türkiyə-Niderland münasibətlərinin düzəlməsinə nə kimi töhvə verə bilər və Olland nəyə işarə vurdu?
Məsələyə münasibət bildirən Tarix elmləri üzrə fəlsəfə doktoru, İctimai Problemlərin Tədqiqi Assosiasiyasının rəhbəri Məhərrəm Zülfüqarlının sözlərinə görə, bu kimi məsələlərin qarşılıqlı dialoq şəklində mümkündür: "İstənilən mübahisəli məsələlər, anlaşılmaz situasiyalar dialoq vasitəsilə həll olunmalıdır. Azərbaycan regionda nüfuzlu dövlətdir. İki il əvvəl Rusiya hərbi təyyarasinin vurulması ilə əlaqədar bu ölkənin Türkiyəylə münasibətləri münasibətləri xeyli kəskinləşmişdi. Müəyyən dövrdən sonra Türkiyə-Rusiya münasibətləri yoluna düşdü. Sonra məlum oldu ki, iki ölkə münasibətlərinin düzəlməsində Azərbaycan uğurlu vasitəçilik səyləri göstərib. Belə ki, Azərbaycanın hər iki dövlətlə olan yaxın münasibətləri bu işə hansısa formada öz töhfəsini vermiş oldu. Türkmyə-Nederland münasibətlərinin bərpasına gəldikdə isə, Azərbaycan Fransa ilə birlikdə bu işə töhvə verə blər. Yəni bu məsələdə səylərin birləşdirilməsi daha optimal varyantdır. Fikrimcə, yalnız bu minvalla münasibətlərin düzəlməsinə yardım etmək olar".
Vidadi ORDAHALLI