Aydın Mirzəzadə: "Məqsədyönlü şəkildə havalar isti olan vaxt Azərbaycana suyu buraxmır"
Ermənistan Sərsəng su anbarının ehtiyatlarını siyasi təhdid aləti olaraq istifadə edir. Xəbər verildiyi kimi, bunu Bakıda davam edən I Beynəlxalq Su Həftəsi çərçivəsində keçirilən "Su ehtiyatları, hidrotexniki qurğular və ətraf mühit" mövzusunda beynəlxalq elmi-praktik konfrans zamanı "Azərsu"nun sədri Qorxmaz Hüseynov deyib.
O bildirib ki, Azərbaycan su ehtiyatlarının, ətraf mühitin və ekologiyanın idarə olunması və mühafizəsi ilə bağlı bir sıra konvensiyalara qoşulub: "Lakin təəssüflər olsun ki, beynəlxalq təşkilatların bu sahədə apardığı işlərə baxmayaraq, Ermənistan beynəlxalq hüquq normalarını kobud şəkildə pozur. Ermənistanın təcavüzü nəticəsində Azərbaycanın işğal olunmuş ərazilərində qalan Sərsəng su anbarı tərk edilmiş vəziyyətdədir və onun resursları siyasi təhdid aləti qismində istifadə olunur".
Q.Hüseynov qeyd edib ki, Ermənistanın fəaliyyəti Azərbaycan vətəndaşları üçün humanitar və ekoloji problemlər yaradır: "Beynəlxalq təşkilatlar Ermənistandan işğal olunmuş əraziləri azad etməsini və Sərsəng su anbarının resurslarını siyasi təhdid aləti olaraq istifadə etməyi dayandırmasını tələb edir. Bundan başqa, Ermənistanın istismar müddəti çoxdan başa çatmış "Metsamor" atom elektrik stansiyası regionun ekoloji stabilliyinə böyük təhlükə törədir".
Görünən odur ki, artıq neçənci dəfədir Ermənistan Sərsəng su anbarından Azərbaycana qarşı təzyiq vasitəsi kimi istifadə etməyə çalışır.
Sözügedən məsələni "Bakı-Xəbər"ə şərh edən millət vəkili, politoloq Aydın Mirzəzadənin sözlərinə görə, Sərsəng su anbarı vaxtilə Azərbaycanın Aran zonasının kənd təsərrüfatı və insanların su ehtiyaclarının ödənilməsi üçün yaradılıb: "Ermənistan silahlı qüvvələri torpaqlarımızın bir hissəsini işğal edəndə su anbarı da onların nəzarətinə keçdi. Bu gün Ermənistan bir sıra faktorlardan, o cümlədən su anbarı amilindən Azərbaycana qarşı provokasiya vasitəsi kimi istifadə edir. Baxmayaraq ki, su anbarının təyinatı məhz Azərbaycanın Aran zonasının su ehtiyaclarını ödəməkdən ötrüdür. Onu heç cür başqa bir formada istifadə etmək olmur. Ancaq Ermənistan məqsədyönlü şəkildə havalar isti olan vaxt Azərbaycana suyu buraxmır. Qış dövründə isə suyu buraxmaqla torpaqlar üçün müəyyən texniki problemlər yaradır. Göründüyü kimi, Ermənistan təkcə torpaq işğal etmir, eyni zamanda ekoloji fəlakət yaradır. Azərbaycana qarşı təzyiq vasitəsi kimi Sərsəng su anbarından çox ciddi surətdə istifadə edir. Ermənistan Azərbaycan torpaqlarının işğalına son qoymalıdır. Ermənistan beynəlxalq hüquq normalarına riayət etməli, öz qoşunlarını Azərbaycan ərazisindən çıxarmalıdır. Həmçinin, heç bir halda Azərbaycanın ərazi bütövlüyünə hər hansı iddia irəli sürməməlidir. Bu, Azərbaycana problemlər yaradır, amma baş verənlər Ermənistana da problemlər yaradır. Bu gün Ermənistan iqtisadiyyatı tənəzzüldədir. Əhali durmadan ölkədən çıxır. İşğalçı ölkə hər hansı sərmayə cəlb edə bilmir".
Vidadi ORDAHALLI