Arzuxan Əlizadə: "2011-ci ildən Suriyada başlanan vətəndaş müharibəsi bu baxımdan işğalçı ölkə üçün yeni imkanlar açıb"
"Ermənistan tərəfindən Suriya və Livandan olan ermənilərin işğal olunmuş ərazilərimizə köçürülməsi təşviq edilir".
Bunu Bakıda Avropa Şurası Parlament Assambleyasının (AŞPA) Miqrasiya, Qaçqın və Məcburi Köçkünlər üzrə Komitəsinin iclasında çıxış edən xarici işlər nazirinin müavini Xələf Xələfov deyib. O bildirib ki, müstəqilliyi bərpa edəndən sonra Azərbaycan Ermənistan tərəfindın təcavüzə məruz qalıb və ərazilərin 20 faizi işğal olunub: "Bunun nəticəsində bir milyondan çox qaçqın və məcburi köçkün problemi yaranıb. Azərbaycan həm ölkə daxilində, həm də xaricdə qaçqın və köçkünlərə öz yardımını əsirgəmir. Hökumətimiz bu sahədə müvafiq qanunvericilik sistemi yaradıb, mənzil təminatı yaxşılaşıb, yoxsulluq azalıb. Ancaq onların problemi torpaqlar azad ediləndən sonra tam həllini tapacaq".
Onun sözlərinə görə, Ermənistanın məqsədli məskunlaşdıra siyasəti beynəlxalq hüquqa görə müharibə cinayətidir: "Ermənistan tərəfindən Suriya və Livandan olan ermənilərin işğal olunmuş ərazilərimizə köçürülməsi təşviq edilir. Ermənistanın bu avantürasına beynəlxalq qiymət verilməlidir".
Nazir müavini əlavə edib ki, Azərbaycan işğal olunmuş ərazilərini tezliklə azad edəcək, qaçqın və məcburi köçkünlərin problemləri həllini tapacaq: "Beynəlxalq birlik bu məsələdə ölkəmizə dəstək verməlidir".
Ermənistanın işğal olunmuş ərazilərdə qanunsuz məskunlaşdırma siyasəti aparması və bu işə xaricdə yaşayan ermənilərin cəlb olunması zaman-zaman gündəmdə olub. Müxtəlif vaxtlarda sözügedən məsələ KİV-lərin diqqət mərkəzində olub. Azərbaycanın sözügedən tədbirdə ilk dəfə rəsmi şəkildə bunu bəyan etməsini ekspertlər necə şərh edir? Məsələyə münasibət bildirən AMİP-in baş katibi Arzuxan Əlizadənin sözlərinə görə, bununla bağlı mütəmadi olaraq beynəlxalq ictimaiyyət məlumatlandırılmalıdır: "Zatən zaman-zaman Ermənistan və digər ölkələrin mətbuat səhifələrində Suriyadan olan ermənilərin işğal olunmuş ərazilərdə qanunsuz məskunlaşdırılmasına dair məlumatlar dərc olunur. 2011-ci ildən Suriyada başlanan vətəndaş müharibəsi bu baxımdan işğalçı ölkə üçün yeni imkanlar açıb. Məsələ ondadır ki, Ermənistan işğal olunmuş ərazilərdə əsasən Suriya və Livandan olan yoxsul erməniləri məskunlaşdırır. Az-çox imkanı, bacarığı olan ermənilər Avropaya üz tutur. Dağlıq Qarabağ onlar üçün cəlbedici deyil. Ona görə ki, iqtisadi şərait buna imkan vermir. Ancaq buna baxmayaraq, onlar hər vəchlə süni məskunlaşdırma siyasətini genişləndirməyə çalışırlar. Bu baxımdan Azərbaycan rəsmi səviyyədə bəyan etməklə beynəlxalq qurumların diqqətini bu məsələyə yönəltməlidir".
Vidadi ORDAHALLI