"Rusiyanın bu istiqamətdə konkret rəyi bəlli deyil"
Türkiyə prezidenti Rəcəb Tayyib Ərdoğanın martın 10-da Rusiyada səfərdə olarkən rusiyalı həmkarı Vladimir Putinlə birgə keçirdiyi mətbuat konfransında bildirib ki, Rusiya-Türkiyə Yüksək Səviyyəli Əməkdaşlıq Şurasının 6-cı iclasında Türkiyə-Rusiya-Azərbaycan üçlü ittifaqının yaradılmasını müzakirə ediblər. Çox maraqlıdır ki, bu məlumat açıqlanan kimi Ermənistan KİV-ləri bu tezisin əleyinə geniş fəaliyyətə başlayıb. Belə bir birliyinin yaranması mümkündürmü və Ermənistan bundan niyə narahatdır?
Politoloq Natiq Mirinin sözlərinə görə, Türkiyə-Azərbaycan-Rusiya ittifaqı dövriyyəyə girərsə, nəinki Dağlıq Qarabağ problemi, eyni zamanda Cənubi Qafqazda olan digər münaqişələr, yəni Gürcüstanın Abxaziya və Cənubi Osetiya problemi də tədricən öz həllini tapa bilər:
"Əslində, Azərbaycan artıq bir neçə üçlük formatlarında iştirak edir. Məsələn, Türkiyə-Azərbaycan-Gürcüstan, Türkiyə-Azərbaycan-İran və Türkiyə-Türkmənistan-Azərbaycan formatları var. Bunların hamısı da regional formatlardır. Həmçinin bu formatlar bilavasitə həm iqtisadi əməkdaşlığın yüksəlməsinə, həm də müəyyən mənada təhlükəsizliyə xidmət edən formatlardır. Onu da qeyd edim ki, bu cür ittifaqların mövcudluğu regionda daha rahat, daha rəvan əməkdaşlığı şərtləndirir. O cümlədən düşünürəm ki, regionun ən böyük ölkələrindən biri olan Rusiyanın iştirakı ilə belə bir üçlü ittifaq mümkün olarsa, bu ittifaq bütövlükdə regionun təhlükəsizlik balansını ödəyə biləcək ittifaq olar. Nəzərə almaq lazımdır ki, bu gün bir-birinə paralel surətdə yeni iki kommunikasiya sistemləri çəkilir. Bu kommunikasiyalardan biri Qərbi birbaşa Şərqə bağlayan, Hindistana qədər ola biləcək tranzit xəttidir ki, bu da bilavasitə Azərbaycanın təşəbbüsü ilə yaradılıb. Bu o deməkdir ki, Azərbaycan region üçün əhəmiyyət kəsb edən ölkəyə çevrilib.
Türkiyə-Azərbaycan-Rusiya üçlü ittifaqının varlığı regionda həm iqtisadi yüksəlişə səbəb ola bilər, həm də eyni zamanda bu ittifaq bütövlükdə regionun təhlükəsizliyinə qarant sayıla bilər. Türkiyə-Azərbaycan-Rusiya ittifaqının yaradılmasında hələlik Türkiyə və Azərbaycan tərəfi maraqlı görünür. Rusiyanın bu istiqamətdə konkret rəyi bəlli deyil. Ermənistanın da ehtiyatlanması məhz belə perspektivli bir qurumun yarana biləcəyilə bağlıdır. Hiss edilir ki, Ermənistan Rusiyanın bizimlə yaxınlaşmasında maraqlı deyil".
Məhəmmədəli QƏRİBLİ